JEDUTUN

[lagmit gikan sa lintunganayng pulong nga nagkahulogang “dayeg”].

1. Usa ka Levihanong maghohoni. Mopatim-awng si Jedutun gitawag kanhi nga Etan, kay sa wala pa moabot ang Arka sa Jerusalem, si “Etan” gihisgotang kagrupo sa ubang mga maghohoni nga si Heman ug Asap, samtang human niana si “Jedutun” ang gihisgotang kauban sa maong grupo. (1Cr 15:​17, 19; 25:1) Walay gitala nga katigulangan kang Jedutun; aduna kang Etan. (1Cr 6:44-47) Ug walay gihisgotang mga kaliwat nga iya ni Etan; aduna kang Jedutun. (1Cr 9:16) Ang pag-usab sa ngalang Etan [nagkahulogang “Malungtaron; Padayong Nag-agos”] ngadto sa Jedutun [lagmit gikan sa lintunganayng pulong nga nagkahulogang “dayeg”] tinong nahiuyon sa buluhaton nga gihatag kaniya.​—1Cr 16:41; tan-awa ang ETAN Num. 3.

Si Jedutun ug ang iyang banay sa mga maghohoni nakigbahin sa daghang kasaulogan sa dihang angayng himoon ang “pagpasalamat ug pagdayeg kang Jehova” (1Cr 25:3); pananglitan, sa dihang ang arka sa pakigsaad gidala sa Jerusalem. (1Cr 16:​1, 41, 42) Sa pag-organisar pag-usab ni David diin ang mga maghohoni sa sangtuwaryo gibahin ngadto sa 24 ka dibisyon, ang ika-2, ika-4, ika-8, ika-10, ika-12, ug ika-14 nga ripa natunong sa unom ka anak nga lalaki ni Jedutun nga tanan nag-alagad ilalom sa pagdumala sa ilang amahan. (1Cr 25:​1, 3, 6, 7, 9, 11, 15, 17, 19, 21) Kini nga mga katungdanan nga giambitan ni Jedutun, Asap, ug Heman nagpakita nga ang matag usa sa tulo ka pangunang sanga sa mga Levihanon (Merari, Gersom, ug Kohat) gihawasan taliwala sa mga maghohoni sa templo. (1Cr 6:31-47) Kining tulo ka grupo nagdayeg kang Jehova pinaagig honi sa dihang giinagurahan ni Solomon ang templo. (2Cr 5:​12, 13) Ang mga kaliwat ni Jedutun gihisgotan sa panahon sa paghari ni Ezequias ug usab taliwala sa mga nadestiyero nga namalik gikan sa Babilonya.​—2Cr 29:​1, 12, 14, 15; Neh 11:17.

Tulo sa mga salmo ang naghisgot kang Jedutun diha sa mga superskripsiyon niini. Ang duha niini (Sal 39, 62) mabasa nga “Ngadto sa direktor sa Jedutun” (“sumala sa paagi sa [koro ni] Jedutun,” Ro ftn sa superskripsiyon sa Sal 39), samtang ang ikatulo (Sal 77) mabasa usab nga “Ngadto sa direktor sa Jedutun.” (NW; Ro; “diha sa,” AT) Sa matag usa niini nga pananglitan ang pagtagik sa salmo gipahinungod sa laing tawo, ang unang duha ngadto kang David ug ang ikatulo ngadto kang Asap; busa walay gipaila nga si Jedutun ang nagtagik niini, bisan tuod nga sa ubang mga teksto siya gitawag nga “bisyonaryo sa hari” ug giingon usab nga siya “nagapanagna uban sa mga alpa.” (2Cr 35:15; 1Cr 25:​1, 3) Busa, ang mga superskripsiyon niining tulo ka salmo dayag nga maoy mga instruksiyon sa ilang pagtugtog, tingali nagpaila sa usa ka estilo o sa usa ka tulonggon nga lagmit nalangkit kang Jedutun, o kaha giimbento, gisugdan paggamit, gimugna, o gihimo niyang popular o sa iyang mga anak pinaagi sa paggamit niini.

2. Usa ka Levihanon kansang anak nga lalaki o kaliwat, si Obed-edom, maoy usa ka magbalantay-sa-ganghaan sa panahon nga gipadala ni David ang Arka ngadto sa Jerusalem.​—1Cr 16:​1, 37, 38.