KUTSILYO

Usa o duhay-sulab nga galamiton nga ighihiwa. Ang mga kutsilyo nga gigamit kanhi sa kayutaan sa Bibliya maoy gama sa bato (ilabina sa santik), tumbaga, bronse, o puthaw.

Ang Hebreohanong termino nga ma·ʼakheʹleth, nga sa literal nagtumong sa usa ka kasangkapan alang sa pagpangaon, mapadapat usab sa dagkong mga kutsilyo o sundang sama niadtong gigamit sa paghiwa sa mga patayng lawas sa halad nga mga hayop. “Ang kutsilyo nga pang-ihaw” (Heb., ma·ʼakheʹleth) mao ang kasangkapan nga gidala sa matinumanong si Abraham sa dihang hapit nang ihalad si Isaac (Gen 22:​6, 10), ug ang samang matang sa kasangkapan maoy gigamit sa usa ka Levihanon sa paghiwahiwa sa patayng lawas sa iyang puyopuyo ngadto sa 12 ka piraso. (Huk 19:29) Lain pa, ang Proverbio 30:14 naghisgot sa “usa ka kaliwatan kansang mga ngipon maoy mga espada ug kansang mga bukog sa apapangig maoy mga kutsilyo nga pang-ihaw,” sa ingon naggamit sa mao rang Hebreohanong termino ingong larawan sa pagkamanunukob.

Ang “santik nga mga kutsilyo” gihimo ni Josue aron gamiton sa pagtuli sa mga anak nga lalaki sa Israel didto sa Gibeat-haaralot. (Jos 5:2-4) Ang bahin sa Hebreohanong termino alang niini nga mga kutsilyo maoy cheʹrev, nga sagad gihubad nga “espada.” (Itandi ang Jos 5:​2, ftn sa Rbi8.) Ang komon nga “Canaanhong” santik nga kutsilyo maoy mga 15 sm (6 pul.) ang gitas-on ug gipaugdo ang tunga ug nga duhay-sulab.

Ang mga eskriba ug mga sekretaryo sa karaang kapanahonan migamit ug usa ka matang sa kutsilyo sa pagpahait sa ilang mga pluma nga tangbo ug sa paghimog mga pagpanas. Ang Jeremias 36:23 naghisgot sa paggamit sa usa ka “kutsilyo sa sekretaryo” aron sa pagtabas sa usa ka linukot nga basahon nga gisulat ni Jeremias ubos sa pagtultol ni Jehova.

Daghan sa karaang mga kutsilyo nga tumbaga adunay tul-id nga sulab nga gikan sa 15 ngadto sa 25 sm (6 ngadto sa 10 pul.) ang gitas-on; ang uban nga kurbadog mga tumoy nadiskobrehan usab. Ang mga puloan sagad unay ra sa sulab. Ang ubang mga puloan maoy gama sa kahoy ug gipatapot sa sulab.

Mahulagwayong gihisgotan sa Proverbio 23:​1, 2 ang kutsilyo, nga nagrekomendar sa ‘pagdaitol ug kutsilyo sa tutonlan sa usa ka tawo’ sa dihang makigpangaon sa hari, nga dayag nga nagpasiugda sa panginahanglan sa pagpugong sa iyang gana sa pagkaon sa maong panahon.