MARKA

Taliwala sa mga dili-Israelinhon, ang mga hayop ug usab ang mga ulipon gimarkahan ingong timaan sa pagpanag-iya. Bahin sa mga tawo, ang maong marka sa pagpanag-iya ibutang diha sa daling makita nga bahin sa lawas, sama sa agtang. Ang mga magsisimba sa bakak nga mga diyos usahay magpaila sa ilang kaugalingon ingong magsisimba niana nga mga diyos pinaagi sa pagbutang ug marka sa ilang bathala diha sa ilang mga agtang. Apan, ang balaod ni Jehova sa Israel nagdili sa pagdaot sa lawas sa mga tawo pinaagig pagbutang ug mga patik. Kini maoy aron sa pagsanta sa bisan unsang idolatrosong mga buhat ug nagtudlo ug nahiangayng pagtahod sa linalang sa Diyos.​—Lev 19:28; tan-awa ang PATIK.

Mahulagwayong Paggamit. Gipunting sa Kasulatan ang mga marka nga gihimo diha sa mga tawo ug gihisgotan kini diha sa mahulagwayong diwa. Sa panan-awon ni Ezequiel ang usa ka tawo nga may tintiro sa sekretaryo gisugo sa paglakaw latas sa Jerusalem ug sa ‘pagbutang ug usa ka marka [Heb., taw] sa agtang sa mga tawo nga nagapanghupaw ug nagaagulo tungod sa tanang dulumtanang mga butang nga ginahimo sa taliwala niini.’ Kining ilang gibuhat nagpakita nga sila maoy mga tawong matarong, mga alagad ni Jehova, ug busa takos nga tipigang buhi sa panahon sa pagpahamtang ni Jehova sa paghukom. Ang mahulagwayong marka diha sa ilang agtang nagpamatuod niini nga kamatuoran.​—Eze 9; itandi ang Eze 9:​4, ftn sa Rbi8; 2Pe 2:6-8.

Sa laing bahin, sa panan-awon ni Juan ang mga tawo nga nakadawat sa marka (o, patik) sa mapintas nga mananap diha sa ilang agtang o sa ilang kamot maoy mga laglagonon. Ang marka diha sa ilang agtang dayag nga nagpaila kanila ingong mga magsisimba sa mapintas nga mananap ug busa maoy mga ulipon niini. Busa sila gipakita ingong mga magsusupak sa Diyos, tungod kay ang mapintas nga mananap nakadawat sa awtoridad niini gikan sa dragon, si Satanas nga Yawa. Ang marka diha sa kamot dayag nga nagkahulogan sa aktibong pagpaluyo sa mapintas nga mananap, sanglit ang kamot gamiton man sa pagpalampos sa buluhaton.​—Pin 13:​1, 2, 16-18; 14:​9, 10; 16:​1, 2; 20:4.

Tan-awa usab ang TIMAAN SA UTLANAN.