FENICE

[gikan sa lintunganayng pulong nga nagkahulogang “kahoyng palma”].

“Usa ka dunggoanan sa Creta.” (Buh 27:12) Ang sakayan nga kargahanag lugas nga gisakyan ni Pablo ingong usa ka binilanggo paingon sa Roma misulay sa paglawig gikan sa Maayong mga Dunggoanan paingon sa Fenice aron mopondo sa panahon sa tingtugnaw. Kay gikusokuso sa usa ka unos, kini nalunod didto sa pulo sa Malta.​—Buh 27:13–​28:1.

Mahitungod sa lokasyon sa Fenice, ang asoy sa Mga Buhat nag-ingon lamang nga kini diha sa K sa Maayong mga Dunggoanan, sa H nga kiliran sa Creta, ug nga hilwas didto nga mopondo sa panahon sa tingtugnaw. Busa duha ka dapit ang gisugyot. Ang usa mao ang Loutro sa S nga kiliran sa usa ka punta, mga 65 km (40 mi) sa K sa Maayong mga Dunggoanan, ug ang lain mao ang Phineka, sa pikas nga kiliran niini nga punta. Ang literal nga Gregong teksto naghubit sa dunggoanan sa Fenice ingong “nagtan-aw sa ubos [ka·taʹ] sa habagatan-kasadpang hangin ug sa ubos [ka·taʹ] sa amihanan-kasadpang hangin.” Gisabot kini sa mga eskolar nga mipabor sa Loutro nga nagkahulogang pagtan-aw “paingon” o “ngadto” (ka·taʹ) sa direksiyon diin nagahuros ang HK ug AK nga hangin. (Buh 27:​12, ftn sa Rbi8) Tungod niini nga pagsabot, ang dunggoanan giingong bukas ‘paingon sa AS ug sa HS’ (RS, NW), usa ka kahubitan nga mohaom sa dakong agianan nga pormag katunga sa sirkulo pasulod sa dunggoanan sa Loutro. Tungod sa porma niini, ang Phineka wala karon gamita ingong dunggoanan, bisan tuod ang kausaban sa kasikbit nga mga dapit nakaapekto sa porma niini. Apan, ang Phineka may duha ka gagmay nga mga luok, ang usa nag-atubang sa HK ug ang lain sa AK. Busa, gisabot niadtong mipabor niining dapita nga ang ekspresyong “nagtan-aw sa ubos” nagkahulogang nag-atubang sa direksiyon diin ang hangin naggikan imbes nga sa dapit diin kini mohuros.