PAGDAYEG

Usa ka pagpahayag ug komendasyon, pagpabili, ug usab pagsimba kon kini nga pagdayeg gitumong ngadto sa Diyos. Ang Hebreohanong berbo nga ha·lalʹ ug ang Gregong ai·neʹo gihubad nga “pagdayeg.” (Sal 113:1; Isa 38:18; Rom 15:11; tan-awa ang HALLEL; ALELUYA.) Ang Gregong nombre nga hyʹmnos, nga maoy gigikanan sa pulong nga “himno,” nagpasabot sa pagdayeg o sa usa ka awit sa pagdayeg nga gitumong ngadto sa Diyos.​—Mar 14:​26, ftn sa Rbi8.

Ang pagdayeg sa ngalan sa Diyos maoy pagdayeg sa Labing Hataas mismo. (Sal 69:30) Takos siya sa kinalabwang pagdayeg kay siya “maayo,” o ang kinalabwan sa moral nga kahamili, ang Maglalalang, ang Magtatabang niadtong anaa sa kasakitan, ang Tigsustento ug Manluluwas sa iyang katawhan. (Sal 135:3; 150:2; 1Cr 16:​25, 26) Dili gayod niya ipaambit kini nga pagdayeg ngadto sa walay kinabuhi nga mga larawan nga dili makataganag tabang sa ilang mga magsisimba.​—Isa 42:8.

Ang pagdayeg adunay hinungdanong dapit diha sa pagsimba sa Israel kang Jehova. Tungod kay bug-os nga nahupong sa pagdayeg, ang Labing Gamhanan gihisgotan “nga nagapuyo sa mga pagdayeg sa Israel.” (Sal 22:3) Si Haring David mao ang nag-organisar sa mga saserdote ug sa mga Levihanon aron dayegon si Jehova pinaagig awit ug honi sa tulonggon. Ang organisadong kahikayan nga gisugdan ni David nagpadayon diha sa templo nga gitukod ni Solomon, ug sa daghang katuigan human niadto ang mga saserdote ug mga Levihanon nanguna sa paghatag ug pagdayeg, nga naggamit ug inspiradong mga komposisyon nga napreserbar hangtod karong adlawa diha sa basahon sa Mga Salmo.​—1Cr 16:4-6; 23:2-5; 2Cr 8:14; tan-awa ang MUSIKA.

Wala tugoti sa matinumanong mga alagad ni Jehova nga may makabalda sa ilang paghatag ug pagdayeg nga niana si Jehova may bug-os nga katungod. Ang manalagnang si Daniel wala mohunong sa pagdayeg kang Jehova sa dihang gimando nga kini supak sa balaod ug ang tawo nga mobuhat niini pagasilotan pinaagi sa pagtambog ngadto sa langob sa mga leyon. (Dan 6:7-10) Si Jesu-Kristo, pinaagi sa dili pagbuhat ug bisan unsa nga naggikan ra sa iyang kaugalingong pagbuot, nagpasundayag sa kinalabwang panig-ingnan sa pagdayeg sa iyang Amahan. Ang tibuok kinabuhi ug ministeryo sa Anak sa Diyos, lakip ang mga milagro nga iyang gihimo, nagdalag kadayeganan sa iyang Amahan.​—Luc 18:43; Ju 7:​17, 18.

Taliwala sa unang-siglong mga Kristohanon, ang inspiradong mga salmo padayong gigamit sa pagdayeg kang Jehova. Dugang pa, mopatim-aw nga dihay Kristohanong mga komposisyon​—“mga pagdayeg sa Diyos,” o mga himno, ug “espirituwal nga mga awit,” o mga awit nga may kalabotan sa espirituwal nga mga butang. (Efe 5:19; Col 3:16) Apan, ang Kristohanong pagdayeg dili lamang pinaagi sa mga awit. Kini mapakita sa pagkinabuhi sa usa ka tawo ug sa aktibong kabalaka sa usa ka tawo alang sa espirituwal ug materyal nga kaayohan sa uban.​—Heb 13:​15, 16.

Pagdayeg nga Ihatag Ngadto sa mga Tawo. Ang pagdayeg sa kaugalingon maoy ebidensiya sa garbo ug dili makapalig-on sa mga nakapaminaw. Kini dili mahigugmaon tungod kay gibayaw niini ang kaugalingon ibabaw sa uban. (1Co 13:4) Kon aduna may pagdayeg, kinahanglang kini kinabubut-ong magagikan sa dili-mapihigong mga nakapaniid nga walay gidahom nga mabatonan tungod sa ilang paghatag ug komendasyon.​—Pr 27:2.

Bisan tuod maggikan sa uban, sa gihapon ang pagdayeg mahimong usa ka pagsulay sa makadawat niini. Lagmit nga kini makaaghat sa mga pagbati sa pagkalabaw o garbo ug busa mosangpot sa pagkapukan sa usa ka tawo. Apan kon dawaton uban ang hustong tinamdan, ang pagdayeg lagmit nga makaayo sa indibiduwal. Tingali mapaubsanon niyang maila ang iyang pagkautangan kang Jehova nga Diyos ug madasig sa paggawi sa paaging dili magkulang sa iyang dalayegong moral nga baroganan. Ang inspiradong proverbio nagpunting sa ikahatag nga epekto sa pagdayeg aron madayag kon unsa gayod ang usa ka tawo: “Ang dalisayanan nga kulon maoy alang sa plata, ug ang hudno alang sa bulawan; ug ang usa ka tawo pagalunsayon sumala sa pagdayeg kaniya.”​—Pr 27:21; itandi ang NE.

Wala nay mas dakong pagdayeg o komendasyon nga madawat ni bisan kinsang tawo kay sa ilhon ingong inuyonan sa Diyos. Ang maong pagdayeg igahatag panahon sa pagpadayag ni Ginoong Jesu-Kristo diha sa himaya. (1Co 4:5; 1Pe 1:7) Kini nga pagdayeg maoy pinasukad, dili sa unodnong kadungganan, kondili pinasukad sa pagkinabuhi sa usa ka tawo sa paagi nga takos ingong usa ka alagad ni Jehova. (Rom 2:​28, 29; tan-awa ang HUDIYO.) Sa kasamtangan, ang mga tawo nga may hataas nga katungdanan sa kagamhanan ug ang uban pa tingali modayeg sa matuod nga mga Kristohanon tungod sa ilang pagkamasinundanon sa balaod ug sa pagkatul-id. (Rom 13:3) Sa dihang madayag sa mga tigpaniid nga ang hinungdan sa maayong panggawi sa mga Kristohanon maoy tungod kay sila debotadong mga alagad ni Jehova, ang pagdayeg mahiadto kang Jehova ug sa iyang Anak, sanglit sila ila mang maunongon nga mga tinun-an.