PRISCA

[Tigulang nga Babaye]; PRISCILA [Gamayng Tigulang nga Babaye].

Ang mubo nga porma sa ngalan makaplagan sa mga sinulat ni Pablo ug ang taas nga porma makaplagan sa mga sinulat ni Lucas. Ang maong kalainan maoy komon sa Romanhong mga ngalan.

Si Priscila mao ang asawa ni Aquila, kinsa kanunayng gihisgotan uban kaniya. Ang duha nagpakitag maayong Kristohanong mga buhat ug pagkamaabiabihon dili lamang ngadto sa mga indibiduwal kondili usab ngadto sa kongregasyon pinaagi sa paghimo sa mga panagkatigom sa kongregasyon diha sa ilang balay didto sa Roma ug maingon man sa Efeso.

Tungod sa dekreto ni Emperador Claudio, si Aquila ug ang iyang asawa mibiya sa Roma ug miadto sa Corinto sa mga 50 K.P. Wala madugay human sa ilang pag-abot, si Pablo miduyog kanila sa pagpanghimo ug tolda. (Buh 18:​2, 3) Sila mipanaw uban kang Pablo ngadto sa Efeso, nagpabilin didto sa taudtaod nga panahon, ug dakog gikatabang sa ‘pagpatin-aw sa dalan sa Diyos sa hustong paagi’ ngadto sa larinong-manulti nga si Apolos. (Buh 18:​18, 19, 24-28; 1Co 16:19) Mipauli sa Roma sulod sa usa ka panahon (Rom 16:3-5), sila sa ulahi mibalik sa pagpanaw ngadto sa Efeso. (2Ti 4:19; 1Ti 1:3) Ang ilang personal nga pakig-uban kang Pablo nagpadayon gikan sa mga 50 K.P. hangtod sa kamatayon ni Pablo, mga 15 ka tuig sa ulahi, nga sa panahon niini nga pagpakig-uban sila “nagpameligro sa ilang mga liog” alang sa kalag sa apostol.​—Rom 16:​3, 4; tan-awa ang AQUILA.