RODAS

[Rosas].

Usa ka pulo atbang sa HK nga kiliran sa Turkey ug usa sa kinadak-ang pulo sa Dagat Aegean, nga mga 75 km ang gitas-on por 35 km ang gilapdon (47 por 22 mi). Ang kaulohang siyudad niini gitawag usab ug Rodas. Ang barko nga gisakyan ni Pablo naggikan sa Cos paingon sa Rodas sa talitapos na ang ikatulong misyonaryong panaw sa apostol niadtong mga 56 K.P.​—Buh 21:1.

Ang Rodas, tungod kay maayo ang nahimutangan ug ang mga dunggoanan niini, nailado ingong sentro sa patigayon sa sayong bahin sa kasaysayan niini. Apan sa ulahi, mopatim-awng ang siyudad sa Rodas mas nailado ingong sentro sa kultura.

Ang Colossus sa Rodas, usa ka bronse nga estatwa sa diyos-adlaw nga si Helios, nagbarog duol sa dunggoanan sa siyudad sa Rodas. Giisip kini nga usa sa “pito ka katingalahan” sa karaang kalibotan ug gikaingon nga kini maoy mga 70 ka maniko (31 m; 102 p) ang gihabogon. Bisan tuod kini wala na magbarog sa panahon ni Pablo, kay napukan tungod sa usa ka linog niadtong ikatulong siglo W.K.P., dihay dagkong nahibiling mga bahin sa Colossus ang naglungtad pa gihapon hangtod sa Komong Panahon. Dili mapamatud-an ang ideya nga ang estatwa nagbila diha sa entrada sa dunggoanan ug ang mga barko moagi sa taliwala sa mga bitiis niini.