RIMON

[Kahoyng Granada].

1. Ang Benjaminhong amahan ni Baana ug Rekab, ang mga mamumuno sa anak nga lalaki ni Saul nga si Is-boset; gikan sa Beerot sa A sa Gibea.​—2Sa 4:​2, 5-7, 9.

2. Usa ka siyudad sa tribo ni Simeon diha sa dapit nga gilibotan sa tribo ni Juda. (Jos 19:​1, 2, 7; “Remmon,” KJ) Kini gitala sunod sa siyudad sa Ain, ug mopatim-aw nga ang En-rimon sa Nehemias 11:29 maoy usa ka kombinasyon nga gigamit sa pagtumong sa kaluha nga siyudad. Gihisgotan kini ingong usa ka habagatang dapit diha sa Zacarias 14:10. Ang mga kagun-oban sa usa ka dapit nga gitawag ug Khirbet Umm er-Ramamin (Horvat Remalya), mga 15 km (9 mi) sa A sa Beer-seba, gituohan nga mao ang kanhing nahimutangan.

3. Usa ka Levihanong sakop nga siyudad sa banay ni Merari sa S nga utlanan sa yuta sa Zabulon (Jos 19:​10, 13); lagmit mao ang gitawag ug “Dimna” sa Josue 21:35 ug “Rimono” sa 1 Cronicas 6:77. Gituohan nga mao kini ang Rummana (Rimon), mga 10 km (6 mi) sa A sa Nasaret.

4. Usa ka nagbuntaog nga dakong bato nga ngadto niini midangop ang 600 ka tawo sa tribo ni Benjamin ingong mga nakalingkawas sa gubat duol sa Gibea, diin ang tibuok Israel mitindog batok sa mga Benjaminhon aron ipanimalos ang paglugos ug pagbuno sa puyopuyo sa usa ka Levihanon. (Huk 20:45-47) Sila nagpabilin didto hangtod nga sila giadto sa mga sinugo alang sa pakigdait. (Huk 21:13) Ang kanhing salipdanan nga nahimutang mga 6 km (3.5 mi) sa S sa Bethel ug 18 km (11 mi) sa AAS sa Jerusalem, nailhan karong adlawa nga Rammun, diin nahimutang ang usa ka gamayng balangay. Adunay anapog nga bukid didto nga pormag-kono (cone), diin protektado ang tulo ka kilid niini sa mga lugot ug adunay daghang langob.

5. Usa ka diyos sa Sirya. Ang Siryanhong pangulo sa kasundalohan nga si Naaman, human mamaayo sa iyang sanla, miila kang Jehova ingong ang matuod nga Diyos apan mibatig kabalaka nga kinahanglan niyang ubanan ang hari sa Sirya ngadto sa templo ni Rimon ug didto moyukbo uban sa hari atubangan sa imahen ni Rimon, samtang ang hari manukod sa bukton ni Naaman.​—2Ha 5:15-18.

Si Rimon gituohan sa kadaghanan nga mao si Ramman (nagkahulogang “Nagpangulob, Nagpadalugdog”), usa ka diyos nga nailhang gisimba didto sa Asirya ug Babilonya. Gituohan nga ang pagsimba kang Rimon (Ramman) gidala pakasadpan gikan sa Asirya pinaagi sa pipila ka tribo nga sa ulahi nanimuyo palibot sa Damasco. Giisip sa daghang eskolar nga ang Rimon (Ramman) maoy usa lamang ka titulo sa diyos-bagyo nga si Hadad (Adad). Tungod kay ang Tabrimon ug Ben-hadad maoy mga ngalan sa Siryanhong mga hari, adunay pasukaranan nga si Rimon isipon nga mao si Hadad, sanglit kining mga haria lagmit nagbaton sa ngalan o titulo sa ilang pangunang diyos.​—1Ha 15:18.

Ang Rimon nga gisimba sa Sirya walay duhaduha nga susama kaayo kang Ramman. Alang sa mga Asiryanhon, si Ramman sa panguna maoy diyos sa bagyo ug dalugdog. Bisan tuod giisip nga mao ang maghahatag sa ulan ug busa ang tigtagana ug tubig alang sa mga atabay ug kaumahan, si Ramman mas iladong gilangkit sa malaglagong mga kinaiyahan sa ulan ug kilat. Sa Asiryanhong mga monyumento si Ramman sublisubli nga gipakita ingong usa ka diyos sa gubat. Ingon usab niana ang pag-isip kaniya didto sa Babilonya, diin si Ramman, ang diyos-bulan nga si Sin, ug ang diyos-adlaw nga si Shamash naglangkob sa usa sa daghang mga triad.