SAGRADONG PAG-ALAGAD

Ministeryo o buluhaton nga sagrado, nga direktang nalangkit sa pagsimba sa usa ka tawo ngadto sa Diyos.

Ang Hebreohanong termino nga ʽa·vadhʹ sa paninugdan nagkahulogang “magaalagad” (Gen 14:4; 15:13; 29:15) o “maghago” (Ex 34:21) ug gihubad usab nga “magtikad.” (Gen 4:12; Deu 28:39) Sa dihang gigamit maylabot sa pag-alagad kang Jehova o sa bakak nga mga bathala, ang ʽa·vadhʹ nagpasabot ug pagsimba, o sagradong pag-alagad. (Ex 10:26; Deu 11:16) Sa susama, ang Gregong berbo nga la·treuʹo nagpasabot ug pag-alagad. Kini gigamit may kalabotan sa pag-alagad sa Diyos (Mat 4:10; Luc 1:74; 2:37; 4:8; Buh 7:7; Rom 1:9; Flp 3:3; 2Ti 1:3; Heb 9:14; 12:28; Pin 7:15; 22:3), ingon sa gihimo didto sa sangtuwaryo o templo (Heb 8:5; 9:9; 10:2; 13:10), ug usab may kalabotan sa bakak nga pagsimba, nga nag-alagad sa linalang nga mga butang. (Buh 7:42; Rom 1:25) Sa Kristohanon Gregong Kasulatan ang nombre nga la·treiʹa makita lamang nga gigamit may kalabotan sa pag-alagad sa Diyos. (Ju 16:2; Rom 9:4; 12:1; Heb 9:​1, 6) Kini lahi sa Gregong di·a·ko·niʹa, nga nagkahulogan usab nga “ministeryo, pag-alagad,” apan gigamit may kalabotan sa komon, ordinaryo, kalibotanong mga butang​—mga butang nga dili sagrado.

Ang bugtong Usa nga angayng simbahon, o hatagan ug sagradong pag-alagad mao lamang si Jehova nga Diyos. (Mat 4:10; Luc 4:8) Tungod kay sila nailalom sa linaing pakigsaad uban kang Jehova nga Diyos, mahuptan unta sa mga Hudiyo ang pribilehiyo sa paghatag ug sagradong pag-alagad ingong inanak-sa-espiritung mga anak sa Diyos ug mga membro sa “usa ka harianong pagkasaserdote.” Apan ang kadaghanan kanila nawad-an niini tungod kay sila napakyas sa pagpasundayag ug pagtuo kang Kristo Jesus. (Rom 9:3-5, 30-33; 1Pe 2:4-10) Sama sa Pariseo nga si Saulo sa wala pa siya mahimong Kristohanon, daghan ang naghunahuna nga sila naghatag gayod ug sagradong pag-alagad sa Diyos pinaagi sa paglutos sa mga sumusunod ni Kristo.​—Ju 16:2; Buh 26:9-11; Gal 1:​13, 14.