SALUM

[gikan sa lintunganayng pulong nga nagkahulogang “nakigdait; nagbayad; nagbalos”].

1. Kataposang ginganlan nga anak nga lalaki ni Neptali. (1Cr 7:13) Silem ang espeling niini diha sa ubang mga teksto.​—Gen 46:24; Num 26:49; tan-awa ang SILEM.

2. Anak nga lalaki ni Shaul, apo ni Simeon, ug amahan ni Mibsam.​—1Cr 4:​24, 25.

3. Anak nga lalaki ni Sismai ug amahan ni Jekamias sa dibisyon ni Jerameel diha sa talaan sa kagikan sa Juda.​—1Cr 2:​4, 5, 9, 25, 40, 41.

4. Usa ka pangulong magbalantay-sa-ganghaan sa sangtuwaryo nga sa usa ka higayon gipuwesto sa ganghaan sa hari dapit sa S; usa ka kaliwat ni Kore. Bisan tuod nga kining ngalana kasagarang makita diha sa mga talaan niadtong mibalik gikan sa Babilonya ug mipuyo sa Jerusalem (1Cr 9:2, 3, 17-19, 31, 34; Esd 2:​1, 42; Neh 7:45), ang mga paghisgot sama sa “lawak-kan-anan ni Maaseias nga anak nga lalaki ni Salum nga magbalantay sa pultahan” sa panahon ni Jeremias (Jer 35:4) hayan magpaila nga ang ngalan nga makita diha sa mga talaan human sa pagkadestiyero nagtumong sa usa ka balay sa amahan, o banay, sa mga magbalantay-sa-ganghaan nga naggikan sa mas nauna nga Salum. Ikahatag ang dugang kalig-onan nga kini tinuod kon siya mao ra usab ang Selemias ug Meselemias nga gihisgotan sa 1 Cronicas 26:​1, 2, 9, 14 ingong ang magbalantay-sa-ganghaan sa S sa sangtuwaryo sa panahon sa paghari ni David.

5. Ikanapulog-unom nga hari sa napulo-ka-tribong gingharian; anak nga lalaki ni Jabes. Sa usa ka panagkunsabo, gipatay ni Salum si Zacarias, ang kataposan sa nagamandong mga kaliwat ni Jehu, ug siya nahimong hari sa Samaria sulod sa usa ka lunar nga bulan niadtong mga 791 W.K.P., apan siya gibuno ni Menahem.​—2Ha 15:​8, 10-15.

6. Usa ka Epraimnon kansang anak nga lalaki nga si Jehizkias maoy usa sa mga pangulo sa tribo nga misupak sa pagbihag sa ilang mga igsoon gikan sa Juda.​—2Cr 28:​12, 13.

7. Usa ka kaliwat ni Aaron sa linya sa hataas nga pagkasaserdote. Ang anak nga lalaki o kaliwat ni Salum nga si Hilkias nag-alagad ingong saserdote sa panahon sa paghari ni Josias. (1Cr 6:​12, 13; 2Cr 34:9) Si Esdras usab naggikan kaniya. (Esd 7:​1, 2) Siya gitawag ug Mesulam sa ubang mga teksto.​—1Cr 9:11; Neh 11:11; tan-awa ang MESULAM Num. 4.

8. Bana ni Hulda, ang babayeng manalagna nga giduaw sa delegasyon ni Haring Josias; anak nga lalaki ni Tikva. Siya lagmit “ang tig-atiman sa mga besti” sa mga saserdote o sa hari. (2Ha 22:14; 2Cr 34:22) Lagmit mao ra usab ang Num. 10.

9. Usa ka anak nga lalaki ni Josias; hari sa Juda sulod sa tulo ka bulan sa wala pa idestiyero ni Paraon Neko. (1Cr 3:15; 2Ha 23:30-34; Jer 22:​11, 12) Siya gitawag ug Jehoahaz sa ubang mga teksto.​—Tan-awa ang JEHOAHAZ Num. 3.

10. Uyoan ni Jeremias sa amahan. Niadtong 608 W.K.P. gipalit ni Jeremias ang usa ka uma nga gikan sa anak nga lalaki ni Salum nga si Hanamel. (Jer 32:​1, 7-9) Pinasukad sa yugto sa panahon mahimong ikaingon nga siya mao ra usab ang Num. 8.

11. Usa sa mga magbalantay-sa-ganghaan nga miuyon sa pagpapahawa sa ilang langyawng mga asawa ug mga anak human mobalik si Esdras sa Jerusalem. (Esd 10:​24, 44) Lagmit paryente siya sa Num. 4.

12. Usa sa mga anak nga lalaki ni Binui nga nagpapahawa usab sa ilang langyawng mga asawa ug mga anak.​—Esd 10:​38-42, 44.

13. Usa ka prinsipe sa katunga nga distrito sa Jerusalem nga miduyog sa buluhatong pagpang-ayo sa paril sa Jerusalem uban sa iyang mga anak nga babaye; usa ka anak o kaliwat ni Halohes.​—Neh 3:12.