TAMBORIN

Usa ka tulonggon nga motingog pinaagig pagbasal nga gigamit sukad pa sa kapanahonan sa mga patriarka. Ang Hebreohanong pulong nga toph gihubad usab nga “tambor” ug “tambol.” (Gen 31:​27, MBB, NCV, AS) Kining tanang hubad dayag nga naghubit sa samang tulonggon​—usa ka gamayng tambol nga gama sa panit sa hayop nga giinat nganha sa usa o duha ka kilid diha sa usa ka bayanan nga kahoy o metal, lagmit mga 25 sm (10 pul.) ang diyametro. Tungod kay gigamit sa masadyaong mga okasyon, ang pipila ka modelo lagmit adunay mga bahin nga metal, tingali samag mga tilingtiling, nga gipatapot diha sa mga kilid ug mahimong patingogon sama sa modernong tamborin. Ang ubang klase lagmit mas susamag dagway ug gamit sa usa ka tom-tom, nga basalon pinaagi sa duha ka kamot.

Bisan tuod ang tamborin wala hisgoti maylabot sa pagsimba sa templo, gigamit kini sa mga lalaki ug mga babaye sa pagdayeg kang Jehova ug sa ubang malipayong mga okasyon sama sa mga kombira ug mga kasal. (1Sa 10:5; 2Sa 6:5; Sal 150:4; Isa 5:12) Ang mga babaye ilabinang magduyog sa ilang kaugalingon pinaagig mga tamborin diha sa pag-awit ug pagsayaw. (Ex 15:20; Huk 11:34; 1Sa 18:6) Ang tamborin gilangkit usab sa umalabot nga kasadya sa Israel sa dihang moabot na ang pagpasig-uli kaniya.​—Jer 31:4.