Mga Pangutana Gikan sa mga Magbabasa

◼ Unsa “ang binhi sa Diyos” nga gihisgotan sa Malaquias 2:15?

Kining malisod nga bersikulo sa usa ka bahin, mabasa: “Ug dihay usa nga wala mohimo niana, bisan nga may nabilin pang espiritu diha kaniya. Ug unsay gipangita nianang usa? Ang binhi sa Diyos.” “Ang binhi” hayan nagpunting sa nasod sa karaang Israel, diin niadtong panahona nga gisulat ang bersikulo nameligrong matakdan sa kahugawan sa relihiyon.

Si Malaquias nanagna sa panahon nga nadunot ang moralidad sa nasod. Ang ubang mga lalaking Israelinhon dili lamang ‘nangasawa sa mga anak nga babaye sa diyos nga dumuloong’ kondili nakigbulag sa ilang kaugalingong asawang mga Hudiyo, ang ‘mga asawa sa ilang pagkabatan-on,’ aron tingali sa pagkuhag mas batan-on paganong mga asawa. Bisan pa, dili tanan sa mga lalaking Israelinhon mihimo niining “dulumtanang butang.” (Malaquias 2:11, 13, 14; Deuteronomio 7:3, 4) Tingali nagpunting sa mga indibiduwal nga misupak sa pagbungkag sa ilang pakigtugon sa kaminyoon uban sa isigkamasisimba ni Jehova, si Malaquias misulat: “Ug dihay usa nga wala mohimo niana, bisan nga may nabilin pang espiritu diha kaniya.”

Ang “espiritu” mao ang balaang espiritu sa Diyos, nga iyang gibubo diha sa nasod. Apan, ang masinupakong mga Israelinhon, misukol, ug busa gipasubo, kadtong espirituha. (Isaias 63:10; Buhat 7:51-53; itandi sa Efeso 4:30.) Ang ubang indibiduwal nga mga Hudiyo maunongon sa mga kasugoan sa Diyos, ug pinaagi sa ilang pagkamasundanon ilang nahuptan kanang “nabilin nga espiritu.” Kining matinumanong mga magsisimba wala mangita sa ilang kaugalingong mahakugong kalipay. Mahitungod niining mga tawhana, si Malaquias misulat: “Unsay gipangita nianang usa? Ang binhi sa Diyos.” Kining “binhi” mao ang nasod sa karaang Israel, diin si Malaquias miingon nga ‘gilalang sa Diyos.’ Kining ‘paglalang’ nahitabo dihang gidala ni Jehova ang mga Israelinhon ngadto sa pakigtugon uban kaniya diha sa Bukid sa Sinai, nga nagpahimo kanilang iyang “linain nga kabtangan” ug “usa ka nasod nga balaan.” Ang tinuod nga “binhi” ni Abraham nga magapanalangin sa katawhan sa tibuok yuta moabot pinaagi niining nasora.​—Malaquias 2:10; Exodo 19:5, 6; Genesis 22:18.

Apan, kinahanglang magpabiling putli sa relihiyon ang mga Israelinhon pinaagi sa dili pagpakigminyo niadtong dili magsisimba ni Jehova. Ang pagkadili-diyosnon niadtong mga tawhana makadunot, sumala sa nakita gikan sa kahimtang sa panahon ni Esdras. Ang mga Israelinhon niadtong panahona “midawat sa pila sa mga anak nga babaye sa [kanait nga mga nasod] alang sa ilang kaugalingon ug sa ilang mga anak nga lalaki; ug sila, ang balaang binhi, nasagol uban sa katawhan sa kanasoran.” (Esdras 9:2) Kining samang “dakong pagkadaotan” nahitabo usab sa mga adlaw ni Nehemias, nga katalirongan ni Malaquias. Ang Hudiyohanong mga lalaki nga maunongon sa Diyos nakakita sa dayag nga espirituwal nga katalagman sa ilang kaugalingon ug sa mga anak nga nangatawo sa maong paghiusa. Dihay kapeligrohan nga mapalayo sila gikan sa pagsimba kang Jehova pinaagi sa usa ka asawa nga dili debotado Kaniya. Mitaho gani ni Nehemias nga taliwala niadtong mga Hudiyo nga nangasawa sa mga babaye sa ubang nasod, ‘walay usa sa ilang mga anak makasulti sa sinultihang Hudiyohanon.’​—Nehemias 13:23-27.

Ang dili-maunongong mga Hudiyo nangita sa ilang kaugalingong kalipay nga wala magsapayan sa makadaot nga epekto diha sa relihiyon sa ilang nasod, “ang binhi sa Diyos.” Dili ikahibulong nga mitambag si Malaquias: “Busa magbantay kamo sa inyong espiritu, ug ayaw itugot nga adunay usa nga magluib batok sa inyong mga asawa sa pagkabatan-on”! (Malaquias 2:15) Gibantayan sa matinumanong mga Hudiyo ang ilang espiritu, o tinamdan, aron makapabiling maunongon sa ilang Hudiyohanong mga asawa. Gipabilhan ug dako niining mga tawhana ang relihiyosong kaputli sa ilang “nasod nga balaan.” Ilang gitinguha nga mabasa sa ilang mga anak ang Pulong sa Diyos ug modako nga nagahigugma kang Jehova, nagadugang sa relihiyosong kalig-on sa nasod.

Ang dedikadong mga Kristohanon karon angay magbantay sa samang kakugi sa ilang espiritu, o nangibabawng tinamdan. Kon minyo, kinahanglang likayan ning mga tawhana nga dili diborsiyohan o bulagan ang ilang mga asawa sa maluibong paagi. Ug angay sundon sa dili-minyong mga Kristohanon ang tambag ni apostol Pablo sa pagminyo “diha lamang sa Ginoo,” mosulod sa kaminyoon diha lamang sa dedikado, bawtismadong saksi ni Jehova.​—1 Corinto 7:39.