Makahinumdom Ka Ba?

Imo bang nakita ang dili pa dugayng mga gula sa Ang Bantayanang Torre nga may praktikal nga bili kanimo? Nan nganong dili usisaon ang imong panumdoman uban ang mosunod:

◻ Nganong maayong sulondan alang sa mga batan-on si Timoteo nga pagasundon?

Gisakripisyo ni Timoteo ang gitawag nga normal nga kinabuhi sa balay aron mahimong usa ka kasaligan, matinumanong kauban ni Pablo. Siya nagpabilin kang Pablo sa lisod ug sa haruhayng kahimtang, mitabang kaniya sa buluhatong pagsangyaw ug andam sa pag-alagad bisan asa ipadala. (Filipos 2:19, 20)​—8/15, panid 14.

◻ Unsay mga kuwalipikasyon alang sa bawtismo?

Ang kandidato sa bawtismo kinahanglang makasabot kon unsa ang nalangkit. Kinahanglang tinguha gayod niyang moalagad kang Jehova tungod kay iyang gihigugma Siya. Iyang ipakita kini pinaagi sa pagsunod sa moral nga mga kinahanglanon sa Diyos ug sa pagpaambit sa iyang pagtuo ngadto sa uban. Lain pa siya kinahanglang maghimog personal nga dedikasyon kang Jehova diha sa pag-ampo.​—8/15, panid 16.

◻ Nganong daotan ang pag-usisa sa espiritismo?

Ang pag-usisa sa espiritismo motumbas sa paghigugma sa gidumtan ni Jehova. (Proverbio 6:16-19) Kini nahisama sa pagsalikway kang Jehova ug sa pagdapig sa labawng kaaway sa Diyos ug sa iyang mga katabang.​—9/1, panid 5.

◻ Unsa ang “basahon sa handumanan” nga gihisgotan sa Malaquias 3:16?

Gikan sa panahon ni Abel paunahan, ang Diyos nagmatikod, nga daw nagsulat diha sa usa ka basahon, niadtong anaa sa kalibotan sa katawhang pagaluwason nga hinumdoman kon bahin sa kinabuhing walay kataposan. Kining “basahon sa handumanan” sama ra gihapon sa “basahon sa kinabuhi” ug sa “linukot nga basahon sa kinabuhi.” (Pinadayag 3:5; 17:8; Mateo 23:35)​—9/1, panid 29.

◻ Unsay nakahimo sa tinuod nga higala nga bililhon?

Makadangop ka kanunay sa tinuod nga higala alang sa tabang, tambag, pahalipay, ug mainit nga pag-ubanay.​—9/15, panid 3, 4.

◻ Unsa ang makapatayng “hangin” niining kalibotana?

Kini mao ang katibuk-ang espiritu, o nangibabawng tinamdan sa kahakog ug pagkamasukihon, nga gipakita sa mga tawo nga nahibulag sa Diyos. (Efeso 2:2; 1 Corinto 2:12)​—9/15, panid 11.

◻ Aron ang relihiyon may praktikal nga bili unsay atong kinahanglang buhaton?

Kinahanglang kini mamungag maayong bunga. Kinahanglang ipatungha niini ang mas maayong mga tawo. Kinahanglang makapatin-aw kini nganong ang kahimtang sa yuta karong adlawa maoy ingon niini. Ug angay nga isilsil niini ang seguradong paglaom sa umaabot diha sa mga hunahuna ug sa kasingkasing sa mga tawo. (Mateo 7:17-20)​—10/1, panid 7.

◻ Napakyas ang Repormasyon sa pagbuhat sa unsa?

Ang unang mga repormador nangandoy sa pagbalik sa mga sukdanan sa Bibliya, ngadto sa mga sukdanan sa putli nga Kristiyanidad. Wala gayod makab-ot kining pangandoya. Sa paglabay sa panahon, ang paninugdang mga doktrina sa Protestanteng mga iglesya, kon kaha nasodnong simbahan o dili, sa malangkobon mipahiuyon sa Romano Katolikong Iglesya.​—10/1, panid 25.

◻ Unsay miagak sa dili maayong hukom sa Diyos kang Moises ug Aaron human sa hitabo sa Kadesh-barnea?

Ang Salmo 106:32, 33 naghatag kanatog katin-awan niining hitaboa, nga nagpakita nga milihok si Moises tungod sa nasakit nga espiritu nga siya ‘namulong sa dili angay sa iyang mga ngabil.’ Sa masuk-anong mga pulong, iyang gibayaw ang iyang kaugalingon ug si Aaron inay si Jehova, nga mao gayod ang naghatag sa tubig sa milagrosong paagi. Niining paagiha napakyas si Moises sa ‘pagbalaan sa Diyos sa atubangan sa mga mata sa katawhan.’ (Numeros 27:12-14)​—10/15, panid 31.

◻ Unsang hataas nga katuyoan ang gialagaran sa Kasugoan sa Diyos nga gihatag sa Israel?

Ang Kasugoan gihatag sa Israel aron sa pagtipig sa nasod nga hinlo sa pisikal, sa espirituwal, sa mental, ug sa moral nga paagi.​—11/1, panid 12.

◻ Unsa ang pila ka tabang sa paghupot sa maputling pagkadili-minyo?

Pag-ampo kanunay alang sa espiritu sa Diyos ug sa iyang tabang sa pagpakita sa mga bunga niini. Palandonga kanunay ug ipadapat ang tambag sa Pulong sa Diyos. Likayi ang pornograpiya ug imoral nga kalingawan. Pagbantay sa imong mga kaubanan. Likayi ang tanang mahugawng sinultihan ug malaw-ayng panistis.​—11/15, panid 20.

◻ Unsang dakong kalainan ang makita tali sa mga tambal nga gitaho diha sa Bibliya ug niadtong gitaho sa pagpanambal pinasukad sa pagtuo karon?

Si Jesus ug ang iyang mga disipulo wala gayod mangayo ug bayad sa ilang pagpanambal. Ang pagpanambal nga gihimo sa panahon sa Bibliya dihadiha o gihimo sa mubong panahon lamang.​—12/1, panid 4, 5.

◻ Unsa ang pila ka mga kaayohan sa pag-awit sa makusog diha sa tinuod nga pagsimba?

Ang atong personal nga paglangkit sa publikong pagsimba mas molig-on pa. Ang pag-awit mohatag ug maayong pamatuod sa mga bag-ohan. Labing hinungdanon, mas dakong pagdayeg ang mahatag ngadto kang Jehova.​—12/1, panid 27.