Mga Magmamantala sa Gingharian Nagtaho

Gidayeg ang Saksing mga Batang Estudyante

IKAW ba, ingong usa ka estudyante sa tunghaan, maulaw nga mosulti bahin sa imong pagtuo? Ang mga kasinatian sa ubos nagapadayag nga ang maong batan-ong mga Saksi wala mahadlok sa paglaban sa ilang Kristohanong pagtuo ug gidayeg sa pagbuhat niana.

◻ Sa usa ka tunghaan sa Australia, ang mga estudyante gihatagag asaynment sa pagsulat ug komposisyon bahin sa Pasko, apan ang magtutudlo miingon ngadto sa usa ka 11-anyos nga Saksi: “Nasayod ako nga usa ka sa mga Saksi ni Jehova, busa dili ka makasulat bahin sa mga pagsaulog sa Pasko. Makasulat kag laing komposisyon bahin sa ‘Kasaysayan sa Pasko.’” Ang batan-ong igsoong babaye naghan-ay sa komposisyon, nga migamit sa nahiangayng impormasyon gikan sa mga basahon sa Sosyedad ug sa ubang reperensiya. Sa katingala sa klase, ang magtutudlo mikomentong ang impormasyon ekselente ug tukma sa kasaysayan. “Sa tanang komposisyon nga akong nadawat, ang imoha mao ang labing maayo sa klase,” mipahayag ang magtutudlo. Ingong resulta, ang batan-ong Saksi nakapahimutag usa ka brochure nga School, 15 ka magasin, usa ka librong Youth, ug duha ka librong Live Forever sa iyang magtutudlo ug kaubang mga estudyante.

◻ Sa laing tunghaan sa Australia, walo ka Saksing bata gidumala sa usa ka kapuling magtutudlo sa matag hapon alang sa kataposang tulo ka semana sa pagtungha, sanglit sila dili moapil sa kalihokan sa Pasko. Sa ulahi siya mikomento ngadto sa inahan sa pila ka bata: “Gamay ra ang papel nga akong gidula. Ang ubay-ubayng magtutudlo nanulod ug nangutana kon unsa na ang kahimtang. Ako silang giingnan: ‘Walay sapayan kon unsay inyong hunahuna sa ilang relihiyon ug sa pagpahilayo nila sa pila ka kalihokan, kini ang labing maayong pundok sa mga bata nga akong nadumala.’” Pila ka semana sa ulahi sa nahibalag siya sa balay-balay nga pag-alagad, siya miingon: “Lain pay ato, imo bang gipasa kadtong akong giingon bahin sa mga bata sa tunghaan? Gusto kong mahibalo ang tanan.”

◻ Gikan sa Tinipong Bansa miabot kining kasinatian sa usa ka 17-anyos nga senyor sa hayskul kansang klase sa balaod nalangkit sa usa ka diskusyon bahin sa mga katungod nga maylabot sa kagawasan sa relihiyon ug pagkabulag sa Iglesya ug Estado. Duha sa mga kaso naglangkit sa mga Saksi ni Jehova ug sa suliran sa dugo. Nakaplagan sa igsoong babaye nga ang report nga gihisgotan madapigon ug dili makataronganon kon bahin sa mga kamatuoran sa Bibliya bahin sa dugo ug giingnan niya niana ang magtutudlo. Mitubag siya pinaagi sa paghatag kaniyag higayon sa pagpakigsulti sa klase. Una sa iyang pakigpulong, ang mga estudyante naghunahunang ang mga korte nakahimo sa hustong desisyon sa pagpugos sa mga Saksi nga magpaabuno sa dugo batok sa ilang gusto. Apan tapos makadungog sa gibase-sa-Bibliya nga argumento, ang klase mibotar nga nahiusa kontra sa mga desisyon sa korte. Ang atong igsoong babaye nahimuot dihang daghan sa mga estudyante ang miduol kaniya ug nangayog dugang impormasyon mahitungod sa mga pagtuo sa mga Saksi ni Jehova. Siya karon nagaingon nga napabilhan sa mas bug-os nga ang tunghaan maoy iyang espesyal nga teritoryo.

Oo, kamong mga batang nagatungha may linaing teritoryo. Kon kamo may higayon, malulutong ipadayon ang pagtabang sa inyong kaubang estudyante sa pagkat-on sa halangdong katuyoan sa Diyos, ug inyong maangkon ang pagdayeg dili lamang gikan sa uban kondili gikan kang Jehova mismo!—Job 40:14.