Kinabuhi ug Ministeryo ni Jesus

Giayo ang Giyawaang Batang Lalaki

SAMTANG si Jesus, Pedro, Santiago, ug Juan didto sa halayo, tingali sa tuktok sa Bukid sa Hermon, nagkaproblema ang ubang mga tinun-an. Sa iyang pagbalik, nakita dayon ni Jesus nga daw may nahitabo. Dunay mga panon sa mga tawong naglibot sa iyang mga tinun-an, ug ang mga eskriba nakiglantugi kanila. Sa pagkakita kang Jesus, natingala ang mga tawo ug nanalagan sa pagsugat kaniya. “Unsa bay inyong gipakiglantugian kanila?” siya nangutana.

Migawas gikan sa tunga sa panon sa katawhan, miluhod ang usa ka tawo atubangan kang Jesus ug miingon: “Magtutudlo, ania gidala ko kanimo kining akong anak tungod kay siya may amang nga espiritu; ug kon kini siya abuton na gani niini bisan diin, siya idakdak niya sa yuta, ug mobula ang iyang baba ug mokagot ang iyang ngipon ug mawad-an siyag kusog. Ug gihangyo ko ang imong mga tinun-an sa pagpagula unta niini, apan wala sila makahimo.”

Hayan gipahimuslan sa mga eskriba ang kapakyasan sa mga tinun-an sa pag-ayo sa bata, tingali gibiaybiay ang ilang mga paningkamot. Niining hinungdanong yugto, miabot si Jesus. “O pagkadili-matinuohon nga kaliwatan,” siya miingon, “hangtod kanus-a pa nga magauban ako kaninyo? Hangtod kanus-a pa nga mag-antos ako kaninyo?”

Mopatim-aw nga gipahayag ni Jesus ang iyang mga pulong ngadto sa tanan nga presente, apan sa tino kini gitumong ilabina sa mga eskriba, nga naghatag kasamok sa iyang mga disipulo. Pagkahuman, si Jesus miingon bahin sa bata: “Dad-a siya dinhi kanako.” Samtang nagpaduol ang bata kang Jesus, gisuntok sa yawa ang bata ug natumba sa yuta ug gikombulsiyon ang bata. Nagligidligid ang bata sa yuta ug nagbolabola ang baba.

“Kanus-a pa nga naingon siya niini?” nangutana si Jesus.

“Sukad pa sa pagkabata,” mitubag ang amahan. “Ug sa masubsob ginatukmod siya [sa demonyo] ngadto sa kalayo ug ngadto sa tubig aron sa pagpatay kaniya.” Unya mihangyo ang amahan: “Kon may mahimo ka alang kanamo, kaloy-i intawon kami ug tabang kami.”

Tingali sa daghang katuigan, ang amahan nangitag tabang. Ug karon, sanglit wala man makaayo ang mga disipulo ni Jesus, dako gayod ang iyang kasubo. Nakasabot sa hangyo sa tawo, madasigong miingon si Jesus: “Kanang pulonga, ‘Kon may mahimo ka’! Ang tanang butang mahimo ngadto sa magatuo.”

“Nagatuo ako!’ midalidali sa pagtubag ang amahan, apan siya mihangyo: “Tabangi ang pagtuo ko nga nakulangan!”

Sa pagkakita ni Jesus nga ang panon sa katawhan nagdungan sa pagdalagan paingon kanila, gibadlong ni Jesus ang daotang espiritu: “Ikaw nga amang ug bungol nga espiritu, nagasugo ako kanimo, gumula ka kaniya ug ayaw na siya sudli pag-usab.” Dihang migula ang daotang espiritu, iyang gipasinggit ang bata ug makadaghang higayon nga gikombulsiyon siyag grabe. Dayon natumba ang bata nga walay lihok sa yuta, nga tungod niana ang kadaghanan sa mga tawo nanag-ingon: “Patay na siya!” Apan gigunitan ni Jesus ang kamot sa bata, ug siya mitindog.

Sa una pa niana, dihang gipadala ang mga tinun-an sa pagwali, sila nakapagulag mga demonyo. Busa karon, dihang misulod sila sa balay, ilang gipangutana si Jesus sa tago: “Nganong wala man kami makapagula niana?”

Nagpakita nga tungod kadto sa ilang kakulang sa pagtuo, si Jesus mitubag: “Kining matanga dili mahimo sa pagpagula pinaagi sa bisan unsa gawas lamang sa pag-ampo.” Tataw nga kinahanglan ang pangandam aron sa pagpagawas sa gamhanang demonyo nga nalangkit niining kasoha. Ang malig-ong pagtuo uban sa pag-ampo sa pagpangayog tabang sa gahom sa Diyos ang gikinahanglan.

Unya si Jesus midugang: “Sa pagkatinuod magaingon ako kaninyo, nga kon may pagtuo kamo nga ingon ug liso sa mustasa, makaingon kamo niining bukid, ‘Bumalhin ka gikan dinhi ngadto didto,’ ug kini mobalhin, ug walay imposible alang kaninyo.”

Pagkagamhanan sa pagtuo! Ang mga kababagan ug mga kalisdanan nga nagababag sa pag-uswag sa pag-alagad kang Jehova daw samag dili-madaog ug dili-mabalhing dakong literal nga bukid. Apan, gipakita ni Jesus nga atong maugmad ang pagtuo diha sa atong mga kasingkasing, bisibisan ug dasigon kana aron motubo, kini modako sa pagkahamtong ug makahimo kanato sa pagbuntog sa samag bukid nga mga kababagan ug mga kalisdanan. Marcos 9:14-29; Mateo 17:19, 20; Lucas 9:37-43.

◆ Unsay situwasyon ang naabtan ni Jesus dihang mibalik gikan sa Bukid sa Hermon?

◆ Unsang pagdasig ang gihatag ni Jesus sa amahan sa giyawaang bata?

◆ Nganong wala makapagula ang mga disipulo sa yawa?

◆ Sa unsang paagi gipakita ni Jesus nga gamhanan ang pagtuo?