Mga Magmamantala sa Gingharian
Ang Paglahutay sa Usa ka Bana Nakapahiusa sa Pamilya
UNSAY imong buhaton kon motuo ka sa kamatuoran ug unya ang imong kapikas mapait nga mosupak kanimo ug himoon ang tanan kutob sa iyang mahimo aron mabungkag ang imong integridad? Mapalig-on ka ba sa mga pulong ni Pabl sa 2 Timoteo 3:12, diin siya nagaingon: “Ang tanan nga matinguhaon sa pagkinabuhi uban sa diyosnong debosyon nga nahiusa kang Kristo Jesus pagalutoson usab”? Moantos ka ba o mohunong? Ang usa ka lalaking Kristohanon sa Italya miatubang nianang hagita. Wala siya mohunong, ug gipanalanginan siya ni Jehova tungod niana.
Ang lalaking gihisgotan kanhi usa ka madasigong komunista, apan siya mainiton usab nga Katoliko. Nagtuo siya sa pagkamanagsama sa mga tawo ug gibati nga ang duruha ka kalihokan nagwali sa maong mithi. Usa sa iyang mga kauban sa trabaho nakigsulti kaniya mahitungod sa Gingharian sa Diyos, ug iya dayong nailhan nga kadto ang bugtong paagi sa pagkab-ot sa panaghiusa. Gidawat niya ang kamatuoran nga mainiton kaayo sama sa iyang gipakita alang sa komunismo ug Katolisismo ug nabawtismohan niadtong 1972. Komosta ang iyang asawa? Mapaiton niyang gisupak siya. Siya miasoy:
“Maoy sa 1970 nga ang akong bana unang nakakontak sa mga Saksi ni Jehova sa iyang gitrabahoan. Sa inanay, samtang nagtuon siya sa Bibliya, ako nakaamgo nga kadto bag-ong relihiyon ug may mga punto nga wala ako mouyon. Ang paglutos nagsugod dayon gikan kanako ug sa ubang sakop sa pamilya.”
Siya nagpadayon: “Ang mga ginikanan sa akong bana naghasi kaniya, nga migamit sa tanang paagi nga posible sa pagpahunong kaniya. Sa midako ang kahibalo sa Bibliya sa akong bana, iyang nasabtan nga kinahanglang mawala ang mga diyosdiyos gikan sa among balay. Giingnan ko siya nga kon kana buhaton niya may daotan nga mahitabo. Gidaot niya ang usa ka relihiyosong hulagway, ug gilansad ko ang binaba ug lawasnong pag-atake kaniya ug gigisi ang ubay-ubay niyang magasin. Sa akong pagsinggit, midali sa pag-anha ang akong mga ugangan ug gihasmagan usab siya, apan wala siya mobalos.
“Nagpadayon ang mga panagbangi hangtod nga gibiyaan ko siya sa dihang gisupak niya nga motambong ang among anak babaye sa katekismo sa simbahan. Giingnan ako sa akong bana nga kon dili ako mopauli, himoon niya ang pormal nga kiha sa pag-abandono. Tapos sa usa ka semana mihukom ako sa pagpauli.
“Sa dugang paningkamot sa pagpugong kaniya, miadto ako sa usa ka espiritista ug mihangyo nga siya lumayon. Gisukitsukit ako sa espiritista, ug gisaysay ko ang kahimtang. Sa pagkahibalo niana, giingnan niya ako nga walay matang sa lumay ang moepekto sa usa sa mga Saksi ni Jehova.
“Nakahunahuna mi sa pagkonsulta sa lokal nga pari. Gitambagan kami sa pari sa pag-adto sa usa ka abogado. Sa akong katingala gidasig ako sa abogado sa pagtambong sa mga tigom sa mga Saksi ni Jehova uban sa akong bana. Ang akong ugangang-lalaki, nga kauban nako, mitutol, nga miingon nga ang iyang pamilya debotado kaayo kang San Rocco, ‘Ang Tigpanalipod’ sa among lungsod. Bisan pa niana, gisaysay sa abogado nga ang maong ‘santos,’ sama sa uban pang diyosdiyos, maoy bakak. Dayon nagpaila siya nga siya tsirman sa Katolikong Aksiyon ug giingnan kami nga siya dili gayod moapil sa relihiyosong mga piyesta tungod kay, ingong nakabasag Bibliya, siya nasayod nga silang tanan bakak. Sa kataposan, siya miingon: ‘Kuyog sa imong bana ug magmalinawon. Pamati kaniya, ug tun-i usab ang Bibliya.’
“Tungod sa maong pagdasig, akong gipalandong ang kagawian, mga kausaban, ug paglahutay sa akong bana, ug busa misugod ako sa pagtambong sa mga tigom sa mga Saksi ni Jehova uban kaniya. Kay nakadayeg sa gugma nga gipakita didto, ako nagtuon, nagpalista sa Tunghaan sa Teokratikanhong Ministeryo, ug misugod sa pagsangyaw sa kanataran. Sa kataposan, gisimbolohan ko ang akong pagpahinungod niadtong 1977 ug karon malipayon nga anaa sa kamatuoran, salamat kang Jehova nga nagtabang sa akong bana nga molahutay ug maghiusa sa tibuok pamilya diha sa Iyang pagsimba.”