Kinabuhi ug Ministeryo ni Jesus

Mga Mamumuo sa Parrasan

“DAGHAN ang nagauna,” mao pay pagsulti ni Jesus, “unya maulahi ug ang ulahi magauna.” Karon iyang gipasumbingay kini pinaagi sa pag-asoy ug sugilanon. “Ang gingharian sa langit,” siya misugod, “sama sa usa ka tawo, usa ka tagbalay, kinsa milakaw sayo sa kabuntagon aron sa pagpangitag mga mamumuo nga iyang kasuholan alang sa iyang parrasan.”

Si Jesus mipadayon: “Sa dihang [ang tagbalay] nagkasabot uban sa mga mamumuo sa tag-denario ang adlaw, iyang gipaadto sila sa iyang parrasan. Ug sa naglakaw siya sa ikatulo ang takna sa buntag, iyang nakita sa tiyanggihan ang uban nga walay trabaho; ug siya miingon kanila, ‘Pangadto usab kamo sa parrasan, ug suholan ko kamo ug igo.’ Busa nangadto sila. Ug siya milakaw sa ikaunom ug ikasiyam ang takna ug mao usab ang iyang gihimo. Sa kataposan, sa may ikanapulog-usa ang takna siya milakaw ug iyang nakita ang uban nga nanagbarog, ug siya miingon kanila, ‘Nganong nanagbarog man kamo dinhi nga walay mga trabaho sa tibuok adlaw?’ Kaniya mitubag sila nga nag-ingon, ‘Kay wala may misuhol kanamo.’ Siya miingon kanila, ‘Pangadto usab kamo sa parrasan.’”

Ang tagbalay, o tag-iya sa parrasan, mao si Jehova nga Diyos, ug ang parrasan mao ang nasod sa Israel. Ang mga mamumuo sa parrasan mao ang mga tawo nga gidala diha sa Balaod sa pakigsaad; sila mao ilabina ang mga Hudiyo nga nabuhi sa mga adlaw sa mga apostoles. Diha lamang sa tibuok adlaw nga mga mamumuo nga gihimo ang kasabotan sa suhol. Ang suhol maoy tag-denario ang adlaw. Sanglit “ang ikatulong takna” alas 9:00 s.b. man, kadtong gitawag sa ika-3, ika-6, ika-9, ug ika-11 nga takna sa pagtrabaho, sa tinagsatagsa, maoy 9, 6, 3, ug 1 ka takna.

Ang 12-ka-takna, o tibuok-adlaw, nga mga mamumuo naghawas sa Hudiyohanong nga pangulo nga puliki sa tanang panahon sa relihiyosong pag-alagad. Sila dili-sama sa mga disipulo ni Jesus, kinsa, sa kadaghanang bahin sa ilang mga kinabuhi, may trabaho nga pangisda o ubang sekular nga mga trabaho. Hangtod na lamang sa tinghunlak 29 K.P. nga gipadala sa “tagbalay” si Jesu-Kristo aron sa pagtigom kanila aron iyang mahimong mga disipulo. Busa sila nahimong “ang kataposan,” o ika-11-takna nga mga mamumuo sa parrasan.

Sa kataposan, ang simbolikong adlaw sa trabaho natapos uban sa kamatayon ni Jesus, ug ang panahon miabot sa pagbayad sa suhol sa mga mamumuo. Ang tagsaong lagda sa pagbayad sa suhol sa kataposan ang gisunod, sama sa gibatbat: “Sa pagkasawomsom na, ang agalon sa parrasan miingon sa iyang piniyalan, ‘Tawga na ang mga mamumuo ug bayri sila sa ilang mga suhol, sugod sa mga naulahig tangka hangtod sa mga nahiuna.’ Ug sa pagduol sa mga mitangka sa ikanapulog-usa nga takna sa hapon, ang matag-usa kanila nakadawat ug usa ka denario. Busa, sa pagduol sa nanghiuna, nanagdahom sila nga makadawat ug labaw; apan ang matag-usa kanila nakadawat ug usa ka denario lamang. Ug sa ilang pagdawat niini sila nanagbagotbot batok sa tagbalay ug miingon, ‘Kining mga naulahi nakabuhat sulod lamang sa usa ka takna; ug sila imong gipakig-angay kanamo nga maoy miabaga sa kinabug-atan sa buhat sa tibuok adlaw ug sa nag-aligiting nga kainit!’ Apan ngadto sa usa kanila mitubag siya nga nag-ingon, ‘Higala, wala ko ikaw lupigi. Kay dili ba nagkasabot man kita sa tagsa ka denario? Dawata ang imo ug lumakaw ka. Akong pagbuot nga pagahatagan kining naulahi sama sa akong paghatag kanimo. Dili ba diay matarong kanako ang paggawi sa akong mga butang sumala sa akong gusto? O daotan ba ang imong mata tungod kay ako maayo?’” Sa pagtapos gisobli ni Jesus ang punto nga unang nahimo, nga nagaingon: “Sa ingon niana ang mga naulahi mahiuna, ug ang nahiuna maulahi.”

Ang pagdawat sa denario nahitabo, dili sa pagkamatay ni Jesus, kondili sa Pentekostes 33 K.P., sa dinha si Kristo, “ang tawo nga piniyalan,” mibubo sa balaang espiritu diha sa iyang mga disipulo. Kining maong mga disipulo ni Jesus sama sa “ang naulahi,” o ang ika-11 nga takna, nga mga mamumuo. Ang denario wala maghawas sa gasa sa balaang espiritu mismo. Ang denario maoy usa ka butang alang sa mga disipulo nga gamiton dinhi sa yuta. Kadto maoy usa ka butang nga mahimong ilang kapanginabuhian, ang ilang kinabuhing walay kataposan. Kadto mao ang pribilehiyo sa pagkahimong espirituwal nga Israelinhon, nga gidihogan sa pagsangyaw mahitungod sa Gingharian sa Diyos.

Dayon kadtong unang gipatrabaho miingon nga ang mga disipulo ni Jesus gibayran, ug ilang nakita sila nga migamit sa simbolikong denario. Apan gusto nilang mabatonan ang labaw pa kay sa balaang espiritu ug ang kauban niining mga pribilehiyo sa Gingharian. Ang ilang pagbagotbot ug mga pagsupak nagkuha sa porma sa paglutos sa mga disipulo ni Kristo, “ang kataposan” sa mga mamumuo sa parrasan.

Kana bang unang-siglo nga katumanan mao lamang ang katumanan sa sambingay ni Jesus? Dili, ang klero sa Kakristiyanohan niining ika-20ng siglo, tungod sa ilang mga posisyon ug mga responsabilidad, nahimong “una” nga gisuholan sa pagtrabaho sa simbolikong parrasan sa Diyos. Ilang giisip ang dedikadong mga magwawali nga nakig-uban sa Watch Tower Bible and Tract Society nga mao “ang naulahi” nga dunay balidong tinudlong-buluhaton sa pag-alagad sa Diyos. Apan, sa pagkamatuod, sila mao ang mga tawo nga gitamay sa klero kinsa nakadawat sa denario​—ang dungog sa pag-alagad ingong dinihogang mga tinugyanan sa langitnong Gingharian sa Diyos. Mateo 19:30–20:16.

◆ Unsay gihawasan sa parrasan? Kinsa ang gihawasan sa tag-iya sa parrasan ug sa 12-ka-takna ug 1-ka-takna nga mga mamumuo?

◆ Kanus-a natapos ang simbolikong adlaw sa pagtrabaho, ug kanus-a gihatag ang suhol?

◆ Unsay gihawasan sa pagbayad sa suhol nga denario?