Mga Magmamantala sa Gingharian Nagtaho
Usa ka Singko-Anyos Nakapukaw sa Interes
TALIWALA sa kapig 40,000 ka Saksi ni Jehova sa Venezuela mao ang usa ka singko-anyos nga batang lalaki nga may dalayegong kasinatian. Namati siyag maayo sa mga pakigpulong publiko nga gibase sa librong Life—How Did It Get Here? By Evolution or by Creation? ug sa mga paghisgot sa pamilya sa ulahi sa maong basahon. Ang singko-anyos, nga gikan sa teokratikanhong pamilya, sa ingon nakasabot nga ang ebolusyon nagaangkon nga ang tawo mitungha gikan sa “sabaw.” Usa sa mga gipamulong diha sa basahon nga nagahisgot sa pagtulon-an sa ebolusyon nga ang kinabuhi naggikan sa organikong sabaw.
Sa 14 anyos, ang usa ka pamilya sa tapad (bana, asawa, duha ka tin-edyer nga anak lalaki, ug siyete-anyos nga batang babaye) wala magtagad sa mga hangyo sa pamilyang Saksi nga susihon ang Bibliya ug sa ilang mga pagdapit nga moadto sa Kingdom Hall.
Usa ka adlaw samtang ang Saksing asawa naghugas sa mga plato, nadunggan niya ang makapaikag nga kabildohay tali sa iyang anak lalaki ug sa batang babaye sa silingan, duol sa nag-ulang nga koral. Ang batang lalaki miingon: “Abi nimo! Ang mga tawo sa kalibotan nagaingon nga ang tawo naggikan sa sabaw!” Ang batang babaye mitubag, sumala sa kasagaran niyang gihimo: “Nabuang ka ba?” Ang batang lalaki mitubag: “Dili, dili ako buang. Ang mga tawo sa kalibotan nagaingon nga ang tawo naggikan sa sabaw; apan si Jehova nagbuhat sa tawo.” Gitamay sa batang lalaki ang ideya, kay naghunahuna nga kadto ordinaryong sabaw nga kan-onon, nga dili niya gusto. Dayon mipadayon siya sa pagsulti ngadto sa batang babaye: “Ang akong daddy angay nga maghatag sa librong Creation ngadto sa imong daddy aron iyang makita nga ang Diyos naglalang sa tawo.” Apan ang batang babaye miingon nga sila mga Katoliko, ug kadto nagtapos sa kabildohay.
Sa dihang ang bana sa sister, kinsa usa ka ansiano, nakaabot sa balay gikan sa trabaho, giasoy niya ang kabildohay nga iyang nadungog. Bisan tuod ang hitabo tali sa mga bata nakapakatawa nila, ang brader naghunahuna nga tingali gusto ni Jehova nga iyang sangyawan na usab ang maong silingan. Busa pila ka adlaw sa ulahi, giduol niya ang iyang silingan ug giasoy ang kabildohay sa mga bata. Siya miingon nga alang sa iyang anak lalaki, buot niyang ihatag kaniya ang usa ka kopya sa librong Creation. Gisugyot sa Saksi nga basahon kana sa silingan nga walay pagkamadapigon, kay kana magpakita sa sinugdanan sa kinabuhi.
Sa katingala sa igsoon, pila ka adlaw sa ulahi ang maong magtiayon, kinsa sa dugay na dili matinagdanon sa kamatuoran, mianha sa balay sa igsoon nga nagpahayag ug pagbasol sa tinamdang ilang nabatonan sa daghan kaayong katuigan. Sila miingon nga sila nahingangha sa kahibulongang kalidad sa librong Creation.
Ang resulta mao nga nasugdan ang usa ka pagtuon sa Bibliya uban ning pamilyaha. Misugod sila sa pagtambong sa mga tigom nga regular ug sa wala madugay nahimong mga magmamantala sa maayong balita. Ang lalaki, iyang asawa, ug ang duha ka tin-edyer nga anak lalaki nabawtismohan sa usa ka distritong kombensiyon, ug ang batang babaye usa usab ka magmamantala sa Gingharian. Ang asawa misugod sa regular auxiliary payunir nga pag-alagad tapos dayon sa iyang bawtismo.
Si Jesu-Kristo nakaila niadtong mga tawo kansang mga kasingkasing maayo, ug siya makagamit ug nagagamit bisan sa mga bata sa pag-abot sa maong maayong mga kasingkasing.—Juan 10:14.