Magkahiusa Pinaagi sa Putling Pinulongan

“Unya pabalhinon ko ang mga katawhan sa usa ka putling pinulongan, aron silang tanan magatawag sa ngalan ni Jehova, aron sa pag-alagad kaniya abaga sa abaga.”—SOFONIAS 3:9.

 1. Ang mga tawo sukad nakadungog ba nga misulti si Jehova nga Diyos?

ANG pinulongan ni Jehova nga Diyos putli. Apan ang mga tawo may panahon bang nakadungog nga siya misulti? Aw, oo! Kadto nahitabo sa dihang ang iyang Anak, si Jesu-Kristo, dinhi sa yuta 19 ka siglo kanhi. Pananglitan, sa gibawtismohan si Jesus, ang Diyos nadunggan nga miingon: “Kini mao ang akong Anak, ang hinigugma, nga akong giuyonan.” (Mateo 3:13-17) Kadto usa ka pahayag sa lunsay nga kamatuoran, nga nadunggan ni Jesus ug ni Juan Bawtista diha sa usa ka tawhanong pinulongan.

 2. Unsay gipaila sa pagtumong ni apostol Pablo sa “mga pinulongan sa . . . mga manulonda”?

² Pila ka tuig sa ulahi ang Kristohanong apostol Pablo naghisgot sa “mga pinulongan sa mga tawo ug sa mga manulonda.” (1 Corinto 13:1) Unsay gipaila niini? Aw, kini nagapakita nga dili lamang mga tawo apan ang espiritung mga persona usab may pinulongan ug sinultihan! Hinuon, ang Diyos ug ang mga manulonda dili mokomunikar sa usag usa pinaagi sa paggamit sa mga tingog ug pinulongan nga atong madunggan ug hisabtan. Nganong dili man? Kay ang usa ka atmospera sama sa naglibot sa yuta gikinahanglan aron sa pagsabwag sa mga balod sa tingog nga madunggan ug masabtan sa mga tawo.

 3. Sa unsang paagi misugod ang pinulongan sa tawo?

³ Sa unsang paagi nagsugod ang pinulongan sa tawo? Giingon sa pipila nga ang atong mga katigulangan nanlimbasog sa pagkomunikar sa usag usa pinaagi sa paggamit sa mga agumod ug mga ngulob. Nag-ingon ang librong Evolution (Life Nature Library): “Ang usa ka tawong aliwas sa mga usa ka milyong katuigan kanhi . . . lagmit nagbatid sa pila ka tingog sa sinultihan.” Apan ang iladong lexicographer si Ludwig Koehler miingon: “Ang sinultihan sa tawo maoy usa ka sekreto; kini usa ka balaang gasa, usa ka milagro.” Oo, ang sinultihan sa tawo maoy usa ka balaang gasa, kay ang Diyos mihatag sa unang tawo, si Adan, sa usa ka pinulongan. Kadto kadto mao ang gitawag sa kadugayan nga Hebreohanon. Kanang pinulongana gisulti sa Israelinhong mga kaliwat ni “Abram ang Hebreohanon,” usa ka matinumanong patriarka kansang katigulangan nga si Shem maoy usa ka anak sa magtutukod ug arka nga si Noe. (Genesis 11:10-26; 14:13; 17:3-6) Tungod sa matagnaong pagpanalangin sa Diyos kang Shem, makataronganon ang paghinapos nga ang iyang pinulongan wala maapektahi sa milagrosong gihimo ni Jehova nga Diyos 43 ka siglo kanhi.​—Genesis 9:26.

 4. Kinsa si Nimrod, ug sa unsang paagi gigamit siya ni Satanas nga Yawa?

⁴ Niadtong panahona ‘ang tibuok nga yuta may usa ka pinulongan ug usa ka hugpong sa mga pulong.’ (Genesis 11:1) Nagkinabuhi niadto ang tawong si Nimrod, “usa ka gamhanang mangangayam nga masupakon kang Jehova.” (Genesis 10:8, 9) Ang dili-makitang pangunang kaaway sa katawhan, si Satanas, migamit ilabina kang Nimrod sa pagtukod sa yutan-ong bahin sa organisasyon sa Yawa. Buot ni Nimrod nga makahimog usa ka ngalan alang sa iyang kaugalingon, ug ang maong hambogirong tinamdan mikaylap ngadto sa iyang mga sumusunod, kinsa misugod sa usa ka espesyal nga proyekto sa pagtukod sa yuta sa Shinar. Sumala sa Genesis kapitulo 11, bersikulo 4, sila miingon: “Umari kamo! Tukoron nato alang sa atong kaugalingon ang usa ka siyudad ug usa ka torre usab nga ang tumoy niini mosangko sa mga langit, ug himoon nato ang madungganong ngalan alang sa atong kaugalingon, kay basi kita mahitibulaag sa tibuok nga nawong sa yuta.” Ang maong proyekto nga masupakon sa sugo sa Diyos nga “pun-a ninyo ang yuta” nahunong sa gilibog ni Jehova ang pinulongan sa mga rebelde. “Busa,” matud sa asoy sa Bibliya, “gipatibulaag sila ni Jehova gikan didto ngadto sa tibuok nawong sa yuta, ug ilang inanay nga gibiyaan ang pagtukod sa siyudad.” (Genesis 9:1; 11:2-9) Kadtong siyudara ginganlang Babel, o Babilonya (nga nagkahulogan, “Kalibog”), “tungod kay didto gilibog ni Jehova ang sinultihan sa tibuok nga yuta.”​—Byington.

 5. (a) Unsay nasanta sa gilibog sa Diyos ang pinulongan sa katawhan? (b) Unsay ikahinapos nato bahin sa pinulongan ni Noe ug Shem?

⁵ Kadtong milagroha​—ang paglibog sa usa ka pinulongan sa tawo​—misangpot sa pagkapuno sa yuta sumala sa gisugo sa Diyos kang Noe, ug kadto nagsumpo sa plano nga nabatonan tingali ni Satanas sa pagtukod sa nahiusang mahugawng pagsimba kaniya sa mga tawo nga mirebelde batok sa Soberanong Ginoo sa langit ug sa yuta. Tinuod, pinaagi sa pagtuman sa bakak nga relihiyon sa bisan unsang matang, ang mga tawo maoy mga biktima sa Yawa, ug sila nag-alagad sa mga demonyo sa nagbuhat silag mga diyos ug mga diyosa, nga naghatag kanilag mga ngalan diha sa ilang nagkalainlaing mga pinulongan, ug nagsimba kanila. (1 Corinto 10:20) Apan ang gihimo sa bugtong matuod nga Diyos didto sa Babel misanta sa pagkaporma sa usa ka nahiusa bakak nga relihiyon nga maghatag sa Yawa sa pagsimba nga dayag iyang gipangandoy. Hinuon, ang matarong nga si Noe ug ang iyang anak si Shem wala gayod malangkit sa maong pagkabungkag sa yuta sa Shinar. Busa makataronganong ikahinapos nga ang ilang pinulongan nagpabiling mao ang gisulti sa matinumanong si Abram (o Abraham)​—ang pinulongan nga gigamit sa Diyos sa pagpakigsulti sa tawong si Adan didto sa tanaman sa Eden.

 6. Sa adlaw sa Pentekostes 33 K.P., giunsa pagpakita ni Jehova nga siya makahatag ug katakos sa pagsultig mga pinulongan?

⁶ Si Jehova, nga naglibog sa orihinal nga pinulongan sa katawhan, makahatag usab sa katakos sa pagsultig mga pinulongan. Aw, kana mismo iyang gihimo sa adlaw sa Pentekostes sa tuig 33 sa atong Komung Panahon! Sumala sa Buhat 2:1-11, mga 120 ka sumusunod ni Jesus ang niadto nagkatigom sa usa ka itaas nga lawak sa Jerusalem. (Buhat 1:13, 15) Sa kalit, may dahunog nga gikan sa langit “ingon sa huros sa makusog nga hangin.” “Ang mga dila nga daw kalayo” nadayag ug naapod-apod. Niadto ang mga tinun-an “napuno sa balaang espiritu ug misugod sa pagsulti sa nagkalainlaing mga pinulongan, sumala sa ipalitok kanila sa espiritu.” Sa maong mga pinulongan nga gihatag sa Diyos, sila naghisgot “mahitungod sa halangdong mga butang sa Diyos.” Ug pagkatalagsaong milagro kadto, sa dihang ang mga Hudiyo ug mga proselita sa nagkalainlaing mga pinulongan, gikan sa halayo kaayong mga dapit sama sa Mesopotamia, Ehipto, Libya, ug Roma, nakasabot sa naghatag-kinabuhi nga mensahe!

Usa ka Hinatag-sa-Diyos nga Pinulongan Karong Adlawa!

 7. Unsay mga kalaoman kon usa ra ka pinulongan ang igasulti ug hisabtan sa tibuok kalibotan?

⁷ Sanglit ang Diyos makahatag ug nagkalainlaing mga pinulongan sa milagrosong paagi, dili ba kahibulongan kon ipahinabo niya nga ang usa ka pinulongan mao ang igasulti ug hisabtan sa tibuok nga kalibotan? Kana magpausbaw sa labaw nga pagsinabtanay sa tawhanong banay. Sumala sa pagpahayag niini sa The World Book Encyclopedia: “Kon ang tanang katawhan magsulti sa samang pinulongan, mahimong labi pang suod ang kultural ug ekonomikanhong mga bugkos, ug mouswag ang maayong kabubut-on taliwala sa kanasoran.” Aw, labing menos 600 ka unibersal nga pinulongan ang gisugyot latas sa katuigan. Niini kanila, ang Esperanto ang may kinadak-ang epekto kay nakat-onan kini sa mga 10,000,000 ka tawo sukad sa pagkamugna niini sa tuig 1887. Bisan pa niana, ang tawhanong paningkamot sa paghiusa sa katawhan pinaagi sa usa ka tibuok-kalibotang pinulongan wala gayod molampos. Ngani, ang dugang ug dugang mga suliran nagapahinabog pagkabahin niining kalibotana samtang ‘ang mga tawong daotan mosamot sa pagkadaotan.’​—2 Timoteo 3:13.

 8. Bisan pag gamiton ang usa ka tibuok-kalibotang pinulongan sa kalibotan karong adlawa, unsa gihapoy maglungtad, ug ngano?

⁸ Sa relihiyosong pagkasulti, adunay dakong kalibog. Apan dili ba angayng pagadahomon nato kini, sanglit ang basahong Pinadayag sa Bibliya nagatawag man sa imperyo sa kalibotan sa bakak nga relihiyon nga “Dakong Babilonya”? (Pinadayag 18:2) Oo, kay ang “Babilonya” nagkahulogang “Kalibog.” Bisan pag ang usa ka artipisyal nga pinulongan o kinaiyanhong pinulongan sama sa Ingles, Pranses, Aleman, o Ruso pagasagopon ingong usa ka tibuok-kalibotang pinulongan sa kalibotan karong adlawa, ang pagkawalay-panaghiusa maglungtad gihapon sa relihiyosong paagi ug sa ubang paagi. Ngano? Tungod kay “ang tibuok nga kalibotan nahiluna sa gahom sa usang daotan,” si Satanas nga Yawa. (1 Juan 5:19) Siya mao ang kahugpongan sa pagkahakog, ug siya sa kadalo nangandoy nga pagasimbahon sa tanang tawo, sama sa iyang gibuhat sa mga adlaw ni Nimrod ug sa Torre sa Babel. Aw, ang usa ka tibuok-kalibotang pinulongan nga igasulti sa makasasalang mga tawo makahatag pa kang Satanas ug higayon sa pagtukod sa nahiusang pagsimba sa Yawa! Apan dili kana itugot ni Jehova; sa pagkamatuod, sa dili madugay iyang taposon ang tanang bakak, inspirado-sa-Yawa nga relihiyon.

 9. Sa unsang paagi ang katawhan sa tanang nasod ug mga rasa gihiusa karon?

⁹ Bisan pa niana, ang usa ka katingad-anang kamatuoran mao nga ang tanang maayong mga tawo gikan sa tanang nasod ug mga rasa gihiusa karon mismo. Kini nagakahitabo pinasukad sa mga kondisyon sa Diyos ug alang sa iyang pagsimba. Karong adlawa, ang Diyos nagapaposible nga ang mga tawo makakat-on ug makasulti sa bugtong putling pinulongan sa yuta. Ug kini sa pagkamatuod maoy usa ka tibuok-kalibotang pinulongan. Sa pagkamatuod, si Jehova nga Diyos nagatudlo niining putling pinulongan ngadto sa daghang tawo gikan sa tanang nasod sa yuta karong adlawa. Kini maoy sa katumanan sa matagnaong saad sa Diyos pinaagi sa iyang propeta ug saksing si Sofonias: “Unya pabalhinon ko ang mga katawhan sa usa ka putling pinulongan [sa literal, “usa ka hinlong ngabil”], aron silang tanan magatawag sa ngalan ni Jehova, aron sa pag-alagad kaniya abaga sa abaga.” (Sofonias 3:9) Unsa ba kining putling pinulongan?

Ang Putling Pinulongan Gibatbat

10. Unsa ang putling pinulongan?

¹⁰ Ang putling pinulongan mao ang kamatuoran sa Diyos nga makita diha sa iyang Pulong mismo, ang Balaang Kasulatan. Kini ilabina mao ang kamatuoran mahitungod sa Gingharian sa Diyos, nga magpatunghag pakigdait ug ubang mga panalangin sa katawhan. Ang putling pinulongan nagasalikway sa relihiyosong kasaypanan ug bakak nga pagsimba. Kini maghiusa sa tanan nga nagasulti niini diha sa putli, mahinlo, makapalig-on nga pagsimba sa buhi ug matuod nga Diyos, si Jehova. Karong adlawa, ang mga 3,000 ka pinulongan nahimong usa ka babag sa pagsinabtanay, ug ang ginatos ka bakak nga relihiyon naglibog sa mga tawo. Busa pagkamalipayon nato nga ang Diyos nagapabalhin sa mga katawhan nganha niining kahibulongan, putling pinulongan!

11. Unsay nahimo sa putling pinulongan alang sa katawhan sa tanang nasod ug rasa?

¹¹ Oo, ang putling pinulongan gibatid sa mga tawo sa tanang nasod ug rasa. Ingong bugtong espirituwal putling pinulongan sa yuta, kini nagasilbing gamhanan magpahiusa nga puwersa. Kini makapaarang sa tanang nagasulti niini sa “pagtawag sa ngalan ni Jehova, aron sa pag-alagad kaniya abaga sa abaga,” o sa literal, “uban sa usa ka abaga.” Sa ingon nagaalagad sila sa Diyos “uban sa usa ka pag-uyon,” “uban sa nagkausa ug nahiusang abaga.” (The New English Bible; The Amplified Bible) Ang hubad ni Steven T. Byington mabasa: “Unya akong [Jehova nga Diyos] himoon ang mga ngabil sa tanang katawhan nga hinlo, aron silang tanan makatawag sa ngalan ni Jehova ug makakooperar diha sa iyang pag-alagad.” Kanang tibuok-kalibotan daghag-pinulongang kooperasyon sa pag-alagad sa Diyos nagalungtad lamang taliwala sa mga Saksi ni Jehova. Sa 212 ka kayutaan karong adlawa, kapig upat ka milyon niining mga magmamantala sa Gingharian nagawali sa maayong balita diha sa daghang tawhanong mga pinulongan. Bisan pa niana, ang mga Saksi “nagkahiusa sa pagsulti” ug “sa tukma nahiusa sa samang kaisipan ug sa samang panghunahuna.” (1 Corinto 1:10) Kini matuod tungod kay, bisan pag diin sila sa yuta, ang tanang Saksi ni Jehova nagasulti sa usa ka putling pinulongan, sa kadayegan ug kahimayaan sa ilang langitnong Amahan.

Kat-oni Karon ang Putling Pinulongan!

12, 13. (a) Nganong angay kang mabalaka bahin sa pagsulti sa putling pinulongan? (b) Nganong ang mga pulong sa Sofonias 3:8, 9 makahuloganon kaayo karong adlawa?

¹² Nganong mabalaka ka man bahin sa pagsulti sa putling pinulongan? Sa usa ka butang, kay ang imong kinabuhi nagadepende sa pagkat-on ug pagsulti niini. Una pa mosaad ang Diyos nga “pabalhinon ang mga katawhan sa usa ka putling pinulongan,” siya nagpasidaan: “‘Magpadayon kamo sa paglaom kanako,’ nagaingon si Jehova, ‘hangtod sa adlaw sa akong pagtindog alang sa inagaw, kay ang akong hukom mao ang pagtigom sa mga nasod, aron akong tigomon ang mga gingharian, aron igabubo diha kanila ang akong hukom, ang bug-os kong nagdilaab nga kasuko; kay ang kalayo sa akong kadasig magalamoy sa tibuok nga yuta.’”​—Sofonias 3:8.

¹³ Kanang mga pulong sa Soberano Ginoong Jehova unang gipamulong 26 ka siglo kanhi sa Juda, nga ang kaulohan niana mao ang Jerusalem. Apan kanang pamulonga gitumong ilabina sa atong adlaw kay ang Jerusalem mao ang usa ka landong sa Kakristiyanohan. Ug ang atong panahon, sukad sa pagkatukod sa langitnong Gingharian sa Diyos sa 1914, mao ang adlaw ni Jehova sa pagtigom sa mga nasod ug pagtapok sa mga gingharian. Silang tanan iyang gitingob ubos sa iyang pagtagad pinaagi sa usa ka dakong buluhaton sa pagpamatuod. Sa baylo, kini nakapukaw nila sa pagsupak sa iyang katuyoan. Bisan pa niana, sa kamaluluy-on gihimo ni Jehova nga Diyos nga ang mga tawo gikan niining tanang nasod magkausa sa pagsulti sa putling pinulongan. Pinaagi niini, ang tanang nagtinguhag kinabuhi diha sa iyang gisaad nga bag-ong kalibotan mahimong mag-alagad kaniya sa tingob sa dili pa ang tanang nasod maut-ot sa kalayonhong pagpahayag sa balaang kapungot panahon sa “gubat sa dakong adlaw sa Diyos nga Makagagahom sa Tanan,” nga sa kasagaran gitawag nga Armageddon. (Pinadayag 16:14, 16; 2 Pedro 3:13) Ikalipay, ang mga magasulti sa putling pinulongan ug magatawag sa ngalan ni Jehova diha sa pagtuo ingong nahiusang matuod nga mga magsisimba magpahimulos ug balaang panalipod panahon sa kainit nianang maong katalagman sa kalibotan. Pagadad-on sila sa Diyos nga luwas ngadto sa bag-ong kalibotan, diin ang putling pinulongan mao lamang sa kataposan ang maanaa sa mga ngabil sa tanang tawo.

14. Pinaagi kang Sofonias, giunsa pagpakita sa Diyos nga ang pagkaluwas sa kalaglagan niining sistema sa mga butang magkinahanglag dihadihang paglihok?

¹⁴ Pinaagi sa iyang propetang si Sofonias, gitin-aw ni Jehova nga kadtong nagalaom nga makalabang sa kalaglagan sa presenteng daotang sistema sa mga butang kinahanglang molihok dayon. Sumala sa Sofonias 2:1-3, ang Diyos nag-ingon: “Managtigom kamo, oo, managtigom, Oh nasod nga wala mangluspad sa kaulaw. Sa wala pa igapatungha ang lagda, sa dili pa ang adlaw moagi sama sa tahop, sa dili pa modangat kaninyo ang nagdilaab nga kasuko ni Jehova, sa dili pa modangat kaninyo ang adlaw sa kasuko ni Jehova, pangitaa ninyo si Jehova, kamong tanang maaghop sa yuta, nga nagtuman sa Iyang hudisyal nga hukom. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.”

15. (a) Unsa ang unang katumanan sa Sofonias 2:1-3? (b) Kinsay naluwas sa pagpatuman sa Diyos sa paghukom diha sa Juda, ug unsay motumbas sa maong pagkaluwas sa atong adlaw?

¹⁵ Kanang mga pulonga may unang katumanan sa karaang Juda ug Jerusalem. Ang mga tawong makasasala sa Juda wala mosanong nga paborable sa hangyo sa Diyos, sumala sa gipakita sa iyang pagpatuman sa paghukom diha kanila sa mga kamot sa Babilonyanhon sa tuig 607 W.K.P. Maingon nga ang Juda mao ang “nasod nga wala mangluspad sa kaulaw” atubangan sa Diyos, ang Kakristiyanohan usab nahimong usa ka way-kaulaw nga “nasod” atubangan ni Jehova. Bisan pa niana, tungod sa pagpamati sa pulong sa Diyos ang pila ka taga-Juda ug uban pa naluwas, apil kanila mao ang matinumanong propeta ni Jehova si Jeremias. Ang ubang naluwas mao ang usa ka Etiopianhon nga ginganlag si Ebed-melech ug mga kaliwat ni Jonadab. (Jeremias 35:18, 19; 39:11, 12, 16-18) Sa susama karong adlawa, ang “usa ka dakong panon” sa “ubang mga karnero” ni Jesus nga gitigom gikan sa tanang nasod maluwas sa Armageddon ngadto sa bag-ong kalibotan sa Diyos. (Pinadayag 7:9; Juan 10:14-16) Kadto lamang makakat-on ug magasulti sa putling pinulongan ang mahimong malipayong mga maluwas.

16. Unsay kinahanglang buhaton aron pagatagoan “sa adlaw sa kasuko ni Jehova”?

¹⁶ Maingon nga maoy hukom ni Jehova nga ang Juda ug Jerusalem pagalaglagon, ang Kakristiyanohan usab kinahanglang malaglag. Sa pagkamatuod, ang kalaglagan sa tanang bakak nga relihiyon haduol na, ug kadtong buot maluwas kinahanglang molihok dayon. Kinahanglang molihok sila “sa dili pa ang adlaw moagi sama sa tahop,” nga ipadpad dayon sa hangin, sama sa dihang ang humay itugpo sa hangin sa hawanang giokanan. Aron maluwas gikan sa kapungot sa Diyos, kinahanglang kita magasulti sa putling pinulongan ug mosanong sa pasidaan sa Diyos sa dili pa modangat kanato ang adlaw sa nagdilaab nga kasuko ni Jehova. Sa adlaw ni Sofonias ug karong adlawa, ang mga maaghop nagapangita kang Jehova nga Diyos, uban sa pagkamatarong ug pagkamaaghop. Ang atong pagpangita kang Jehova nagkahulogan sa paghigugma kaniya uban sa bug-os natong kasingkasing, kalag, hunahuna, ug kusog. (Marcos 12:29, 30) “Tingali [kadtong nagabuhat niana] matagoan sa adlaw sa kasuko ni Jehova.” Apan nganong ang tagna nagaingon “tingali”? Tungod kay ang kaluwasan nagaagad sa pagkamatinumanon ug paglahutay. (Mateo 24:13) Kadtong nagasunod sa matarong nga mga sukdanan sa Diyos ug nagapadayon sa pagsulti sa putling pinulongan pagatagoan sa adlaw sa kasuko ni Jehova.

17. Unsang mga pangutana ang ato pang pagatagdon?

¹⁷ Sanglit ang adlaw sa kasuko ni Jehova haduol na ug ang kaluwasan nagadepende sa pagkat-on ug paggamit sa putling pinulongan, karon mao na ang panahon nga dulot malangkit sa pagtuon ug pagsulti niini. Apan sa unsang paagi ang usa ka tawo makatuon sa putling pinulongan? Ug sa unsang paagi ikaw makabatog kaayohan sa pagsulti niini?

Unsaon Nimo Pagtubag?

◻ Sa unsang paagi misugod ang sinultihan sa tawo?

◻ Unsa ang putling pinulongan?

◻ Nganong ang mga pulong sa Sofonias 3:8, 9 makahuloganon kaayo karong adlawa?

◻ Unsay pagabuhaton nato aron pagatagoan “sa adlaw sa kasuko ni Jehova”?

[Hulagway sa panid 10]

Sa Babel, gipatibulaag sa Diyos ang katawhan pinaagi sa paglibog sa ilang pinulongan