Ang 1914 nga Kaliwatan—Nganong Makahuloganon?

“Nahibalo ang among mga magbabasa nga sa ubay-ubayng katuigan among gidahom nga kining Panahona matapos uban sa makalilisang nga panahon sa kasamok, ug among gidahom nga mahitabo kini nga kalit ug kusganon sa dili madugay tapos sa Oktubre, 1914.”​—Gikan sa The Watch Tower and Herald of Christ’s Presence, Mayo 15, 1911.

SUKAD sa 1879 ang magasin nga kaniadto nailhang The Watch Tower and Herald of Christ’s Presence (karon nailhang The Watchtower Announcing Jehovah’s Kingdom) subsob nagpunting sa 1914 ingong tiniman-an nga tuig diha sa tagna sa Bibliya. Sa nagsingabot ang tuig, gipahinumdoman ang mga magbabasa nga dahomon ang “makalilisang nga panahon sa kasamok.”

Kining impormasyona sa bisan diin gisangyaw sa mga Kristohanon, kinsa nagbase niana sa ilang pagsabot sa “pito ka panahon” ug “mga panahon sa mga Hentil” nga gihisgotan diha sa Bibliya.a Gisabot nila kining yugtoa nga 2,520 ka tuig​—sugod sa pagkapukan sa karaang Davidnong gingharian sa Jerusalem ug natapos sa Oktubre 1914.b​—Daniel 4:16, 17; Lucas 21:24, King James Version.

Niadtong Oktubre 2, 1914, si Charles Taze Russell, niadto presidente sa Watch Tower Bible and Tract Society, maisogong nagpahibalo: “Ang Hentil nga mga Panahon natapos na; miagi na ang madungganong adlaw sa ilang mga hari.” Pagkatinuod sa iyang mga pulong! Nga dili makita sa tawhanong mga mata, sa Oktubre 1914, ang usa ka hitabong mahinungdanon nga nakatay-og sa kalibotan nahitabo sa langit. Si Jesu-Kristo, ang permanenteng Manununod sa “trono ni David,” nagsugod sa iyang pagmando ingong Hari ibabaw sa tanang katawhan.​—Lucas 1:32, 33; Pinadayag 11:15.

‘Apan,’ tingali mangutana ka, ‘kon si Kristo nagsugod sa pagmando sa 1914, nganong ang mga kahimtang sa yuta nagkadaotan?’ Kay ang dili-makitang kaaway sa katawhan nga si Satanas naglungtad pa man. Hangtod sa 1914, si Satanas nakasulod pa sa langit. Kanang kahimtanga nausab sa pagkatukod sa Gingharian sa Diyos sa 1914. “Ang gubat miulbo sa langit.” (Pinadayag 12:7) Si Satanas ug iyang mga demonyo napildi ug gitambog nganhi sa yuta, nga may malaglagong mga epekto diha sa katawhan. Ang Bibliya mitagna: “Alaot ang yuta ug ang dagat, kay ang Yawa nanaog kaninyo, nga may dakong kasuko, kay nahibalo nga siya hamubo na lamang ug panahon.”​—Pinadayag 12:12.

Sa unang siglo K.P., si Jesus miingon nga ang iyang dili-makitang presensiya ingong bag-ong Hari sa yuta pagatiman-an sa usa ka makitang ilhanan. Siya gisukna: “Unsa unya ang ilhanan sa imong presensiya ug sa konklusyon sa sistema sa mga butang?” Iyang tubag? “Ang nasod motindog batok nasod ug ang gingharian batok gingharian, ug aduna unyay mga kanihit sa pagkaon ug mga linog sa usa ka dapit ngadto sa laing dapit. Kining tanang butang sinugdanan sa mga kasakit.”​—Mateo 24:3, 7, 8.

Sumala niana, ang gubat nga miulbo niadtong 1914 giubanan ug makalilisang nga mga kanihit sa pagkaon, sanglit ang kasaragang abot sa pagkaon nabalda sulod sa kapig upat ka tuig. Unsa na man “ang mga linog sa usa ka dapit ngadto sa lain?” Sa dekada tapos sa 1914, dili momenos sa napulo ka madaotong mga linog mipatay sa kapig 350,000 ka tawo. (Tan-awa ang kahon.) Sa pagkamatuod, ang 1914 nga kaliwatan nakaagom ug “sinugdanan sa mga kasakit.” Ug sukad niadto, ang mga kasakit regular nga nagahampak diha sa dagway sa kinaiyanhong mga katalagman, mga kagutmanan, ug daghan, daghang gubat.

Bisan pa niana, ang balita sa pagkatukod sa Gingharian sa Diyos sa 1914 maoy maayong balita tungod kay ang maong Gingharian magluwas niining yutaa gikan sa pagkalaglag. Sa unsang paagi? Maglaglag kini sa tanang bakak, salingkapawng mga relihiyon, hiwing mga kagamhanan, ug sa daotang impluwensiya ni Satanas. (Daniel 2:44; Roma 16:20; Pinadayag 11:18; 18:4-8, 24) Dugang pa, kini magpasulod sa usa ka bag-ong kalibotan diin “ang pagkamatarong magapabilin.”​—2 Pedro 3:13.

Wala madugay tapos sa Gubat sa Kalibotan I, ang sinserong mga Estudyante sa Bibliya, ingon nga nailhan niadto ang mga Saksi ni Jehova, nagsugod sa pag-ila sa ilang pribilehiyo maylabot sa laing bahin sa ilhanan sa presensiya ni Jesus ingong Hari. Si Jesu-Kristo mitagna: “Kining maayong balita sa gingharian igawali sa tibuok gipuy-ang yuta ingon nga usa ka pamatuod sa tanan nga nasod; ug unya ang kataposan moabot.”​—Mateo 24:14.

Gikan sa ginagmayng sinugdanan sa 1919, ang mga Saksi ni Jehova nagpadayon nga walay hunong sa pagsabwag “niining maayong balita.” Ingong sangpotanan, milyonmilyon gikan sa kapig 200 ka nasod karon ginatigom ingong mga ginsakpan sa Gingharian sa Diyos. Ug pagkadagkong mga panalangin ang nagapaabot sa maong mga ginsakpan! Papason sa Gingharian ang gubat, kagutmanan, krimen, ug pagdaogdaog. Kini magpukgo gani sa sakit ug kamatayon!​—Salmo 46:9; 72:7, 12-14, 16; Proverbio 2:21, 22; Pinadayag 21:3, 4.

Una mahanaw ang 1914 nga kaliwatan, ang buluhaton sa pagwali sa Gingharian makatuman na sa iyang katuyoan. “Unya,” mitagna si Jesus, “aduna unyay dakong kasakitan nga wala pa sukad mahitabo sukad sa sinugdanan sa kalibotan hangtod karon, wala, ni mahitabo pa kini pag-usab. Sa pagkamatuod, gawas pamub-on kadtong mga adlawa, walay unod ang mamaluwas; apan tungod sa mga pinili kadtong mga adlawa pamub-on.”​—Mateo 24:21, 22.

Ayaw himoa ang sayop nga nahimo sa una-1914 nga kaliwatan. Ang kahimtang dili magpadayong sama sa karon. Anaa sa unahan ang talagsaong kausaban. Apan alang niadtong molihok nga maalamon, adunay kahibulongang mga palaaboton.

Nan, pamati sa mga pulong sa propeta sa kakaraanan: “Pangitaa si Jehova, kamong tanan nga maaghop sa yuta . . . Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.” (Sofonias 2:3) Sa unsang paagi ikapadapat nato kining tambaga? Ang mosunod nga mga artikulo motabang sa pagtubag nianang pangutanaha.

[Footnote]

[Chart sa panid 7]

Mga Linog sa Dekada Tapos sa 1914

Petsa: Dapit: Nangamatay:

Enero 13, 1915 Avezzano, Italya 32,600

Enero 21, 1917 Bali, Indonesia 15,000

Pebrero 13, 1918 Kwangtung Probinsiya, Tsina 10,000

Oktubre 11, 1918 Puerto Rico (kasadpan) 116

Enero 3, 1920 Veracruz, Mexico 648

Septiyembre 7, 1920 Reggio di Calabria, Italya 1,400

Disyembre 16, 1920 Ningsia Probinsiya, Tsina 200,000

Marso 24, 1923 Szechwan Probinsiya, Tsina 5,000

Mayo 26, 1923 Iran (amihanan-silangan) 2,200

Septiyembre 1, 1923 Tokyo-Yokohama, Hapon 99,300

Gikan sa talaang “Dagkong mga Linog sa Kalibotan” diha sa librong Terra Non Firma, ni James M. Gere ug Haresh C. Shah.