Kini ba nga Panihapon May Kahulogan Alang Kanimo?

NALAMDAGAN sa takdol nga bulan ang yuta sa mabugnaw nga kahayag. Diha sa lawak sa itaas sa usa ka balay sa karaang Jerusalem, 12 ka tawo nagtigom libot sa lamesa. Ang 11 naminaw pag-ayo samtang gisugdan sa ilang Magtutudlo ang labing makahuloganong selebrasyon ug mihatag ug mga pamulong nga hinungdanon kaayo. Ang usa ka asoy

nag-ingon:

“Si Jesus [Kristo] mikuhag tinapay ug, human nakapanalangin, iyang gipikaspikas kini ug, gihatag kini ngadto sa iyang mga tinun-an, siya miingon: ‘Kumuha kamo, kumaon kamo. Kini nagkahulogan sa akong lawas.’ Usab, gikuha niya ang kopa ug, human nakapasalamat, iyang gihatag kini kanila, nga nag-ingon: ‘Uminom kamo gikan niini, kamong tanan; kay kini nagkahulogan sa akong “dugo sa pakigtugon,” nga igaula alang sa daghan sa kapasayloan sa mga sala. Apan sultihan ko kamo, dili na ako moinom pag-usab niining duga sa parras hangtod niadtong adlawa nga moinom ako niini uban kaninyo diha sa gingharian sa akong Amahan.’ Sa kataposan, human nakaawit, sila nangadto sa Bukid sa mga Olibo.”​—Mateo 26:26-30.

Kini nahitabo human sa pagsalop sa adlaw sa ika-14 nga adlaw sa Hudiyohanong bulan sa Nisan sa tuig 33 sa atong Komong Panahon. Mao pay pagtapos ni Jesus ug sa iyang mga apostoles sa pagsaulog sa Paskuwa sa paghandom sa kagawasan sa Israel gikan sa pagkaulipon sa Ehipto sa ika-16 nga siglo W.K.P. Gipagawas na ni Kristo si Judas Iscariote, nga hapit nang moluib kaniya. Busa, si Jesus lamang ug ang iyang 11 ka maunongong mga apostoles ang presente didto.

Kini nga panihapon dili sumpay sa Hudiyohanong Paskuwa. Usa ka bag-ong okasyon kadto nga sa ulahi gitawag nga ang Panihapon sa Ginoo. Mahitungod niini nga pagsaulog, gisugo ni Jesus ang iyang mga sumusunod: “Ipadayon ninyo pagbuhat kini sa paghandom kanako.” (Lucas 22:19, 20; 1 Corinto 11:24-26) Nganong miingon man siya niini? Ug sa unsang paagi kining kasiglohan nag edad nga hitabo basin may kahulogan alang kanimo?