Gigantihan “sa Purongpurong nga Kinabuhi”

NGADTO sa manulonda sa kongregasyon sa Smirna, si apostol Juan gisugo sa pagsulat: “Pamatud-i ang imong kaugalingon nga maunongon hangtod sa kamatayon, ug hatagan ko ikaw sa purongpurong nga kinabuhi.” (Pinadayag 2:8, 10) Busa, makaguol ug makapalipay mao ang pahibalo dinhi nga natapos ni Frederick William Franz, presidente sa Watch Tower Bible and Tract Society of Pennsylvania ug sa Watchtower Bible and Tract Society of New York, Inc., maingon man sa ubay-ubay pang ubang teokratikanhong mga lawas, ang iyang yutan-ong dalan sa buntag sa Disyembre 22, 1992.

Makaguol kini nga pahibalo sa pagkaagi nga nagpahayag kini sa kataposan sa yutan-ong mga kalihokan sa minahal kaayo ug talagsaon matinumanong alagad ni Jehova. Bisan pa, makapalipay usab nga pahibalo kini tungod kay ikapadapat na sa atong minahal nga Igsoong Franz karon ang mga pulong sa Pinadayag 14:13: “Malipayon ang nangamatay diha sa Ginoo gikan karon. Oo, nagaingon ang espiritu, pasagdi nga mopahulay na sila gikan sa ilang mga paghago, kay ang ilang binuhatan magauban man kanila.” Si Igsoong Franz maoy makasaranganon ug mapainubsanon, kugihan ug mabungahon kaayong ministro nga kusganong gigamit ni Jehova nga Diyos ingong sakop sa “matinumanon ug maalamong ulipon” aron sa pagtabang sa pagtaganag espirituwal nga pagkaon alang sa “mga panimalay” ug sa ilang mga kauban.​—Mateo 24:45-47.

Si Igsoong Franz natawo sa Septiyembre 12, 1893, sa Covington, Kentucky. Siya nakadungog sa kamatuoran gikan sa iyang magulang nga igsoong lalaki. Niadtong panahona siya nag-eskuyla pa sa University of Cincinnati, nangandam nga mahimong Presbyteriano nga ministro. Apan, siya mibulag gikan sa Simbahang Presbyteriano ug nakig-uban sa mga Estudyante sa Bibliya, nga maoy pagtawag sa mga Saksi ni Jehova niadtong panahona. Siya gibawtismohan sa Nobyembre 30, 1913, ug sa pagkasunod tuig siya miundang sa unibersidad ug misulod sa colporteur (payunir) nga buluhaton. Sa Hunyo 1, 1920, siya nahimong membro sa pamilya sa Brooklyn Bethel. Wala magdugay, siya ang gibutang sa pagdumala sa colporteur desk, ug sa 1926 gibalhin siya sa departamento sa editoryal, diin siya nag-alagad nga mabungahon kaayo. Sa 1945 siya nahimong bise presidente sa Watch Tower Society ug ubang nalangkit nga mga lawas. Sa dihang namatay ang presidente niadto nga si Nathan H. Knorr sa 1977, siya ang nahimong presidente sa Watch Tower Society. Siya nag-alagad sa maong kapasidad hangtod sa iyang kamatayon. Sa iyang tibuok-kinabuhi, nakita ni Igsoong Franz ang gidaghanon sa mga Saksi ni Jehova nga miuswag gikan sa pipila ka libo ngadto sa duolan sa upat ug tunga ka milyon. Iyang natagamtam ang daghang pribilehiyo sa pag-alagad, lakip na ang paghatag ug pakigpulong sa internasyonal nga mga kombensiyon ug sa pagduaw sa mga sanga ug sa mga balay sa mga misyonaryo sa daghang bahin sa kalibotan. Ang sugilanon sa iyang kinabuhi migula sa Mayo 1, 1987, isyu sa Ang Bantayanang Torre.

Sa Lunes sa gabii, Disyembre 28, 1992, ang serbisyo sa paglubong gihimo sa Kingdom Hall sa Brooklyn Bethel. Usa ka mainiton ug makapalig-on sa espirituwal nga pakigpulong ang gihatag ni Igsoong Albert D. Schroeder sa Nagamandong Lawas. Gikonektar pinaagi sa telepono mao ang mga pamilya sa Bethel sa Watchtower Farms, Patterson, Mountain Farm, ug Kingdom Farm, maingon man sa pamilyang Bethel sa sangang buhatan sa Canada.

Ang tanan, ilabina niadtong suod nga nagtrabaho uban kaniya, mingawon gayod kang Igsoong Franz. Siya maoy masinabtanon, madasigon, ug mapailobon sa tanan nga iyang gialagaran ug nakauban sa biyahe. Sa pagkatinuod, ang isigkamagtutuo mosanong kaniya diha sa espiritu sa Hebreohanon 13:7: “Hinumdomi kadtong nagapanguna kaninyo, nga nagasulti kaninyo sa pulong sa Diyos, ug samtang palandongon ninyo ang gisangpotan sa ilang kinabuhi sunda ang ilang pagtuo.”

Sa Disyembre 30, 1992, si Igsoong Milton G. Henschel ang napili ingong ikalimang presidente, nga maoy mopuli kang Igsoong Franz.

[Mga hulagway sa panid 31, 32]

Frederick W. Franz sa 1913

Diha sa pabrika sa Sosyedad sa Myrtle Avenue sa 1920

Uban kang Nathan H. Knorr sa Yankee Stadium sa 1953