Nagapasaylo Ka ba Sama sa Pagpasaylo ni Jehova?

“Kon inyong pasayloon ang mga tawo sa ilang kalapasan, ang inyong langitnong Amahan mopasaylo usab kaninyo; apan kon dili ninyo pasayloon ang mga tawo sa ilang kalapasan, dili usab kamo pasayloon sa inyong Amahan sa inyong kalapasan.”​—MATEO 6:14, 15.

 1, 2. Unsang matanga sa Diyos ang atong gikinahanglan, ug ngano?

“SI Jehova maluluy-on ug mapuangoron, mahinay sa kasuko ug dagaya sa mahigugmaong-kalulot. Siya dili nagapangitag sayop kanunay, ni nagahambin siyag kasuko hangtod sa hangtod. Wala niya buhata kanato ang angay sa atong mga sala; ni nagapahamtang siya kanato sa angay sa atong mga kasaypanan. Kay ingon nga ang mga langit hataas ibabaw sa yuta, ang iyang mahigugmaong-kalulot dako kaayo ngadto kanila nga may kahadlok kaniya. Ingon ka layo sa silangan gikan sa kasadpan, iyang gipahilayo gikan kanato ang mga kalapasan. Sama sa amahan nga nagpakitag kaluoy sa iyang mga anak, si Jehova nagpakitag kaluoy ngadto kanila nga may kahadlok kaniya. Kay siya mismo nahibalo pag-ayo sa atong pagkagama, nahinumdom nga kita mga abog.”​—Salmo 103:8-14.

² Kay gipanamkon sa sala ug gipanganak sa kasaypanan nga nakapanunod ug mga pagkadili-hingpit nga naningkamot kanunay sa pagbihag kanato sa kasugoan sa sala, kita nagkinahanglan ug usa ka Diyos nga “nahinumdom nga kita mga abog.” Tulo ka gatos ka tuig human sa matahom kaayong paghubit ni David kang Jehova diha sa ika-103 nga Salmo, ang laing magsusulat sa Bibliya, si Miqueas, midayeg niining samang Diyos sa ingon gayod nga paagi tungod sa iyang maluloy-ong pagpasaylo sa mga sala nga nahimo: “Kinsa ba ang diyos nga sama kanimo: nga nagapalabay sa kasaypanan, nagapasaylo sa kalapasan, nga wala maghambin ug kasuko hangtod sa hangtod apan malipay sa pagpakitag kaluoy? Sa makausa pa kaluy-i kami, tumbi ang among mga kasaypanan, itambog sa kahiladman sa dagat ang tanan namong mga sala.”​—Miqueas 7:18, 19, The Jerusalem Bible.

 3. Unsay kahulogan sa pagpasaylo?

³ Sa Gregong Kasulatan, ang pulong alang sa “pasaylo” nagkahulogang “buhian.” Matikdi nga si David ug Miqueas, nga gikutlo sa itaas, naghatag sa samang kahulogan diha sa madanihon, mabatbatong mga pulong. Aron bug-os masabtan ang kahibulongang sukod sa pagpasaylo ni Jehova, atong sublion ang pipila sa daghang panig-ingnan nga gipakitaan niana. Ang una nagpakita nga ang hunahuna ni Jehova mahimong mabag-o gikan sa paglaglag ngadto sa pagpasaylo.

Si Moises Nagpakiluoy​—Si Jehova Namati

 4. Human sa unsang kapahayagan sa gahom ni Jehova nga ang mga Israelinhon nahadlok gihapon sa pagsulod sa Yutang Saad?

⁴ Gidala ni Jehova nga luwas ang nasod sa Israel gawas sa Ehipto ug duol sa yuta nga iyang gisaad kanila ingong yutang pagapuy-an, apan sila midumili sa pagpadayon, kay nangahadlok sa mga tawo sa Canaan. Human nakakita sa pagluwas ni Jehova kanila gikan sa Ehipto pinaagig napulo ka hampak, sa pagbukas sa dalan nga kaikyasan latas sa Pulang Dagat, sa paglaglag sa Ehiptohanong kasundalohan nga misulay sa pagsunod kanila, sa paghatag kanila diha sa Bukid sa Sinai sa pakigtugon sa Kasugoan nga naghimo kanilang piniling nasod ni Jehova, ug milagrosong nagtagana sa adlaw-adlaw ug manna gikan sa langit aron sa pagpakaon kanila, sila nahadlok sa pagsulod sa Yutang Saad tungod sa pipila ka samag-higanteng mga taga-Canaan!​—Numeros 14:1-4.

 5. Sa unsang paagi ang duha ka matinumanong espiya misulay sa pagdasig sa Israel?

⁵ Si Moises ug Aaron naglibog sa kahadlok sa katawhan sa mga tawo. Si Josue ug Caleb, duha ka matinumanong espiya, naningkamot sa pagdasig sa Israel: ‘Ang yuta maoy usa ka maayo, maayo kaayong yuta, usa ka yuta nga nagaagay sa gatas ug dugos. Ayaw kahadloki ang mga tawo; si Jehova uban kanato!’ Imbes madasig sa maong mga pulong, ang nangahadlok, rebelyosong mga tawo misulay sa pagbato kang Josue ug Caleb.​—Numeros 14:5-10.

 6, 7. (a) Unsay gihukom ni Jehova nga pagabuhaton sa dihang midumili ang Israel sa pagpadayon sa pagsulod sa Yutang Saad? (b) Nganong si Moises mitutol sa paghukom ni Jehova sa Israel, ug uban sa unsang sangpotanan?

⁶ Nasuko si Jehova! “Sa kataposan si Jehova miingon kang Moises: ‘Hangtod kanus-a ba mohunong kining mga tawhana sa dili pagtahod kanako, ug hangtod kanus-a nga sila dili motuo kanako bisan pa sa tanang mga ilhanan nga akong gibuhat sa taliwala kanila? Ipahamtang ko kanila ang kamatay ug pagaabogon ko sila, ug himoon ko ikaw nga usa ka nasod nga labi pang dako ug labi pang kusgan kay kanila.’ Apan si Moises miingon kang Jehova: ‘Nan makadungog niini ang mga Ehiptohanon nga ikaw pinaagi sa imong gahom nagkuha niining katawhan gikan sa ilang taliwala. Ug isugilon nila kini ngadto sa mga pumoluyo niining yutaa. . . . Kon imong pamatyon kining katawhan ingong usa ka tawo, nan ang mga nasod nga nakadungog sa imong kabantog moingon gayod niini, “Tungod kay si Jehova dili makahimo sa pagdala niining mga tawhana ngadto sa yuta nga iyang gisaad ngadto kanila mao nga iyang gipatay sila sa kamingawan.”’”​—Numeros 14:11-16.

⁷ Si Moises nangayog pasaylo, alang sa ngalan ni Jehova: “‘Pasayloa, palihog, ang kasal-anan niining mga tawhana sumala sa kadako sa imong mahigugmaong-kalulot, ug sama sa imong pagpasaylo niining mga tawhana sukad pa sa Ehipto hangtod karon.’ Unya si Jehova miingon: ‘Ako magapasaylo sumala sa imong pulong.’”​—Numeros 14:19, 20.

Ang Idolatriya ni Manases ug ang Pagpanapaw ni David

 8. Unsang matanga sa rekord ang gihimo ni Haring Manases sa Juda?

⁸ Ang usa ka talagsaong panig-ingnan sa pagpasaylo ni Jehova mao ang kaso ni Manases, ang anak nga lalaki sa buotang Haring Ezekias. Si Manases 12 anyos pa sa dihang siya nagsugod sa pagmando sa Jerusalem. Nagtukod siya ug hatag-as nga mga dapit, nagtukod ug mga halaran kang Baal, nagpatindog ug sagradong mga tukon, miyukbo sa kabituonan sa langit, naghimog salamangka ug paglamat, nagpakitabang sa mga espiritista ug sa mga mananagna, nagbutag kinulit nga larawan diha sa templo ni Jehova, ug nagpaagi sa iyang kaugalingong mga anak nga lalaki diha sa kalayo didto sa Walog sa Hinnom. “Gihimo niya ang tanan nga daotan sa mga mata ni Jehova” ug “nagpadayon sa pagtintal sa Juda ug sa mga molupyo sa Jerusalem sa pagbuhat sa labi pa ka daotan kay sa gibuhat sa mga nasod nga gilaglag ni Jehova atubangan sa mga anak sa Israel.”​—2 Cronicas 33:1-9.

 9. Sa unsang paagi naluoy si Jehova kang Manases, ug uban sa unsang resulta?

⁹ Sa kataposan, gipadala ni Jehova ang mga Asiryanhon batok sa Juda, ug gidakop nila si Manases ug gidala siya sa Babilonya. “Ug sa dinha nga siya diha sa kalisdanan, iyang gipangita ang kaluoy ni Jehova nga iyang Diyos ug nagpaubos pag-ayo sa iyang kaugalingon atubangan sa Diyos sa iyang mga amahan. Ug siya nagpadayon sa pag-ampo Kaniya, mao nga Siya nalukmay niya ug Siya nagpatalinghog sa iyang pagpangayog pabor ug gidala siya pagbalik sa Jerusalem ug ngadto sa iyang gingharian.” (2 Cronicas 33:11-13) Unya giwagtang ni Manases ang langyawng mga diyosdiyos, mga idolo, ug mga halaran ug gilabay niya kini gawas sa siyudad. Siya misugod sa pagtanyag ug mga halad sa halaran ni Jehova ug gisugdan ang Juda sa pag-alagad sa matuod nga Diyos. Kini maoy katingalahang pagpakita sa pagkaandam ni Jehova sa pagpasaylo kon ang pagpaubos, pag-ampo, ug pagtul-id sa kalapasan mamungag mga bunga nga angayan sa paghinulsol!​—2 Cronicas 33:15, 16.

10. Sa unsang paagi misulay si David sa pagtabon sa iyang sala uban sa asawa ni Uria?

¹⁰ Ang sala sa pagpanapaw ni Haring David uban sa asawa ni Uria nga Hitihanon gibantog. Dili lamang kay siya nakapanapaw uban kaniya kondili usab mihimog paagi sa pagtabon sa sala sa dihang siya namabdos. Gipapauli sa Hari si Uria gikan sa gubat, naglaom nga mopauli siya ngadto sa iyang balay ug modulog sa iyang asawa. Apan, agig pagtahod sa iyang isigkasundalo didto sa panggubatan, si Uria mibalibad. Unya gidapit siya ni David sa pagpangaon ug gihubog siya, apan si Uria wala gihapon modulog sa iyang asawa. Nan si David nagpadalag mensahe ngadto sa iyang heneral nga ibutang si Uria sa mainit nga panag-away aron si Uria mamatay, nga mao ang nahitabo.​—2 Samuel 11:2-25.

11. Sa unsang paagi naghinulsol si David sa iyang sala, apan unsay iyang giantos?

¹¹ Gipadala ni Jehova ang iyang manalagnang si Nathan ngadto kang David aron ibutyag ang sala sa hari. “Karon si David miingon kang Nathan: ‘Ako nakasala batok kang Jehova.’ Niini si Nathan miingon kang David: ‘Si Jehova, sa baylo, nagpalabay sa imong sala. Ikaw dili mamatay.’” (2 Samuel 12:13) Gibati ni David ang grabeng pagkasad-an tungod sa iyang sala ug nagpahayag sa iyang paghinulsol diha sa kinasingkasing nga pag-ampo ngadto kang Jehova: “Kay ikaw dili malipay sa mga halad​—kay unta ihatag ko kini; ikaw walay kahimuot sa halad nga sinunog. Ang mga halad sa Diyos mao ang nadugmok nga espiritu; ang usa nga nadugmok ug usa ka nagun-ob nga kasingkasing, Oh Diyos, dili mo pagatamayon.” (Salmo 51:16, 17) Si Jehova wala magtamay sa pag-ampo ni David nga gitanyag gikan sa nagun-ob nga kasingkasing. Sa gihapon, si David nag-antos sa mabug-at nga silot, nga uyon sa gipahayag ni Jehova bahin sa pagpasaylo sa Exodo 34:6, 7: “Dili gayod niya palabyon ang sad-an nga dili silotan.”

Pagpahinungod ni Solomon sa Templo

12. Unsay gihangyo ni Solomon sa panahon sa pagpahinungod sa templo, ug unsay tubag ni Jehova?

¹² Sa dihang natapos ni Solomon ang pagtukod sa templo ni Jehova, siya miingon diha sa iyang pag-ampo sa pagpahinungod: “Mamati ka sa mga pagpangamuyo sa imong alagad ug sa imong katawhan nga Israel sa diha nga sila mag-ampo paatubang niining dapita, nga mamati ka mismo gikan sa imong dapit nga puloy-anan, gikan sa mga langit; ug ikaw mamati ug magpasaylo.” Si Jehova mitubag: “Kon takpan ko ang mga langit aron walay mahitabong ulan ug kon sugoon ko ang dulon sa paglamoy sa yuta ug kon magpadala ako ug kamatay taliwala sa akong katawhan, ug ang akong katawhan nga ginganlan sa akong ngalan magmapainubsanon sa ilang kaugalingon ug mag-ampo ug mangita sa akong nawong ug motalikod gikan sa ilang daotang mga dalan, nan ako mismo magapatalinghog gikan sa mga langit ug magapasaylo sa ilang sala, ug magaayo ako sa ilang yuta.”​—2 Cronicas 6:21; 7:13, 14.

13. Unsay gipakita sa Ezekiel 33:13-16 mahitungod sa panglantaw ni Jehova sa usa ka tawo?

¹³ Samtang si Jehova motan-aw kanimo, dawaton ka niya kon unsa ka karon, dili kay kon unsa ka kaniadto. Kini unya sama sa giingon sa Ezekiel 33:13-16: “Sa diha nga ako moingon sa tawong matarong: ‘Ikaw tino gayod nga mabuhi,’ ug siya mismo mosalig sa iyang kaugalingong pagkamatarong ug magabuhat sa kadaotan, walay usa sa iyang matarong nga mga buhat ang pagahinumdoman, apan sa kasal-anan nga iyang nahimo​—siya mamatay tungod niini. Ug sa dihang ako moingon sa tawong daotan: ‘Mamatay ka gayod,’ ug siya mobiya sa iyang sala ug magabuhat niana nga uyon sa hustisya ug pagkamatarong, ug iuli sa tawong daotan ang butang nga gikuha nga garantiya sa usa ka hulam, ibalik ang butang nga iyang gikawat, ug magalakaw siya sa kabalaoran sa kinabuhi sa dili pagbuhat ug kasal-anan, siya mabuhi gayod. Siya dili mamatay. Walay usa sa iyang mga sala nga iyang nahimo ang pagahinumdoman pa batok kaniya. Gibuhat niya ang uyon sa hustisya ug pagkamatarong. Siya mabuhi gayod.”

14. Unsa ang talagsaong bahin sa pagpasaylo ni Jehova?

¹⁴ Ang pagpasaylo nga ihatag sa Diyos nga Jehova alang kanato adunay talagsaong bahin, usa nga malisod alang sa tawhanong mga linalang nga ilakip uban sa pagpasaylo nga ilang itanyag ngadto sa usag usa​—siya nagapasaylo ug nagalimot. Ang ubang tawo moingon, ‘Makapasaylo ako sa imong gibuhat, apan dili gayod ako makalimot niana.’ Sa pagtandi, matikdi ang giingon ni Jehova nga iyang buhaton: “Pasayloon ko ang ilang kasal-anan, ug dili ko na gayod pagahinumdoman pa ang ilang sala.”​—Jeremias 31:34.

15. Unsa ang rekord ni Jehova sa pagpasaylo?

¹⁵ Si Jehova nagapasaylo sa iyang mga magsisimba sa yuta sulod sa kaliboan ka tuig. Siya nagapasaylo sa mga sala nga nahibaloan nilang gibuhat nila ingon man sa mga sala nga wala nila mahibaloi. Ang iyang tagana sa kaluoy, hataas-nga-pailob, ug pagpasaylo walay kataposan. Ang Isaias 55:7 nag-ingon: “Pabiyai sa daotan ang iyang dalan, ug sa tawo nga dili matarong ang iyang mga hunahuna; ug pabalika siya kang Jehova, kinsa may kaluoy kaniya, ug sa atong Diyos, kay siya mopasaylo sa madagayaon gayod.”

Pagpasaylo Diha sa Kristohanon Gregong Kasulatan

16. Nganong kita makaingon nga ang pagpasaylo ni Jesus nahiuyon nianang kang Jehova?

¹⁶ Ang mga asoy sa pagpasaylo sa Diyos puno sa rekord diha sa Kristohanon Gregong Kasulatan. Gihisgotan kana ni Jesus sa makadaghan, nga nagpakita nga siya nahiuyon sa panghunahuna ni Jehova bahin sa maong butang. Ang panghunahuna ni Jesus nagagikan kang Jehova, siya nagapabanaag kang Jehova, siya ang eksaktong hulad sa dagway ni Jehova; ang pagkakita kaniya maoy pagkakita kang Jehova.​—Juan 12:45-50; 14:9; Hebreohanon 1:3.

17. Sa unsang paagi giilustrar ni Jesus nga si Jehova mopasaylo sa “madagayaon gayod”?

¹⁷ Nga si Jehova nagapasaylo sa madagayaon gayod gipaila diha sa usa sa mga sambingay ni Jesus, bahin sa usa ka hari kinsa nagpasaylo sa usa ka ulipon nga nakautang ug 10,000 ka talento (mga $33,000,000, T.B.). Apan sa dihang ang maong ulipon wala magpasaylo sa iyang isigkaulipon nga nakautang kaniyag usa ka gatos ka denaryo (mga $60, T.B.), ang hari nasuko. “‘Tuman-kadaotan nga ulipon, akong gipanas kadtong tanang utang alang kanimo, sa dihang nangaliyupo ka kanako. Dili ka ba usab, sa baylo, angay maluoy sa imong isigkaulipon, ingon nga ako naluoy man usab kanimo?’ Niana ang iyang agalon, nga napungot, nagtugyan kaniya sa mga tigbilanggo, hangtod nga iyang kabayran ang tanang nautang.” Unya si Jesus mihimog kapadapatan: “Sa samang paagi usab ang akong langitnong Amahan makiglabot kaninyo kon ang matag usa kaninyo dili magpasaylo sa iyang igsoon gikan sa inyong mga kasingkasing.”​—Mateo 18:23-35.

18. Sa unsang paagi ang panglantaw ni Pedro sa pagpasaylo ikatandi sa panglantaw ni Jesus?

¹⁸ Sa wala pa iasoy ni Jesus ang ilustrasyon sa itaas, si Pedro miduol kang Jesus ug nangutana: “Ginoo, pila ka higayon nga ang akong igsoon makasala batok kanako ug ako magpasaylo kaniya? Kutob ba sa pito ka higayon?” Naghunahuna si Pedro nga siya mapinasayloon na. Bisag kinutohan ang pagpasaylo sa mga eskriba ug mga Pariseo, si Jesus miingon kang Pedro: “Ako magaingon kanimo, dili, Kutob sa pito ka higayon, apan, Kutob sa kapitoag-pito ka higayon.” (Mateo 18:21, 22) Ang pito ka higayon dili gayod igo sa usa ka adlaw, kay si Jesus miingon: “Tagda ang inyong kaugalingon. Kon ang imong igsoon makahimog sala badlonga siya, ug kon siya maghinulsol pasayloa siya. Bisan pag siya makasala ug pito ka higayon sa usa ka adlaw batok kanimo ug siya mobalik kanimo sa pito ka higayon, nga mag-ingon, ‘Ako nagahinulsol,’ angay mo siyang pasayloon.” (Lucas 17:3, 4) Sa dihang magapasaylo si Jehova, siya dili mag-ihap sa sala​—makapalipay alang kanato.

19. Unsay kinahanglan natong buhaton aron pasayloon ni Jehova?

¹⁹ Kon kita mapainubsanon sa paghinulsol ug sa pagtug-an sa atong mga sala, si Jehova andam sa pagpasaylo kanato: “Kon atong isugid ang atong mga sala, siya kasaligan ug matarong aron sa pagpasaylo kanato sa atong mga sala ug sa paghinlo kanato gikan sa tanang pagkadili-matarong.”​—1 Juan 1:9.

20. Unsang pagkaandam sa pagpasaylo sa sala ang gipakita ni Esteban?

²⁰ Ang tinun-an ni Jesus nga si Esteban, diha sa talagsaong espiritu sa pagpasaylo, misinggit niini nga pangamuyo samtang gibato siya sa nasuko nga magubtanong panon: “‘Ginoong Jesus, dawata ang akong espiritu.’ Unya, nga mipiko sa iyang mga tuhod, siya mituaw sa usa ka kusog nga tingog: ‘Jehova, ayaw idat-og kining salaa batok kanila.’ Ug human sa pagsulti niini siya nahikatulog sa kamatayon.”​—Buhat 7:59, 60.

21. Nganong talagsaon kaayo ang pagkaandam sa pagpasaylo ni Jesus sa Romanong mga sundalo?

²¹ Si Jesus nagpakita ug labi pa ka talagsaong panig-ingnan sa pagkaandam sa pagpasaylo. Gidakop siya sa iyang mga kaaway, sa ilegal nga paagi naghusay kaniya, gihukman siya, gibiaybiay siya, gilud-an siya, gilatigo siya sa latigo nga may daghang kawilkawil nga malagmit may mga tipik sa bukog ug metal diha niana, ug sa kataposan gilansang siya sa estaka sa daghang oras. Ang mga Romano nalangkit ug dako niini. Bisan pa, samtang si Jesus himalatyon diha nianang sakitanang estaka, siya miingon ngadto sa iyang langitnong Amahan mahitungod sa mga sundalo nga naglansang kaniya: “Amahan, pasayloa sila, kay sila wala mahibalo sa ilang ginabuhat.”​—Lucas 23:34.

22. Unsang mga pulong gikan sa Wali sa Bukid ang kinahanglan natong paningkamotang ipadapat?

²² Sa iyang Wali sa Bukid, si Jesus miingon: “Padayon sa paghigugma sa inyong mga kaaway ug sa pag-ampo alang sa mga nagalutos kaninyo.” Hangtod sa kataposan sa iyang yutan-ong ministeryo, iyang gipadapat ang maong prinsipyo sa iyang kaugalingon. Kana ba mabug-at ra kaayo alang kanato, kinsa nakigbisog sa mga kahuyangan sa atong makasasalang unod? Labing menos kinahanglan maningkamot kita sa pagpadapat sa mga pulong nga gitudlo ni Jesus sa iyang mga tinun-an human hatagi sila sa sulondang pag-ampo: “Kon inyong pasayloon ang mga tawo sa ilang kalapasan, ang inyong langitnong Amahan mopasaylo usab kaninyo; apan kon dili ninyo pasayloon ang mga tawo sa ilang kalapasan, dili usab kamo pasayloon sa inyong Amahan sa inyong kalapasan.” (Mateo 5:44; 6:14, 15) Kon kita magapasaylo sama nga si Jehova nagapasaylo, kita magapasaylo ug magalimot.

Nahinumdom Ka Ba?

◻ Sa unsang paagi si Jehova nakiglabot sa atong mga kasal-anan, ug ngano?

◻ Nganong si Manases gipasig-uli sa iyang pagkahari?

◻ Unsang talagsaong bahin sa pagpasaylo ni Jehova nga maoy usa ka hagit sa mga tawo nga pagasundogon?

◻ Sa unsang paagi ang pagkaandam ni Jesus sa pagpasaylo talagsaon kaayo?

[Hulagway sa panid 24]

Gitabangan ni Nathan si David nga makita ang panginahanglan sa pagpasaylo sa Diyos