Ang Napulo ka Sugo
ANG obispo sa Gloucester sa Inglaterra nakadiskobre nga kapin sa katunga sa mga klerigo sa iyang nasakopan dili makasitar sa Napulo ka Sugo, ug 10 porsiyento kanila wala mahibalo kon asa kini makaplagan sa Bibliya. Hinuon kadto maoy 450 ka tuig na kanhi. Miarang-arang ba ang kahimtang sukad niadto? Wala gayod—sumala sa gibutyag sa dili pa dugayng walay-pili nga surbi sa Sunday Times sa Anglikanong mga klerigo.
Sa 200 ka klerigong giinterbiyo, 34 porsiyento lamang ang makasitar sa tanang Napulo ka Sugo. Apil sa nahibilin, ang usa nagtuo nga daghan ra kaayo ang mga pagdili niini, ug ang uban misalikway niini ingong dili hinungdanon sa modernong mga problema sa moral.
Nahibalo ka ba sa Napulo ka Sugo o kon asa kini makaplagi? Narekord kini sa Exodo, ang ikaduhang basahon sa Bibliya, sa unang 17 ka bersikulo sa kapitulo 20. Nganong dili basahon kini? Ania ang sayon nga paagi sa pagklasipikar niana. Ang unang upat naghisgot sa atong pagsimba sa Diyos, ang ikalima nagpasiugdag pamilyahanong kinabuhi, ang ikaunom hangtod sa ikasiyam nagtagad sa atong relasyon sa atong isigkatawo, ug ang ikanapulo maoy talagsaon, nga nagpukaw kanato sa pagsusi sa atong kasingkasing, aron tinoon ang atong mga motibo. Ania ang mubo nga sumaryo kon unsaon sa mga Kristohanon sa pagpadapat sa mga prinsipyo.
Una: Hatagi ang atong Maglalalang ug eksklusibong debosyon. Ikaduha: Ayaw paggamit ug mga imahen sa pagsimba. Ikatulo: Tahora kanunay ug pasidunggi ang ngalan sa Diyos. Ikaupat: Hatagig higayon ang pagpamalandong sa espirituwal nga mga butang, nga walay kabaldahan. Ikalima: Mga anak, tahora ang inyong mga ginikanan. Ikaunom: Ayaw pagpatay. Ikapito: Ayaw panapaw. Ikawalo: Ayaw pangawat. Ikasiyam: Isulti ang kamatuoran. Ikanapulo: Isalikway ang pagkamaibogon.
Ang Napulo ka Sugo maoy bahin sa kodigo sa mga balaod nga gihatag kang Moises. Apan ang mga prinsipyo nga gihawasan niini walay kataposan. (Roma 6:14; Colosas 2:13, 14) Tungod niini, ang mga sumusunod ni Jesus mikutlo ug mihisgot sa Napulo ka Sugo. (Roma 13:8-10) Pagka-mas malipayon unta—ug mas luwas—ang kinabuhi karon kon ang tanan nagtahod ug nagkinabuhi pinaagi niining dinasig sa Diyos nga mga prinsipyo!
Buot ba Nimong Duawon?
Bisan niining gubot nga kalibotan, maangkon nimo ang kalipay gikan sa tukmang kahibalo sa Bibliya bahin sa Diyos, sa iyang Gingharian, ug sa iyang kahibulongang katuyoan alang sa katawhan. Kon buot nimo ang dugang impormasyon o buot nimong may moduaw sa imong balay sa pagdumala ug libreng pagtuon sa Bibliya uban nimo, palihog pagsulat sa Watch Tower, P.O. Box 2044, 1060 Manila, o sa nahiangay nga direksiyon nga nalista sa panid 2.