Mga Magmamantala sa Gingharian Nagtaho
Paggamit sa Tanang Kahigayonan
ANG mga Saksi ni Jehova nailhan sa tibuok kalibotan tungod sa ilang edukasyonal nga buluhaton bahin sa Bibliya. Apan sila usab nagdumalag mga programa nga magdalag ubang kaayohan ngadto sa katilingban. Kining publikong pag-alagad gidawat pag-ayo, ingon sa gipakita sa mosunod nga mga eksperyensiya gikan sa Ecuador.
◻ Ang mga tagdumala sa usa ka dakong pabrika sa bildo buot mag-organisar ug mga pakigpulong bahin sa mga prinsipyo sa pamilya alang sa ilang mga empleyado. Ang direktor sa tawhanong kahinguhaan nagdapit sa daghang Katolikong mga pari sa pag-apil apan walay misanong. Giingnan siya sa usa ka pari nga diyutay ra kaayong pari ang kuwalipikadong mosulti bahin sa ulohan nga lagmit walay makahimo niana. Sa pagkadungog niini, usa ka Saksi nga empleyado mihimog mga kahikayan nga ang usa ka igsoong lalaki nga tigsangyawan sa teritoryong negosyohan moduaw sa pabrika.
Pagkasunod adlaw, ang Saksi miduol sa direktor sa tawhanong kahinguhaan uban sa gisugyot nga kurso sa pagtuon. Usa ka listahan sa mga ulohan ang gikuha gikan sa lainlaing mga publikasyon sa Watch Tower Society. Nakadayeg ang direktor. Mipili siya ug tulo ka ulohan nga hisgotan—tawhanong mga relasyon, mga pamatasan diha sa trabahoan, ug mga pamatasan diha sa pamilya. Gihimo dayon ang mga kahikayan sa paghisgot sa impormasyon uban sa tanang trabahante.
Ang mga empleyado gibahinbahin sa pito ka grupo nga tag-30 ang kada usa, human niana tulo ka kuwalipikadong mga igsoong lalaki ang nagpresentar sa impormasyon ngadto kanila. Unsay mga resulta? Ubay-ubayng empleyado ang mihangyo nga duawon sa ilang mga balay, ug 216 ka giya sa pagtuon sa Bibliya ang napahimutang. Nakadayeg kaayo ang mga tagdumala nga mihangyo sila kon ang mga Saksi makaandam ba ug laing serye sa mga pakigpulong.
◻ Di pa dugay, ang Ecuador nagpasar ug balaod nga nagtugot nga sa eskuylahan ang relihiyon. Usa ka misyonaryang igsoon miduaw sa usa ka babayeng superintendente sa tunghaan sa elementarya ug nangutana kon unsay epekto sa bag-ong balaod. Misaysay ang superintendente nga gihimo ang paningkamot sa pagsugod sa usa ka programa bahin sa pagsimba kang Maria apan wala gayod kadto molampos. Sa dihang ang igsoong babaye miingon nga ang maong pagsimba makapahinabog mga suliran alang sa dili-Katolikong mga bata, miuyon ang superintendente. “Sa laing bahin,” matod sa misyonarya, “duna kamiy programa sa pagtudlo sa moral nga mga prinsipyo gikan sa Bibliya nga dili mag-obligar sa usa ka tawo sa pagdawat sa usa ka partikular nga relihiyon.” Mitubag ang superintendente: “Kanus-a ka makaanhi? Sunod ugma?” Human siya pakitai sa misyonarya sa librong Pagpatalinghog sa Dakong Magtutudlo, gikauyonan nga ilang konsiderahon ang kapitulong “Malipayon ang mga Makigdaiton.”
Pagbalik niya, ang misyonarya migugol ug tulo ka oras sa pagduaw sa pito ka lainlaing mga lawak-klasehanan nga niana namati ang superintendente. Human sa sesyon uban sa kinto grado nga klase, usa sa mga estudyante miingon: “Gining, palihog seguroang maduaw nimo ang siksto grado. Kanunay nila kaming sulayan sa pagkulata ug sugdan ang away!” Usa ka magtutudlo miingon: “Ang kapintasan hinungdanon kaayong ulohan. Nagkinahanglan kitag dugang panahon sa paghisgot niining ulohana.”
Gihimo ang mga kahikayan alang sa pagduaw pag-usab sa eskuylahan aron sa paghisgot sa mga tema sama sa pagkamasinugtanon ug pagpamakak. Hangtod karon, ang mga resulta maayo kaayo. Karon sa dihang ang misyonaryang igsoon maglakaw diha sa karsada, ang mga bata managan sa pagtimbaya kaniya ug pagsuknag mga pangutana bahin sa Bibliya. Ang uban mapasigarbohong magpailaila kaniya ngadto sa ilang mga ginikanan. Dugang pa, usa ka panagtuon sa Bibliya sa balay ang nasugdan uban sa duha ka estudyante.