Nahinumdom Ka Ba?

Gipabilhan ba nimo ang pagbasa sa di pa dugayng mga gula sa Ang Bantayanang Torre? Buweno, tan-awa kon imong matubag ang mosunod nga mga pangutana:

◻ Nganong ang ekspresyon ni Pablo nga “mga embahador kapuli kang Kristo” tukma gayod alang sa dinihogang mga Kristohanon? (2 Corinto 5:20)

Sa karaang kapanahonan, ang mga embahador gipadala ilabina sa mga yugto nga may kabingkilan aron sa pagsusi kon malikayan ba ang pakiggubat. (Lucas 14:31, 32) Sanglit ang makasasalang kalibotan sa katawhan nahimulag sa Diyos, gipadala niya ang iyang dinihogang mga embahador aron sa pagpahibalo sa katawhan sa iyang mga kondisyon alang sa kapasig-ulian, nga nag-awhag kanila nga makigdait sa Diyos.​—12/15, panid 18.

◻ Unsa ang upat ka butang nga nagpalig-on sa pagtuo ni Abraham?

Una, iyang gipasundayag ang iyang pagtuo kang Jehova pinaagi sa pagpatalinghog sa dihang misulti ang Diyos (Hebreohanon 11:8); ikaduha, ang iyang pagtuo suod nga nalangkit sa iyang paglaom (Roma 4:18); ikatulo, si Abraham kanunayng nakigsulti kang Jehova; ug ikaupat, gipaluyohan ni Jehova si Abraham sa dihang gisunod niya ang diyosnong giya. Ang mao gihapong mga butang makapalig-on sa atong pagtuo karon.​—1/1, mga panid 17, 18.

◻ Unsay kahulogan sa ekspresyong “Ayaw kami dad-a ngadto sa tintasyon”? (Mateo 6:13)

Naghangyo kita sa Diyos nga dili kita tugotang mapakyas sa dihang kita gitental sa pagsupak kaniya. Si Jehova makagiya kanato aron dili kita madala ug dili madaog ni Satanas, “ang tuman-kadaotang usa.” (1 Corinto 10:13)​—1/15, panid 14.

◻ Unsay gikinahanglang himoon sa usa aron makadawat sa kapasayloan sa Diyos tungod sa grabeng sala?

Ang pagsugid ngadto sa Diyos kinahanglang inubanan sa pagkamahinulsolon ug sa “mga bunga nga nahiangay sa paghinulsol.” (Lucas 3:8) Ang mahinulsolong espiritu ug ang tinguha sa pagtul-id sa sayop magtukmod usab sa usa sa pagpangayog espirituwal nga tabang sa Kristohanong mga ansiyano. (Santiago 5:13-15)​—1/15, panid 19.

◻ Nganong angay kitang maningkamot nga magmapaubsanon?

Ang mapaubsanong tawo mainantoson ug hataas-ug-pailob, ug wala niya isipa ang iyang kaugalingon nga hinungdanon kaayo. Ang pagkamapaubsanon magdanig tinuod nga mga higala nga nagmahal kanimo. Labing hinungdanon, magdala kinig panalangin ni Jehova. (Proverbio 22:4)​—2/1, panid 7.

◻ Unsa ang hinungdanong kalainan tali sa kamatayon ni Jesus ug sa iyaha ni Adan?

Takos ang kamatayon ni Adan, tungod kay iyang gituyo sa pagsupak ang iyang Maglalalang. (Genesis 2:16, 17) Sa kasukwahi, bug-os nga dili-takos ang kamatayon ni Jesus, tungod kay “wala siyay nahimong sala.” (1 Pedro 2:22) Busa sa dihang namatay si Jesus, siya nagbaton ug usa ka butang nga dako kaayog bili nga wala gipanag-iya ni Adan sa iyang pagkamatay​—ang katungod nga makabaton ug hingpit tawhanong kinabuhi. Sa ingon, ang kamatayon ni Jesus adunay haladnong bili sa paglukat sa katawhan.​—2/15, mga panid 15, 16.

◻ Diha sa panan-awon sa tagna ni Ezequiel, unsay gilarawan sa siyudad?

Sanglit ang siyudad nahimutang taliwala sa mahugaw (dili-balaan) nga yuta, usa gayod kini ka butang nga yutan-on. Busa, mopatim-aw nga kini naglarawan sa yutan-ong administrasyon nga makahatag ug kaayohan sa tanan nga molangkob sa matarong yutan-ong katilingban.​—3/1, panid 18.

◻ Nganong gihugasan ni Jesus ang tiil sa iyang mga tinun-an sa dihang nagsaulog sa Paskuwa sa 33 K.P.?

Si Jesus wala magsugod ug usa ka rituwal sa paghugas ug tiil. Hinunoa, iyang gitabangan ang iyang mga apostol sa pagsagop ug usa ka bag-ong tinamdan​—pagkamapaubsanon ug pagkaandam sa paghimog kinaubsang mga buluhaton tungod ug alang sa ilang mga igsoon.​—3/1, panid 30.

◻ Sa atong pagtudlo sa uban, unsay mas hinungdanon kay sa kinaiyanhong mga katakos?

Kini mao ang mga hiyas nga atong nabatonan ug ang espirituwal nga mga batasan nga atong naugmad nga arang masundog sa mga estudyante. (Lucas 6:40; 2 Pedro 3:11)​—3/15, mga panid 11, 12.

◻ Sa unsang paagi mapauswag sa mga mamumulong sa publiko ang ilang pagbasa sa Kasulatan?

Pinaagi sa pagbansay. Oo, pinaagi sa kusog nga pagbasa nga balikbalik hangtod mahimo nila kini sa larino nga paagi. Kon adunay mabatonan nga mga audiocassette sa Bibliya, maalamon nga maminaw sa paagi sa pagpasiugda sa diwa ug pag-usab-usab sa tingog sa magbabasa ug sa pagmatikod kon giunsa paglitok ang mga ngalan ug wala-maandi nga mga pulong.​—3/15, panid 20.

◻ Sa unsang paagi nga ‘ang espiritu mobalik sa Diyos’ sa dihang mamatay ang tawo? (Ecclesiastes 12:7)

Sanglit ang espiritu mao ang puwersa-sa-kinabuhi, kini “mobalik ngadto sa matuod nga Diyos” sa diwa nga ang bisan unsang paglaom sa umaabot alang nianang tawhana sa pagkakaron bug-os nasandig sa Diyos. Ang Diyos lamang ang makapasig-uli sa espiritu, o puwersa-sa-kinabuhi, nga magpahinabo nga ang tawo mabuhi pag-usab. (Salmo 104:30)​—4/1, panid 17.