Siya Mitabang sa Pagpakaylap sa Kahayag “Hangtod sa Kinatumyan sa Yuta”
SI APOSTOL Pablo gigamit sa pagpakaylap sa espirituwal nga kahayag “hangtod sa kinatumyan sa yuta.” Ingong resulta, daghan nga “sa husto nahimutang alang sa kinabuhing walay-kataposan nahimong mga magtutuo.”—Buhat 13:47, 48; Isaias 49:6.
Ang idlot nga tinguha sa pagpakaylap sa espirituwal nga kahayag nakita usab diha sa debotadong kinabuhi ug walay-hunong nga Kristohanong mga paningkamot ni William Lloyd Barry, usa ka membro sa Nagamandong Lawas sa mga Saksi ni Jehova. Namatay sa Brader Barry niadtong Hulyo 2, 1999, samtang nagpakigpulong sa usa ka distritong kombensiyon sa Hawaii.
Si Lloyd Barry natawo sa New Zealand niadtong Disyembre 20, 1916. Ang iyang inahan ug amahan unang nagpakitag aktibong kaikag sa mga kamatuoran sa Bibliya nga gipresentar diha sa mga publikasyon ni C. T. Russell, nga giapod-apod sa Watch Tower Bible and Tract Society. Busa, si Brader Barry nagdako diha sa usa ka debotadong Kristohanong panimalay.
Bisan ug interesado sa esport ug edukasyon, nga nakabaton pa gani ug titulo sa siyensiya, si Brader Barry padayong nagpunting pag-ayo sa iyang pagtagad diha sa espirituwal nga mga butang. Busa, sa Enero 1, 1939, misulod siya sa bug-os-panahong ministeryo, nga nahimong membro sa pamilyang Bethel sa buhatan sa Sosyedad sa Australia. Human idili sa kagamhanan ang Sosyedad sa 1941, nagpadayong puliki si Brader Barry sa buluhaton sa opisina, usahay gitudlo sa pagsulat ug materyal aron sa pagdasig sa mga isigkamagtutuo. Siya usab may maayong sumbanan sa pagpanguna diha sa publikong ministeryo.
Sa Pebrero 1942, si Brader Barry naminyo sa laing bug-os-panahong alagad. Ang iyang mahigugmaong asawa, si Melba, matinumanong nakigtambayayong kaniya niining tanang katuigan sa daghang bahin sa yuta. Ilang gihimo ang dakong tikang sa pag-alagad sa langyawng kanataran pinaagi sa pagtambong sa ika-11 nga klase sa Watchtower Bible School of Gilead sa Tinipong Bansa. Ang ilang asaynment maoy ngadto sa giisip sa daghan nga “kinatumyan sa yuta”—ang Hapon. Sa pag-abot niadtong Nobyembre 1949, nagsugod sila sa pag-alagad ingong mga misyonaryo sa dunggoanang siyudad sa Kobe. Niadtong panahona, 12 lamang ka tawo ang nagsangyaw sa maayong balita sa Hapon. Si Brader Barry nakakat-on sa pinulongan ug mga kinaiya sa iyang bag-ong pinuy-anan ug nakaugmad ug halalom nga pagbati alang sa mga Hapon, nga iyang gialagaran sa misunod nga 25 ka tuig. Ang iyang gugma niadtong “sa husto nahimutang alang sa kinabuhing walay-kataposan” nakita sa nagtubo nga Kristohanong panag-igsoonay sa Hapon, nga nagtabang kaniya nga mahimong epektibo sa pagdumala sa sangang buhatan sulod sa mga dekada.
Sa tungatunga sa 1975, sa dihang dihay mga 30,000 ka Saksi sa Hapon, ang mga Barry gibalhin ngadto sa Brooklyn, New York. Ingong dinihogan-sa-espiritung Kristohanon, si Brader Barry gidapit sa pag-alagad ingong membro sa Nagamandong Lawas sa mga Saksi ni Jehova. (Roma 8:16, 17) Ang iyang kasinatian sa pagsulat napamatud-ang mapuslanon kaayo diha sa iyang bag-ong papel sa Writing Department. Ug ang iyang taas nga kasinatian sa sangang buhatan ug sa lainlaing nasod nagsangkap kaniya sa paghimog hinungdanong amot isip membro sa Publishing Committee sa Nagamandong Lawas.
Latas sa katuigan, nagpabilin gihapon ang gugma ni Brader Barry sa Oriente ug sa katawhan niini. Ang mga estudyante sa Tunghaang Gilead maingon man ang mga membro sa pamilyang Bethel nakaseguro nga ang iyang mga pakigpulong ug mga komento nagpasiugda sa makapadasig nga mga sugilanon bahin sa daghan nga nakaalagad na diha sa misyonaryong buluhaton. Ang mga buluhaton sa pagsangyaw sa Gingharian ngadto sa ‘mga kinatumyan sa yuta’ tin-aw nga gihulagway samtang madasigong giasoy ni Brader Barry ang iyang mga kasinatian. Ang pipila niini gihisgotan diha sa iyang kaugalingong asoy nga gipatik sa The Watchtower sa Septiyembre 15, 1960.
Kami masaligon nga ingon nga ‘kaubang manununod ni Kristo,’ ang kaikag ni Brader Barry niadtong “sa husto nahimutang alang sa kinabuhing walay-kataposan” magpadayon. Siyempre, mingawon pag-ayo kaniya ang tanang nakaila ug nahigugma kaniya ingong usa ka espirituwal nga tawo, nga bug-os nga debotado kang Jehova ug may mainit nga pagbati sa katawhan sa Diyos. Apan, kami nalipay nga si Brader Barry nakalahutay nga matinumanon hangtod sa kataposan sa iyang yutan-ong ministeryo.—Pinadayag 2:10.
[Hulagway sa panid 16]
Si Lloyd Barry ug John Barr sa pagluwat sa “Insight on the Scriptures” sa 1988
[Hulagway sa panid 16]
Mga graduwado sa ika-11ng klase sa Gilead, nga nagtagbo sa Hapon human sa 40 ka tuig