Pangandam Alang sa Milenyo nga Hinungdanon!
ANG Usa ka Libo ka Tuig nga Pagmando ni Kristo mopatunghag daghan kaayong panalangin sa tawhanong pamilya. Ilalom sa mahigugmaong pagdumala ni Jesus, ang katawhan haw-ason gikan niining alaot nga kahimtang ngadto sa mahimayaong kahingpitan. Hunahunaa kon unsay kahulogan niana alang kanimo. Mahimsog nga panglawas! Handurawa ang pagmata matag buntag nga mobating mas maayo kay sa adlaw nga miagi. Milyonmilyong lalaki, mga babaye, ug mga bata nagpaabot sa pagkinabuhi nianang malipayong panahon. Sila naghulat niana, nag-ampo niana. Ang ilang pagtuon sa Bibliya nakapakombinsir kanila nga kining mga panalangina ilang maangkon aron pagatagamtamon.
Apan, sa dili pa siya magsugod sa iyang Usa ka Libo ka Tuig nga Pagmando, kinahanglang paphaan una ni Jesu-Kristo ang yuta sa tanang mosupak sa iyang pagmando. Iyang himoon kini diha sa gubat nga gitawag ug Armagedon sa Bibliya. (Pinadayag 16:16) Ang tinuod nga mga Kristohanon sa yuta dili makigbahin nianang gubata. Kini maoy gubat sa Diyos. Ug kini dili limitado diha sa usa ka lugar sa yuta. Ang Bibliya nag-ingon nga kini moabot ngadto sa kinalay-ang mga suok sa yuta. Ang mga kaaway sa pagmando ni Kristo pagapatyon. Walay usa kanila ang makaikyas!—Jeremias 25:33.
Dayon si Jesus mobali sa iyang pagtagad ngadto kang Satanas nga Yawa ug sa iyang mga demonyo. Handurawa ang hitabo, ingon sa nakita sa magsusulat sa basahon sa Pinadayag: “Nakita ko ang usa ka anghel [Jesu-Kristo] nga nanaog gikan sa langit uban ang yawi sa kahiladman ug usa ka dakong kadena diha sa iyang kamot. Ug iyang gidakop ang dragon, ang orihinal nga halas, kinsa mao ang Yawa ug Satanas, ug gigapos siya sulod sa usa ka libo ka tuig.” (Pinadayag 20:1, 2) Sa ulahi, si Satanas ug ang iyang mga demonyo pagalaglagon sa walay kataposan.—Mateo 25:41.
“Usa ka dakong panon sa katawhan, nga walay tawong makaihap,” ang makalabang-buhi sa Armagedon. (Pinadayag 7:9) Si Kristo magagiya kanila aron makapahimulos sa bug-os sa “mga tuboran sa tubig sa kinabuhi,” sama sa magbalantay nga nagagiya sa iyang mga karnero ngadto sa tubig nga makaluwas ug kinabuhi. (Pinadayag 7:17) Kay dili na mababagan ang ilang espirituwal nga pag-uswag ni Satanas ug sa iyang mga demonyo, kining makalabang buhi sa Armagedon anam-anam nga tabangan sa pagbuntog sa ilang makasasalang mga kiling hangtod nga sa kataposan sila makadangat sa kahingpitan!
Ilalom sa mahigugmaong pagmando ni Kristo, ang mga kahimtang sa pagkinabuhi anam-anam nga mouswag. Si Jehova nga Diyos, pinaagi kang Jesu-Kristo, magwagtang sa tanang hinungdan sa kasakit ug kaguol. Iyang “pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa.” (Pinadayag 21:4) Si manalagnang Isaias naghingpit sa larawan, nga nag-ingon: “Nianang panahona ang mga buta makakita, ug ang mga bungol makadungog. Nianang panahona ang bakol makalukso sama sa lagsaw, ug ang dila sa amang magaawit.” (Isaias 35:5, 6) Ug ang mga patay, “ang dagko ug ang gagmay,” mabanhaw nga adunay palaaboton nga dili na gayod mamatay pag-usab!—Pinadayag 20:12.
Bisan karon, ang “dakong panon” nga makalabang buhi sa Armagedon ginatigom. Sila nangandam sa Pagmando ni Kristo sa Milenyo. Bisan pag wala sila mahibalo kon kanus-a magsugod kanang maong pagmando, sila masaligon nga sa tinakdang panahon sa Diyos, kini moabot. Ikaw mahimong malakip kanila, apan ikaw usab kinahanglang mangandam—dili pinaagi sa pagpamaligya sa imong mga kabtangan ug mopanaw ngadto sa usa ka lugar sa yuta, kondili pinaagi sa pagkuhag tukmang kahibalo bahin kang Jehova nga Diyos ug sa iyang mga katuyoan pinaagi sa pagtuon sa Bibliya. Walay bayad o obligasyon, ang mga Saksi ni Jehova malipay sa pagpakita kanimo kon sa unsang paagi ang pagtuon sa Bibliya makahatag ug kaayohan kanimo ug sa imong pamilya. Ang mga magmamantala niining magasina malipay sa paghatag ug dugang impormasyon.
[Kahon sa panid 7]
Ang Usa ka Libo ka Tuig—Literal o Simboliko?
Sanglit ang kadaghanan sa basahong Pinadayag sa Bibliya gisulat sa simbolikong pinulongan, ang pangutana mobangon. Unsay ikasulti bahin sa Usa ka Libo ka Tuig nga Pagmando ni Kristo nga gihisgotan sa Pinadayag? Literal ba kini o usa ka simbolikong panahon?
Adunay daghang timailhan nga literal nga usa ka libo ka tuig ang gipasabot niini. Palandonga: Si apostol Pablo naghisgot ug Usa ka Libo ka Tuig nga Pagmando ni Kristo, nga niining panahona ang katawhan pagahukman, ingong usa ka adlaw. (Buhat 17:31; Pinadayag 20:4) Si apostol Pedro nagsulat nga ang usa ka adlaw (24 oras) ni Jehova maoy usa ka libo ka tuig. (2 Pedro 3:8) Mao kanay katarongan nga kining “adlaw” sa paghukom maoy literal nga usa ka libo ka tuig nga gidugayon. Dugang pa, diha sa Pinadayag 20:3, 5-7, atong mabasa upat ka beses, (sa Ingles) nga dili “a thousand years,” kondili “the thousand years.” Kini daw nagpaila ug usa ka yugto nga dunay tinong gitas-on.