Maayong mga Buhat Mohatag ug Himaya sa Diyos

KADTONG nahigugma sa Diyos maningkamot sa pagpabanaag sa espirituwal nga kahayag gikan sa iyang Pulong, ang Bibliya. Niining paagiha, sila nagsunod sa sugo ni Jesus: “Palamdaga ang inyong kahayag atubangan sa mga tawo, aron ilang makita ang maayo ninyong mga buhat ug mohatag ug himaya sa inyong Amahan nga anaa sa mga langit.” (Mateo 5:16) Ang sinultihan maingon man ang matul-id nga panggawi makahatag ug himaya sa Diyos.

Ang mga Saksi ni Jehova nagtinguha sa pagpahimuot sa Diyos pinaagi sa paglihok nga kaharmonya sa Bibliya ug pinaagi sa pagtabang sa uban sa espirituwal. Sila nagbuhat niini bisan sa kayutaan diin ang ilang publikong ministeryo wala pa marehistro sa legal nga paagi. Diha sa kaulohang siyudad sa usa nianang mga nasora, ang mga Saksi naghimo sa ilang tinuig nga mga kombensiyon nga gitambongan ug mga 6,000 ngadto sa 9,000 ka tawo. Alang sa maong mga panagkatigom, nag-abang silag mga tigomanan diha sa mga tinukod diin may gidispley nga mga eksibit. Sama sa ilang ginahimo sa milabayng mga tuig, una pa sa ilang kombensiyon sa 1999, gatosan ka Saksi ang naghago sa pagpanghinlo sa mga pasilidad ug sa pagmontar sa sound system ug linibo ka lingkoranan.

Kining tanan nga pagpangandam namatikdan. Napanid-an sa kawani sa mga tagdumala sa mga tinukod kining maong mga kalihokan. Nakita usab nila nga, bisan tuod dihay kinatas-ang ihap sa nanambong nga 15,666, ang tanan hapsay nga nahimo ug ang mga Saksi husay kaayo. Nakadayeg usab ang kawani sa bug-os nga pagpanglimpiyo sa ulahi.

Ang mga tagdumala nagpakitag apresasyon niining tanan pinaagi sa pagbutang sa mga Saksi nga numero uno sa listahan aron sila ang unang hatagan ug oportunidad sa pag-abang sa tinukod pagkasunod tuig. Apan diha pay gihimo ang mga tagdumala. Sa Hulyo 15, 1999, ilang gihatagan ug usa ka ganti agig apresasyon ang komite sa kombensiyon. Gikulit diha sa plake ang mga pulong “ang kongregasyon sa mga Saksi ni Jehova”—usa ka butang nga wala dahoma diha sa nasod diin gidili ang ilang edukasyonal nga buluhaton bahin sa Bibliya.

Sa tibuok kalibotan sa 2000/2001, minilyon ang gidahom nga motambong sa gatosan ka “Mga Magtutuman sa Pulong sa Diyos” nga Distritong Kombensiyon sa mga Saksi ni Jehova. Pinaagi sa pagtambong, imong mapanid-an mismo kon sa unsang paagi kadtong matinuorong nagtuman sa gisulti sa Bibliya nakigbahin sa maayong mga buhat nga mohatag ug himaya sa Diyos.