Gikinahanglan Nimo ang Nabansay nga Tanlag
Ang usa ka halandomong adlaw nagpaabot sa mga pasahero ug tripulante nga lulan sa Air New Zealand Flight 901 padulong sa Antartika. Giandam na ang mga kamera, ug ang mga pasahero nalingaw sa biyahe samtang ang ayroplanong DC-10 nagkaduol sa puti nga kontinente nga nagpaubos aron makita sa mga pasahero ang maanindot nga talan-awon.
ANG kapitan, usa ka piloto sulod sa 15 ka tuig, diha nay kapin sa 11,000 ka oras nga kasinatian sa pagpalupad sa ayroplano. Sa wala pa palupara ang ayroplano, mainampingon niyang gipasulod ang plano sa paglupad nganha sa iyang kompiyuter diha sa ayroplano, nga wala masayod nga ang gihatag kaniyang mga numero nga magtino sa lokasyon dili diay husto. Naglupad agi sa panganod nga ubos lamang sa 600 metros, ang DC-10 nahagsa diha sa ubos-ubos nga mga bakilid sa Mount Erebus, nga nakapatay sa tanang 257 nga sakay niana.
Maingon nga ang mga ayroplano karon nagsalig sa mga kompiyuter aron sa paggiya kanila latas sa kalangitan, ang mga tawo gihatagan ug tanlag sa paggiya kanila sa ilang dalan sa kinabuhi. Ug ang makalilisang nga trahedya sa Flight 901 makatudlo kanato ug pipila ka hinungdanong mga leksiyon bahin sa atong tanlag. Pananglitan, maingon nga ang luwas nga paglupad nagdepende sa sistema sa pagnabigar nga nagaobra sa hustong paagi ug sa tukmang mga giya, ang atong espirituwal, moral, ug bisan pisikal nga kaayohan nagdepende usab sa usa ka tanlag nga daling mosanong nga gigiyahan sa hustong moral nga mga giya.
Ikasubo, sa kalibotan karon, ang maong mga giya daling nagakahanaw o wala na panumbalinga. “Daghan kitag madunggan karon bahin sa usa ka ordinaryong estudyante sa Amerika nga dili makabasa, dili makasulat, ug maglisod sa pagpangita sa Pransiya diha sa mapa,” matod pa sa usa ka Amerikanang magtutudlo. “Tinuod usab nga ang maong estudyante maglisod sa pag-ila kon unsay husto o sayop. Lakip sa pagkadili-makamaong mobasa ug mosulat ug sa pagkawalay-alamag sa matematika ug siyensiya, ipuno nato ang dulot nga kalibog sa moral diha sa daghang edukasyonal nga mga problema.” Namatikdan usab niya nga “ang mga batan-on karon nagkinabuhi nga walay tin-awng pagsabot bahin sa moralidad. Pangutan-a ang usa kanila kon aduna bay tatawng mga sukdanan sa kon unsay ‘husto ug sayop,’ ug sa kalit lang giatubang nimo ang nalibog, wala-makatingog, ginerbiyos, ug walay-kasegurohan nga batan-on. . . . Kining maong kalibog mograbe pa inay kay moarang-arang inigtungha nila sa kolehiyo.”
Ang usa ka hinungdan niini nga kalibog mao ang moral nga relatibismo, usa ka kaylap nga panglantaw nga ang mga sukdanan magkalainlain sumala sa personal o kultural nga mga kagustohan. Handurawa kon unsay mahitabo kon ang mga piloto magnabigar, dili pinaagi sa tinong mga giya, kondili pinaagi sa mga suga nga dili-matagna kon asa modan-ag ug usahay bug-os nga mawala! Ang mga katalagman sama nianang sa Mount Erebus sa walay duhaduha mahimong komon. Sa susama, kay wala na magsunod sa tinong moral nga mga sukdanan, ang kalibotan nakaanig makalilisang ug nagakagrabe nga kagul-anan ug kamatayon samtang ang mga pamilya nangabungkag tungod sa pagkadili-maunongon ug milyonmilyon ang nag-antos tungod sa AIDS o sa ubang sakit nga mapasa pinaagi sa pagpakigsekso.
Ang moral nga relatibismo morag modernong pamation, apan sa pagkatinuod ang mga sumusunod niini nahisama sa karaang mga taga-Nineve kinsa wala mahibalo sa kalainan “sa ilang tuong kamot ug sa ilang wala.” Ang mga nagabuhat sa moral nga relatibismo susama sa apostatang mga Israelinhon kinsa miingon nga “ang maayo maoy daotan ug ang daotan maoy maayo.”—Jonas 4:11; Isaias 5:20.
Busa asa kita moliso alang sa tin-aw, tukma nga mga balaod ug mga prinsipyo nga gamiton nato sa pagbansay sa atong tanlag aron mahimo kining luwas nga giya? Milyonmilyon ang nakakaplag nga ang Bibliya makatagbaw gayod nianang panginahanglana. Gikan sa moralidad ngadto sa batasan sa pagtrabaho ug gikan sa pagbansay sa mga anak ngadto sa pagsimba sa Diyos, walay nasayloan ang Bibliya nga hinungdanong butang. (2 Timoteo 3:16) Napamatud-an kining bug-os nga kasaligan latas sa kasiglohan. Tungod kay ang moral nga mga sukdanan sa Bibliya gilatid sa kinalabwang awtoridad, ang atong Maglalalang, kini mapuslanon alang sa tanang tawo. Busa, wala kitay katarongan nga magkinabuhi nga walay kahibalo bahin sa moralidad.
Apan, karon ang imong tanlag labi pang ginaatake kay sukad masukad. Sa unsang paagi naposible kana? Ug unsaon nimo pag-amping ang imong tanlag? Ang maalamong dalan nga subayon mao ang pagkahibalo sa tinubdan sa pag-atake ug sa iyang mga taktika. Hisgotan kini sa sunod nga artikulo.