Mga Pangutana Gikan sa mga Magbabasa

Sa unsang paagi lantawon sa Kristohanong kongregasyon ang pagkaulitan?

Ang Pulong sa Diyos parehong nagsaway sa paghuboghubog ug pagkaulitan ingong batasan nga dili angay niadtong nag-alagad sa Diyos. Busa, ang Kristohanong kongregasyon nag-isip sa usa ka lunod-patay nga ulitan nga sama sa usa ka tawo nga nagabatasan sa pagkahubog. Ang palahubog ug ulitan parehong dili madawat sa Kristohanong kongregasyon.

Ang Proverbio 23:20, 21 nag-ingon: “Ayaw pagpakig-uban sa mga labihan ka hinginom ug bino, taliwala sa mga ulitan nga tigkaon ug unod. Kay ang palahubog ug ang ulitan modangat sa kakabos, ug ang pagkahingatulog magapasapot sa usa ka tawo sa mga nuog lamang.” Sa Deuteronomio 21:20, atong mabasa ang bahin sa usa ka “gahian ug sukihan” nga tawo, kinsa takos sa kamatayon ilalom sa Balaod ni Moises. Sumala ning maong bersikulo, ang duha ka kinaiya sa maong rebelyoso ug dili-mahinulsolon nga tawo mao nga siya “ulit ug palahubog.” Dayag nga sa karaang Israel, ang pagkaulitan giisip ingong dili-dalawatong batasan niadtong buot moalagad sa Diyos.

Apan, unsay nalangkit sa pagkaulitan, ug unsay giingon sa Kristohanon Gregong Kasulatan bahin niining ulohana? Ang usa ka ulitan gihubit ingong “usa ka tawo nga nagbatasan sa dinalo ug kusog nga pagkaon ug pag-inom.” Busa, sa usa ka rason, ang pagkaulitan maoy usa ka matang sa kadalo, ug ang Pulong sa Diyos nag-ingon kanato nga ang “mga tawong dalo” dili makapanunod sa Gingharian sa Diyos. (1 Corinto 6:9, 10; Filipos 3:18, 19; 1 Pedro 4:3) Dugang pa, sa dihang gipasidan-an ni apostol Pablo ang mga Kristohanon batok sa “mga buhat sa unod,” iyang gihisgotan ang “mga paghuboghubog, mga hudyaka, ug mga butang nga sama niini.” (Galacia 5:19-21) Ang sobrang pagkaon sagad nalangkit sa mga paghuboghubog ug mga hudyaka. Gawas pa, ang pagkaulitan dayag nga nalakip sa giingon ni Pablo nga “ug mga butang nga sama niini.” Sama sa ubang “mga buhat sa unod,” ang usa ka Kristohanon nga nailado tungod sa iyang pagkaulitan ug kinsa gahiang modumili sa pag-usab sa iyang hinakog nga batasan angayng papahawaon gikan sa kongregasyon.—1 Corinto 5:11, 13.a

Bisan tuod giisip sa Pulong sa Diyos ang palahubog nga sama sa usa ka ulitan, ang palahubog mas daling mailhan kay sa usa ka ulitan. Ang mga ilhanan sa pagkahubog sagad dali rang makita. Apan, lisod matino kon ang usa ka tawo usa ba gayod ka lunod-patay nga ulitan tungod kay kini dili lamang matino pinasukad sa panggawas nga panagway. Busa, ang pagsulbad sa mga problema maylabot niini nagkinahanglan ug dakong pagmatngon ug pagsabot sa bahin sa mga ansiyano sa kongregasyon.

Pananglitan, ang sobra nga pagkatambok ilhanan tingali sa pagkaulitan, apan dili ingon niini kanunay ang kahimtang. Ang usa ka tawo mahimong sobrag timbang tungod sa usa ka sakit. Ang napanunod nga mga hinungdan mahimong makaingon usab sa sobra nga pagkatambok. Angay usab natong hinumdoman nga ang sobra nga pagkatambok maoy usa ka pisikal nga kondisyon, samtang ang pagkaulitan maoy usa ka tinamdan sa hunahuna. Ang sobra nga pagkatambok gihubit ingong “usa ka kahimtang nga mailhan tungod sa sobrang tambok sa lawas,” samtang ang pagkaulitan maoy “hinakog o hilabihang pagkamapatuyangon.” Busa, ang pagkaulitan dili matino pinaagi sa gidak-on sa usa ka tawo kondili sa iyang tinamdan maylabot sa pagkaon. Ang usa ka tawo mahimong igoigo rag gidak-on o niwang pa gani ug bisan pa niana siya mahimong usa ka ulitan. Dugang pa, dili pareho ang giisip nga hustong timbang o porma sa lawas sa lainlaing dapit.

Unsay mga ilhanan sa pagkaulitan? Ang usa ka ulitan kanunayng magpakitag kakulang sa pagpugong, nga magsige gihapog kaon hangtod sa punto nga siya dili na komportable o kasukaon na. Ang iyang kakulang sa pagpugong sa kaugalingon nagpaila nga siya walay tinuod nga pagtagad bahin sa kaulawan nga iyang ikahatag kang Jehova ug sa maayong reputasyon sa Iyang katawhan. (1 Corinto 10:31) Sa laing bahin, ang usa ka tawo nga panagsa rang magpatuyang ug kaon dili mahimong isipon dayon ingong “tawong dalo.” (Efeso 5:5) Bisan pa niana, sa diwa sa Galacia 6:1, ang maong Kristohanon hayan nagkinahanglag tabang. Si Pablo nag-ingon: “Mga igsoon, bisan pag ang usa ka tawo makahimog sayop nga lakang sa dili pa niya himatngonan kini, kamo nga may espirituwal nga mga katakos paningkamoti nga ipasibo pag-usab ang maong tawo diha sa espiritu sa kalumo.”

Nganong ang tambag sa Bibliya bahin sa paglikay sa sobrang pagkaon ilabinang hinungdanon karon? Tungod kay, ilabina sa atong adlaw, si Jesus nagpasidaan: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon ug sa pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat kaninyo ingon nga usa ka lit-ag.” (Lucas 21:34, 35) Ang paglikay sa pagpatuyang sa pagkaon maoy usa ka hinungdanong paagi sa pagsalikway sa estilo sa kinabuhi nga makadaot sa espirituwal.

Ang pagkamakasaranganon maoy usa ka Kristohanong hiyas. (1 Timoteo 3:2, 11) Busa, si Jehova motabang gayod sa tanan nga matinuorong naningkamot sa pagpadapat sa tambag sa Bibliya maylabot sa kasarangang mga batasan sa pagkaon ug pag-inom.—Hebreohanon 4:16.

[Footnote]