Nakigbisog Ka ba sa Imong Pagbati?
SA HALOS tibuok niyang kinabuhi, si Lena nakigbisog sa negatibong mga pagbati bahin sa iyang kaugalingon. “Ang seksuwal nga pag-abuso nga akong naagoman sulod sa daghang tuig sa bata pa ako nakadaot gayod sa akong pagtamod sa kaugalingon,” matod niya. “Gibati nako nga ako wala gayoy pulos.” Si Simone nahinumdom usab sa iyang pagkabatan-on ug miingon, “Mibati akog kahaw-ang ug kawalay-pulos sulod sa akong kahiladman.” Ang tumang kasubo nga gipahinabo sa maong mga pagbati daw kaylap na karon. Usa ka serbisyo sa pagtambag pinaagig telepono nga gidisenyo alang sa mga tin-edyer miingon nga halos katunga niadtong nanawag kanila nagpahayag ug “ubos gayod nga pagtamod sa kaugalingon.”
Sumala sa pipila ka mga eksperto, ang mga tawo mobati ug ubos nga pagtamod sa kaugalingon kon sila trataron sa uban ingong walay pulos. Ang maong panghunahuna basin motungha kon ang usa kanunayng kasab-an, grabeng sawayon, o abusohan. Bisan unsa pay hinungdan, kini makapaluya ug makadaot pa gani. Nakaplagan sa usa ka di pa dugayng medikal nga pagtuon nga ang mga tawo nga negatibog pagbati sa ilang kaugalingon lagmit nga walay pagsalig sa ilang kaugalingon ug sa uban, ug busa wala-tuyoang nagdaot sa ilang suod nga relasyon ug pakighigala sa uban. “Sa diwa,” matod sa taho bahin sa maong pagtuon, “sila ang ‘nagmugna’ sa mismong mga kahimtang nga gikahadlokan gayod nilang mahitabo.”
Ang mga tawong mibati niana sagad maoy mga biktima sa ilang kaugalingong “makapatugaw nga mga hunahuna,” sumala sa pagtawag niana sa Bibliya. (Salmo 94:19) Bation nila nga wala gayod silay mahimong maayo. Sa dihang dunay mahitabong daotan, ila dayong basolon ang ilang kaugalingon. Bisan tuod ang uban modayeg kanila tungod sa ilang nahimo, sa ilang kahiladman bation nila nga sila nanglimbong lang ug nga kini madiskobrehan ra sa madugay o sa madali. Sanglit nagtuo nga dili sila takos nga magmalipayon, daghan ang nahitumpawak sa makadaot nga panggawi nga gibati nilang dili na nila matul-id pa. Si Lena, nga gihisgotan ganina, nakabaton ug grabeng abnormalidad sa pagkaon tungod sa iyang kawalay-pagtamod sa kaugalingon, ug siya miingon, “Gibati nako nga dili na nako mabag-o pa ang bisan unsa.”
Kadto bang nakigbisog niining “makapatugaw nga mga hunahuna” dili na makalingkawas niining kahimtanga sa tibuok nilang kinabuhi? Aduna bay mahimo sa pagsumpo sa maong mga pagbati? Ang Bibliya naglatid ug mga prinsipyo ug praktikal nga tambag nga nakatabang sa daghan nga magmalamposon sa ilang pagpakigbisog. Unsa man ang pipila niining mga prinsipyoha, ug sa unsang paagi kini nakatabang niadtong nag-antos niini sa pagkaplag ug kalipay sa kinabuhi? Mao kanay hisgotan sa sunod nga artikulo.