Ikaw ba “Dato Ngadto sa Diyos”?

LAKIP sa daghang makapukaw-sa-hunahuna nga mga sambingay nga gihatag ni Jesu-Kristo mao ang maylabot sa usa ka tawong yutaan. Sa paningkamot nga siya seguradong makabaton ug may-kasegurohang umaabot, ang tawong yutaan nagplano sa pagtukod ug mas dagkong mga kamalig. Apan, diha sa ilustrasyon ni Jesus, ang maong tawo gitawag nga “walay buot.” (Lucas 12:16-21) Ang ubay-ubayng mga hubad sa Bibliya naggamit pa gani sa pulong “buangbuang.” Nganong bug-at man kini nga paghukom?

Dayag nga wala ilangkit niining bahandianon nga tawo ang Diyos sa iyang mga plano; ni nagpasidungog sa Diyos tungod sa dagayang abot sa yuta. (Mateo 5:45) Hinunoa, siya nagpasigarbo: “Kalag, aduna kay daghang maayong mga butang nga natigom alang sa daghang katuigan; pagpahayahay, kaon, inom, paglipaylipay.” Oo, siya naghunahuna nga ang mga bunga sa iyang mga kahago magsilbi ingong usa ka “salipod nga paril.”—Proverbio 18:11.

Sa pagpasidaan batok sa mapahitas-ong espiritu, ang disipulong si Santiago misulat: “Umari, karon, kamong nagaingon: ‘Karong adlawa o ugma mangadto kami niining siyudara ug mogugol didto ug usa ka tuig, ug magpatigayon kami ug manapi,’ samtang kamo wala masayod kon unsay dangatan sa inyong kinabuhi ugma. Kay kamo sama sa gabon nga magpakita sa makadiyot ug unya mahanaw.”—Santiago 4:13, 14.

Tinuod gayod ang maong mga pulong kay ang datong tawo sa sambingay ni Jesus gisultian: “Ikaw nga walay buot, karong gabhiona ilang pangayoon nga mapugsanon ang imong kalag gikan kanimo. Nan, kinsa ang magapanag-iya sa mga butang nga imong gitigom?” Sama sa gabon nga mahanaw ra unya, ang datong tawo mawad-an sa iyang kinabuhi sa dili pa niya makita ang katumanan sa iyang mga damgo. Nasabtan ba nato ang pagtulon-an niini? Si Jesus nag-ingon: “Ingon usab niana ang tawo nga magatigom ug bahandi alang sa iyang kaugalingon apan dili dato ngadto sa Diyos.” Ikaw ba “dato ngadto sa Diyos”?