Himoa ang Pagpamalandong nga Makalilipay

ANG pipila ka tawo malisdan sa pagpamalandong. Tingali ilang lantawon ang pagpamalandong ingong malisod nga trabaho nga nagkinahanglan ug hugot nga konsentrasyon. Ang maong mga tawo maulaw usab tingali nga sila nagpabaya sa pagpamalandong, ilabina sa dihang ilang mabasahan ang pagkahinungdanon niini. (Filipos 4:8) Apan, ang hilom nga pagpamalandong sa mga kamatuoran nga atong nakat-onan bahin kang Jehova, sa iyang maanindot nga mga hiyas, iyang makapahinganghang mga buhat, iyang mga kinahanglanon, ug iyang mahimayaong katuyoan makalilipay ug angayng mahimo nga makalilipay nga paagi sa paggugol ug panahon. Ngano man?

Si Jehova nga Diyos mao ang Supremong Magmamando sa uniberso ug puliki nga nagabuhat aron matuman ang iyang dakong katuyoan. (Juan 5:17) Bisan pa niana, siya nagtagad sa hilom nga mga hunahuna sa tagsatagsa niya ka magsisimba. Ang salmistang si David nahibalo niini ug giinspirar sa pagsulat: “Oh Jehova, ikaw nakasusi kanako, ug ikaw nakaila kanako. Ikaw nahibalo sa akong paglingkod ug sa akong pagtindog. Gitagad mo ang akong hunahuna gikan sa halayo.”—Salmo 139:1, 2.

Sa sinugdan, isipon tingali sa usa ka tawo nga makapahigawad ang gisulti sa salmista. Tingali mangatarongan siya, ‘Bisan tuod ang Diyos “halayo,” iyang mamatikdan ang tanang daotang butang nga mosantop sa akong hunahuna.’ Siyempre, makaayo usab ang pagkaamgo niana. Makatabang kana kanato sa pagpakigbisog sa daotang mga hunahuna ug, kon mosantop kana sa atong hunahuna, makasugid kita niana ngadto sa Diyos, nga masaligon nga siya magapasaylo kanato pinasukad sa atong pagtuo sa halad lukat ni Jesus. (1 Juan 1:8, 9; 2:1, 2) Apan, sa samang higayon angay natong hinumdoman nga si Jehova nagasusi sa iyang mga magsisimba sa positibong paagi. Siya mamati sa dihang kita mapabilhong maghunahuna bahin kaniya.

“Namatikdan ba gayod ni Jehova ang tanang maayong mga hunahuna sa iyang milyonmilyong mga magsisimba?” mangutana ka tingali. Oo, namatikdan niya. Gipasiugda ni Jesus ang kaikag ni Jehova kanato sa dihang siya miingon nga namatikdan ni Jehova bisan ang gagmayng mga goryon, ug dayon siya midugang: “Kamo labaw pa ug bili kay sa daghang goryon.” (Lucas 12:6, 7) Ang mga goryon dili makahunahuna bahin kang Jehova. Busa kon siya nagtagad kanila, labaw pa gayod siyang mahingawa kanato ug malipay kon ang matag usa kanato maghunahuna bahin kaniya! Oo, sama kang David, kita masaligong makaampo: “Hinaot nga ang . . . pagpamalandong sa akong kasingkasing mahimong kahimut-anan sa imong atubangan, Oh Jehova nga Bato ko ug Manunubos ko.”—Salmo 19:14.

Ang dugang pamatuod nga si Jehova nagtagad gayod sa pagpamalandong sa iyang maunongong mga magsisimba makita diha sa inspiradong mga pulong ni manalagnang Malaquias. Naghisgot bahin sa atong adlaw, siya nagtagna: “Niadtong panahona kadtong mga nahadlok kang Jehova nagsultihanay sa usag usa, ang matag usa sa iyang isigkaingon, ug si Jehova nagpadayon sa pagtagad ug sa pagpamati. Ug usa ka basahon sa handomanan gisulat sa iyang atubangan alang kanila nga nahadlok kang Jehova ug kanila nga nagapalandong sa iyang ngalan.” (Malaquias 3:16) Ang pagpahinumdom sa atong kaugalingon nga si Jehova nagpadayon “sa pagtagad” sa dihang kita maghunahuna bahin kaniya sa pagkatinuod makahimo sa diyosnong pagpamalandong nga makalilipay. Busa, hinaot nga mouyon kita sa mga pulong sa salmista kinsa misulat: “Palandongon ko gayod ang tanan mong kalihokan, ug ang imong mga pakiglabot akong hatagag pagtagad.”—Salmo 77:12.