Ang Bili sa “Usa ka Sudlanan nga Mas Mahuyang”
“KAMONG mga bana, magpadayon sa pagpuyo [uban sa inyong mga asawa] sumala sa kahibalo,” misulat si apostol Pedro, “nga maghatag kanila ug kadungganan samag ngadto sa usa ka sudlanan nga mas mahuyang, ang babaye.” (1 Pedro 3:7) Ang paghisgot sa Kasulatan bahin sa usa ka babaye ingong “usa ka sudlanan nga mas mahuyang” nagpakamenos ba kaniya? Atong susihon kon unsa gayoy buot ipasabot sa inspiradong magsusulat.
Ang Gregong pulong nga gihubad ug “kadungganan” nagkahulogan ug “kantidad, bili, . . . pagtahod.” Busa, ang usa ka Kristohanong bana angayng magtratar sa iyang asawa uban ang kalumo, nga magpakita kaniyag nahiangayng pagtagad ingong mahuyang, bililhon nga sudlanan. Wala gayod kini magpakamenos kaniya. Ingong pananglitan, tagda ang lampara nga gitawag ug Tiffany lotus. Kining nindot kaayong lampara ikaingon gayod nga mahuyang o delikado. Nakapamenos ba sa bili niining lamparaha ang delikado nga kinaiyahan niini? Wala gayod! Sa 1997, ang orihinal nga lamparang Tiffany lotus gisubasta sa kantidad nga 2.8 milyones dolyares! Tungod sa delikado nga pagkagama niini, mimahal pa hinuon kini inay mibarato.
Sa susama, ang paghatag ug kadungganan sa babaye nga sama sa usa ka sudlanan nga mas mahuyang wala magpakamenos kaniya. Ang pagpuyo uban sa iyang asawa “sumala sa kahibalo” nagpasabot nga tagdon sa bana ang maayong mga hiyas ug mga limitasyon, mga gusto ug dili gusto, panglantaw ug pagbati sa iyang asawa. Ilhon ug tahoron sa usa ka matinagdanong bana ang kalainan sa iyang personalidad ug nianang sa iyang asawa. Siya magpakitag nahiangayng pagtagad kaniya “aron nga dili mababagan ang [iyang] mga pag-ampo.” (1 Pedro 3:7) Ang bana nga dili magpabili sa mga hiyas sa iyang asawa magpameligro sa iyang relasyon uban sa Diyos. Dayag nga wala pakamenosa sa Pulong sa Diyos ang mga babaye. Sa kasukwahi, kini naghatag ug dignidad ug nagpasidungog kanila.
[Picture Credit Line sa panid 32]
© Christie’s Images Limited 1997