Usa ka Sentenaryo nga May Katuyoan sa Kinabuhi

SI Elin maoy usa sa 60 ka tawo sa Sweden nga di pa dugay gilista lakip sa nag-edad ug 105 anyos pataas. Siya mismo 105 anyos na. Bisan tuod anaa na lang siya sa balay sa mga tigulang, ang iyang panglawas nagpaarang gihapon kaniya sa pag-alagad ingong aktibong Saksi ni Jehova, ang paagi sa kinabuhi nga iyang gipili kapin nag 60 ka tuig kanhi.

Sa pagsangyaw sa uban, si Elin nagsunod sa sumbanan nga gipakita ni apostol Pablo sa dihang si Pablo gibilanggo diha sa balay. Gisangyawan ni Pablo ang tanan nga moduaw kaniya. (Buhat 28:16, 30, 31) Sa susama, gipahimuslan ni Elin ang tanang kahigayonan sa pagsangyaw sa mga tigpanghinlo, dentista, doktor, tig-atiman sa buhok, nars, ug sa uban pa niyang mahimamat diha sa balay, nga nagpaambit kanila sa maayong balita nga makaplagan sa Bibliya. Sa popanahon, ang mga kakongregasyon ni Elin nagdapit pa gani sa ilang mga estudyante sa Bibliya sa pagduaw kaniya aron sila makabatog kaayohan sa iyang kahibalo ug kasinatian.

Ang mga membro sa kongregasyon ni Elin nakadayeg sa iyang malipayong tinamdan ug pagkamausisahon. Usa ka isigka-Saksi miingon: “Talagsaon ang iyang katakos sa paghibalo sa mga kalihokan sa kongregasyon. Makahinumdom siya sa mga ngalan sa tanang mga bata ug niadtong mitapo sa kongregasyon di pa dugay.” Si Elin nailado usab sa iyang pagkamaabiabihon, pagkasiawan, ug positibong panglantaw sa kinabuhi.

Unsay nakatabang kang Elin sa pagmentinar sa iyang kalipay ug sa pagsentro sa iyang pagtagad sa katuyoan sa kinabuhi? Siya mobasag usa ka teksto sa Bibliya kada adlaw gikan sa pulyetong Pagsusi sa Kasulatan sa Adlaw-Adlaw, nga gipatik sa mga Saksi ni Jehova. Sa tabang sa usa ka lente, siya mobasa usab ug usa ka bahin sa Bibliya kada adlaw. Si Elin mangandam sa senemanang mga tigom sa mga Saksi ni Jehova, ug bisan tuod siya dili makatambong tungod sa kaluyahon, siya maminaw sa mga rekording sa maong mga tigom. Ang regular nga pagbasa sa Bibliya ug sa mga publikasyon nga gipasukad sa Bibliya ug ang dili pagtalikod sa mga tigom makatabang kanato sa pagkinabuhi nga matagbawon ug mapuslanon bisan pa sa atong pangedaron.—Salmo 1:2; Hebreohanon 10:24, 25.