Pagkadaotan—Dili na ba Kini Masanta?
Usa ka batang lalaki sa iyang pagkaukit-ukitan may gipunit sa yuta—usa diay ka bomba—nga nakapabuta ug nakapainutil kaniya. Usa ka masuso gilabay sa iyang inahan diha sa basurahan sa daplin sa karsada. Usa ka trabahante nga gitaktak sa trabaho mibalik sa iyang gitrabahoan kaniadto ug namusil sa tanan nga iyang nakita, ug nagpakamatay. Usa ka tinamod nga tawo nag-among-among sa inosenteng mga bata.
IKASUBO, ang mga balita bahin niining daotang mga buhat komon na kaayo sa atong panahon. Mas makapasubo pa niini mao ang mga balita bahin sa pagpuo sa rasa ug terorismo. “Kon ibase sa kagrabehon sa pagkadaotan, kini matawag nga siglo ni Satanas,” miingon ang usa ka editoryal sa mantalaan nga gipatik niadtong 1995. “Grabe kaayo ang pagkauhaw sa dugo sa mga tawo karon nga sayon ra kanila ang pagpatay ug milyonmilyong tawo tungod lang sa rasa, relihiyon o kahimtang sa kinabuhi.”
Sa samang higayon, gihugawan sa mga tawo ang hangin, gidaot ang yuta, gititi ang mga kahinguhaan niini, ug gipuo ang hilabihan ka daghang espisye sa mananap. Makahimo kaha ang katawhan sa pagsanta sa tanang pagkadaotan ug sa paghimo sa kalibotan nga mas maayo ug mas luwas nga dapit nga pagapuy-an? O kawang lang ang pagsulay sa pagbuhat niana? Miingon ang usa ka propesor nga daghan nag nasulat bahin sa pagkadaotan: “Gusto gayod nako nga may mahitabong dakong kausaban sa kalibotan, aron mouswag ang kahimtang niini. Apan klaro nga ang kalibotan wala gayod mouswag.” Tingali mao usab kanay imong gibati.
Ang kahimtang sa kalibotan mahimong ipakasama sa usa ka barko nga naglawig sa kadagatan ug matag adlaw nagkadagko ang mga balod ug nag-anam ka peligroso. Ang mga tawo dili na gustong mopadayon sa paglawig, apan lisod na kaayong imaniobra ang barko aron mobalik sa agi. Ang barko nagpadayon sa pagsungsong sa makusog nga unos ug dili na kini mapugngan.
Sa bahin, ang pagkadili-hingpit sa tawo maoy nakaingon niining nagkagrabe nga kahimtang sa kalibotan. (Roma 3:23) Bisan pa niana, kon atong tagdon ang pagkakaylap ug kagrabehon sa pagkadaotan, morag dili lang tawo ang kapasanginlan niini bisan unsa pa sila kadaotan. Posible kaha nga ang mga tawo gimaniobra sa usa ka dili-makita apan gamhanan ug daotan kaayong puwersa? Kon mao, unsa man kanang puwersaha? Sa unsang paagi atong mapanalipdan ang atong kaugalingon? Tubagon kining mga pangutanaha sa sunod nga artikulo.
[Picture Credit Line sa panid 3]
© Heldur Netocny/Panos Pictures