Mga Pangutana Gikan sa mga Magbabasa
Tungod kay ang pagpangani sa sebada nagsugod man sa dihang ang tanang lalaking Israelinhon nagtambong sa Pista sa Tinapay nga Walay Igpapatubo, kinsa may nag-ani sa unang mga bunga sa sebada nga gidala ngadto sa sangtuwaryo?
Ang Moisesnong Balaod nagsugo sa mga Israelinhon: “Katulo sa usa ka tuig nga ang tanan mong mga lalaki kinahanglang moatubang kang Jehova nga imong Diyos sa dapit nga iyang pagapilion: sa pista sa mga tinapay nga walay igpapatubo ug sa pista sa mga semana ug sa pista sa mga balongbalong.” (Deuteronomio 16:16) Sukad sa panahon ni Haring Solomon padayon, ang dapit nga gipili sa Diyos mao ang templo sa Jerusalem.
Ang una sa tulo ka pista gihimo sa sayong bahin sa tingpamulak. Kini gitawag ug Pista sa Tinapay nga Walay Igpapatubo, ug nagsugod kini sa adlaw human gayod sa pagsulog sa Paskuwa sa Nisan 14 ug nagpadayon sa pito ka adlaw hangtod sa Nisan 21. Sa ikaduhang adlaw sa pista, sa Nisan 16, nagsugod ang unang pag-ani sa tuig sumala sa gilagda sa Diyos nga mga kalihokan alang sa nasod. Nianang adlawa, ang hataas nga saserdote magkuhag “usa ka binangan sa mga unang bunga” sa ani nga sebada ug ‘itabyog kini atubangan kang Jehova’ didto sa sangtuwaryo. (Levitico 23:5-12) Kay ang tanang lalaki kinahanglan mang motambong sa Pista sa Tinapay nga Walay Igpapatubo, kinsa may nag-ani sa sebada nga gihalad?
Ang tibuok nasod gisugo sa paghalad sa mga unang bunga sa sebada ngadto kang Jehova panahon sa Pista sa Tinapay nga Walay Igpapatubo. Dili matag usa ang gisugo sa pagsugod sa pagpangani ug sa pagdalag mga unang bunga ngadto sa sangtuwaryo para sa iyang kaugalingon. Hinunoa, dihay mga tawo nga naghawas sa tibuok nasod nga nag-ani. Busa, ang pag-ani sa sebada alang sa Pista sa Tinapay nga Walay Igpapatubo gihimo sa mga tawo nga gisugo sa pagpangani sa duol nga uma. Ang Encyclopaedia Judaica nagkomento bahin niini: “Kon hinog na ang sebada, kuhaon kini gikan sa duol sa Jerusalem; kon dili, kini mahimong kuhaon gikan sa ubang dapit sa Israel. Anihon kini sa tulo ka tawo nga may tagsatagsa ka galab ug bukag.” Pagkahuman, ang usa ka binangan nga sebada dad-on ngadto sa hataas nga saserdote kinsa maoy mohalad niini kang Jehova.
Ang sugo nga maghalad ug mga unang bunga sa sebada naghatag ug maayo kaayong kahigayonan sa mga Israelinhon sa pagpahayag sa ilang pagpasalamat sa Diyos sa pagpanalangin sa ilang yuta ug sa ilang ani. (Deuteronomio 8:6-10) Apan ang labing hinungdanon mao nga ang seremonyal nga paghalad maoy ‘landong sa maayong mga butang nga moabot.’ (Hebreohanon 10:1) Makahuloganon nga si Jesu-Kristo gibanhaw niadtong Nisan 16 sa 33 K.P., ang adlaw nga ihalad ang mga unang bunga sa sebada kang Jehova. Mahitungod kang Jesus, si apostol Pablo misulat: “Si Kristo gibangon na gikan sa mga patay, ang unang bunga kanilang nangatulog sa kamatayon. . . . Apan ang matag usa sa iyang kaugalingong han-ay: si Kristo ang unang bunga, pagkahuman kadtong mga iya ni Kristo panahon sa iyang presensiya.” (1 Corinto 15:20-23) Ang binangan nga mga unang bunga nga itabyog sa hataas nga saserdote atubangan kang Jehova naglandong sa binanhaw nga Jesu-Kristo, ang una nga gibanhaw nga gihatagag kinabuhing walay kataposan. Busa giablihan ni Jesus ang dalan aron mahigawas ang katawhan gikan sa sala ug kamatayon.
[Picture Credit Line sa panid 26]
© 2003 BiblePlaces.com