Nahibalo Ka Ba?

Kinsa ang “kapitan sa templo,” ug unsay iyang responsabilidad?

Lakip sa Hudiyong mga lider sa relihiyon nga midakop kang apostol Pedro ug Juan samtang sila nagsangyaw mao ang “kapitan sa templo.” (Buhat 4:1-3) Ang Bibliya wala maghatag ug detalye kon unsay responsabilidad sa kapitan sa templo, apan adunay mga libro sa kasaysayan nga naghatag kanatog makaiikag nga mga impormasyon.

Mopatim-aw nga sa panahon ni Jesus, ang maong katungdanan giabaga sa usa ka saserdote nga ang ranggo maoy ikaduha gikan sa hataas nga saserdote. Ang kapitan sa templo maoy tigmentinar sa kahusay sa sulod ug gawas sa templo sa Jerusalem. Siya ang magtino nga hapsay ang pagsimba diha sa templo, ug siya ang nagdumala sa mga polis sa templo. Siya adunay luyoluyong mga kapitan nga nagdumala sa mga magbalantay nga ang mga kaakohan mao ang pag-abli sa ganghaan sa templo kada buntag ug pagsira niana sa magabii, pagseguro nga walay tawong makasulod sa mga dapit nga dili angayng pasudlan, ug sa pagbantay sa panudlanan sa templo.

Ang mga saserdote ug mga Levihanon nga nag-alagad sa templo gibahin sa 24 ka dibisyon, ug ang matag dibisyon dunay turno nga motrabaho ug usa ka semana, duha ka beses sa usa ka tuig. Posible nga ang matag dibisyon dunay kaugalingong kapitan.—1 Cronicas 24:1-18.

Ang mga kapitan sa templo impluwensiyado nga mga tawo. Sumala sa Bibliya, sila nakigkunsabo sa pangulong mga saserdote aron ipapatay si Jesus, ug ilang gigamit ang ilang mga tawo sa pagdakop kaniya.—Lucas 22:4, 52.

Ang Mateo 3:4 nag-ingon nga si Juan Bawtista mikaon ug “dulon ug dugos nga ihalas.” Ginakaon ba ang dulon niadtong panahona?

Ang uban dili motuo nga dulon ang gikaon ni Juan, kay matod pa nila ang gitumong ni Mateo mao ang bunga sa kahoyng locust, o kaha ihalas nga prutas, o usa ka matang sa isda. Apan ang Gregong pulong nga gigamit ni Mateo nagtumong sa usa ka matang sa dulon nga gitawag karon ug Acrididae. Sa Israel, ang labing komon nga matang sa dulon mao kanang dulon sa desyerto, nga magduot ug makapayhag ug mga pananom.—Joel 1:4, 7; Nahum 3:15.

Ang dulon maoy kinaham nga pagkaon sa mga tawo sa karaang panahon sama sa mga Asiryanhon ug mga Etiopianhon ug kini ginakaon gihapon karon sa mga Bedouin ug Yemenite nga mga Hudiyo. Sa Israel, ang dulon maoy pagkaon sa mga pobre. Human sa pagkuha sa ulo, tiil, ug tiyan, ang lawas nga maoy mabilin ilang kilawon o kaha isugba o ibulad. Usahay ang dulon asinan o kaha humolag suka o dugos. Ang historyano nga si Henri Daniel-Rops nag-ingon nga parehas kinig lami sa pasayan.

Sanglit sa kamingawan nagsangyaw si Juan, lagmit ang labing daling makuha nga pagkaon mao ang dulon. (Marcos 1:4) Kay kini dunay mga 75 porsiyento nga protina, kini ug ang dugos maoy sustansiyado gayod nga pagkaon.

[Hulagway sa panid 28]

Asiryanhong mga sulogoon nga nagdalag mga dulon ug granada

[Credit Line]

Gikan sa librong Discoveries Among the Ruins of Nineveh and Babylon (1853)