Ang Bibliya Makabag-o sa Kinabuhi
Nganong ang usa ka tawong hilig sa motorsiklo, droga, ug esports midesisyon sa pag-alagad ingong bug-os-panahong ministro? Unsay nakatukmod sa usa ka sugarol nga mobiya sa iyang bisyo ug mosuportar sa iyang pamilya pinaagig dungganong trabaho? Unsay nakadasig sa usa ka batan-ong babaye nga gipadako sa Saksi nga pamilya apan mitalikod sa mga sukdanan sa Bibliya sa pagbag-o sa iyang kinabuhi? Tagda kon unsay ilang ikasulti bahin niini.
NGALAN: TERRENCE J. O’BRIEN
EDAD: 57
NASOD: AUSTRALIA
KANIADTO: MIGAMIT UG DROGA, HILIG MAGMOTOR
KAAGI: Ako nagdako sa siyudad sa Brisbane, ang kaulohan sa Queensland. Katoliko ang among pamilya, apan sa dihang ako nag-otso anyos, kami dili na tigsimbahan ug wala na maghisgot ug relihiyon. Pag-edad nakog diyes, ang among pamilya mibalhin sa Gold Coast sa Australia. Ang among balay duol sa baybayon, busa nahilig ko sa paglangoy-langoy ug sa pag-surfing sa dihang bayongbayong pa ko.
Apan dili malipayon ang akong pagkabatan-on. Kami gibiyaan ni Papa sa otso anyos pa ko. Naminyog usab ang akong inahan, ug diha sa among panimalay naandan na ang panaglalis ug ang pag-inom ug makahubog nga ilimnon. Usa niana ka gabii, samtang naglingkod ko sa katre human sa grabeng panaglalis sa akong mga ginikanan, ako nanumpa nga dili gyod ko makiglalis sa akong asawa kon ugaling maminyo ko. Apan bisan pa sa mga suliran, kaming unom nga managsoon uban sa among inahan ug amaama suod gihapon kaayo.
Sa hapit na kong mag-edad ug bayente, daghan sa akong kaedad mirebelde sa awtoridad. Sila migamit ug marijuana, sigarilyo, ug uban pang droga, ug sila nahimong mga palainom. Sama sa akong mga kaedad, ang akong kinabuhi walay direksiyon. Nahilig usab ko nga magmotor. Bisag duha ka beses kong nakasinatig grabeng aksidente, gusto gihapon kong magmotor ug gani gilibot nako ang tibuok Australia pinaagig motorsiklo.
Bisan pa sa kagawasan nga akong nabatonan, sagad mobati kog kaguol sa dihang mamalandong ko sa kahimtang sa kalibotan ug sa kawalay-pagtagad sa kadaghanan bahin sa mga suliran sa katawhan. Gipangandoy ko nga masayran ang kamatuoran bahin sa Diyos, relihiyon, ug sa mga kahimtang sa kalibotan. Apan sa gipangutana ko kana sa duha ka paring Katoliko, wala ako matagbaw sa ilang mga tubag. Gipakigsulti ko usab kana sa lainlaing mga ministrong Protestante apan wala gihapon ko matagbaw sa ilang mga tubag. Dayon gihikay sa akong usa ka amigo nga magkita mi ni Eddie, nga usa sa mga Saksi ni Jehova. Upat ka beses kaming nag-estoryahay ni Eddie, ug sa matag higayon, siya migamit ug Bibliya sa pagtubag sa akong mga pangutana. Sukad sa among unang panaghisgot, mibati ko nga nakaplagan na gyod nako ang kamatuoran. Apan niadtong panahona wala pa ko magbag-o sa akong kinabuhi.
KON SA UNSANG PAAGI GIBAG-O SA BIBLIYA ANG AKONG KINABUHI: Sa akong paglibot sa tibuok Australia, akong nahibalag ang laing Saksi ug kami nagkaestoryahanay. Apan sa pagbalik nako sa Queensland, wala koy kontak sa mga Saksi sulod sa unom ka bulan.
Dayon, usa niana ka adlaw sa dihang ako mipauli gikan sa trabaho, akong nakita ang duha ka lalaking naglakaw sa dalan nga maayog-pamesti ug nagdalag bag, ug nanaghap ko nga sila mga Saksi ni Jehova. Ako silang giduol ug akong nahibaloan nga husto diay ang akong panaghap, ug unya ako silang gihangyo nga dumalahan kog pagtuon sa Bibliya. Misugod dayon ko sa pagtambong sa mga tigom sa mga Saksi ug mitambong pa gani kog usa ka dakong kombensiyon sa Sydney niadtong 1973. Apan sa dihang nasayran sa akong pamilya, ilabina sa akong inahan, ang akong gihimo, sila naguol pag-ayo. Tungod niana ug sa uban pang hinungdan, mihunong ko sa pagpakig-uban sa mga Saksi. Sulod sa usa ka tuig, napokus ang akong pagtagad sa usa pa nako ka paboritong dula, ang cricket.
Apan sa ulahi akong naamgohan nga lahi gayod ang kalipay nga akong gibati sa dihang ako nagtuon pa sa Bibliya uban sa mga Saksi ni Jehova. Gikontak ko sila pag-usab ug gisugdan ko ang pagtambong sa mga tigom. Mihunong pod ko sa pagpakig-uban sa akong mga higala nga tiggamit ug droga.
Ang nakatukmod kanako sa pagbag-o sa akong kinabuhi mao ang akong nakat-onan bahin sa usa ka karakter sa Bibliya nga si Job. Ang buotan apan pintok manulti nga edarang Saksi nga si Bill regular nga nagdumalag pagtuon sa Bibliya kanako. Human namo matun-i ang kaagi ni Job, nangutana kanako si Bill kon kinsa pay giakusahan ni Satanas nga dili-kinasingkasing nga nag-alagad sa Diyos. (Job 2:3-5) Gihisgotan ko ang tanang karakter sa Bibliya nga akong nailhan, ug si Bill mapailobong mitubag, “Oo, apil sab na sila.” Unya iya kong gitan-aw sa akong mata ug miingon, “Si Satanas nag-akusar usab kanimo!” Nakugang ko sa iyang gisulti. Una pa sa maong pagtuon, nahibalo na ko nga ang mga doktrinang akong nakat-onan mao ang kamatuoran. Apan nianang higayona, akong nasabtan nga kinahanglan nakong ipadapat ang akong nakat-onan. Upat ka bulan sa ulahi, ako nabawtismohan ingong usa sa mga Saksi ni Jehova.
MGA KAAYOHAN NGA AKONG NABATONAN: Makapanglingo ko sa dihang palandongon nako kon unsa kahay kahimtang sa akong kinabuhi karon kon wala pa ko magsunod sa mga sukdanan sa Bibliya. Lagmit patay na ko. Kadaghanan sa akong kanhing mga barkada namatay tungod sa pagdroga o sa paghuboghubog. Dili usab malipayon ang ilang mga kaminyoon. Sa akong hunahuna, basin mao usab kanay nahitabo sa akong kinabuhi.
Ako minyo na, ug kami sa akong asawa nga si Margaret malipayong nag-alagad sa sangang-buhatan sa mga Saksi ni Jehova sa Australia. Walay bisan usa sa akong pamilya ang nag-alagad kang Jehova. Bisan pa niana, latas sa katuigan, kami ni Margaret malipayong nakatabang sa ubay-ubayng indibiduwal ug sa mga magtiayon nga makakat-on sa Bibliya ug magbag-o sa ilang kinabuhi. Sa lakat sa panahon, nakabaton kamig daghang buotang mga higala. Dugang pa, si Margaret, kinsa nagdako nga Saksi, nagtabang kanako sa pagtuman sa akong gipanaad duolag 40 ka tuig kanhi. Kami nagmalipayon sa among kaminyoon sulod na sa kapig 25 ka tuig. Dili sa tanang higayon magkauyon mi, apan hangtod karon wala pa gayod mi maglalis. Among gibati nga ang Bibliya mao ang angay namong pasalamatan niana.
NGALAN: MASAHIRO OKABAYASHI
EDAD: 39
NASOD: JAPAN
KANIADTO: SUGAROL
KAAGI: Nagdako ko sa Iwakura, usa ka dapit nga mga tunga sa oras nga biyaheon sa tren gikan sa Nagoya. Ang akong mahinumdoman sa akong inahan ug amahan mao ang ilang kabuotan. Apan sa ulahi akong nasayran nga ang akong amahan usa ka yakuza o membro sa gang, ug ang among pamilya nga may lima ka membro iyang gibuhi pinaagig ilegal nga kinitaan. Adlaw-adlaw siyang mahubog mao nga sa nag-edad kog 20, siya namatay gumikan sa cirrhosis sa atay.
Ang akong amahan Koreano, mao nga ang kadaghanan sa mga tawo sa among dapit adunay pagpihig batok sa among pamilya. Tungod niana ug sa uban pang mga suliran, miserable ang akong kinabuhi ingong tin-edyer. Nagpaenrol ko sa hayskul apan ako panagsa rang mosulod sa klase ug human sa usa ka tuig ako miundang. Ako may rekord na sa kapolisan, busa tungod niana ug sa akong pagkamestiso Koreano, naglisod ko sa pagpangitag trabaho. Sa kadugayan nakakita ra kog trabaho, apan kay nagkaproblema ang akong tuhod, dili na ko makahimog bug-at nga trabaho.
Gihimo nako nga panginabuhi ang dulang pachinko, usa ka sugal nga ang kasangkapan parehas sa pinball machine. Niadtong panahona, may puyopuyo ako ug gusto niyang mangita kog desenteng trabaho ug dayon magpakasal mi. Apan dako ang akong kinitaan sa sugal, ug dili ko gustong magbag-o sa akong estilo sa kinabuhi.
KON SA UNSANG PAAGI GIBAG-O SA BIBLIYA ANG AKONG KINABUHI: Usa niana ka adlaw, gisangyawan ko sa usa ka Saksi ni Jehova ug gibinlan kog librong Life—How Did It Get Here? By Evolution or by Creation? Wala pa ko makapangutana ug ingon niana sukad. Apan, human nako mabasa ang maong libro, miuyon ko sa pagtuon ug dugang pa sa Bibliya. Pirmeng mosantop sa akong hunahuna kon unsay mahitabo sa dihang mamatay ang usa ka tawo. Daw may mga himbis nga natagak gikan sa akong mga mata sa dihang nadawat ko ang tin-awng mga tubag gikan sa Bibliya bahin niini ug sa ubang ulohan.
Nasabtan ko nga kinahanglan nakong ipadapat ang akong nakat-onan sa Bibliya. Busa gipakaslan nako ang akong puyopuyo, gibiyaan ang sigarilyo, gipaputol ang taas kong buhok nga gitinag bulagaw, ug gihinloan ang akong dagway. Gihunong ko usab ang sugal.
Dili sayon nga himoon ang maong mga kausaban. Pananglitan, wala ako makabiya sa sigarilyo sa akong kaugalingong kusog. Apan pinaagig tim-os nga pag-ampo ug pagsalig kang Jehova nga Diyos, nakabiya ko niana. Lain pa, nalisdan ko pag-ayo sa unang trabaho nga akong nasudlan human sa akong paghunong sa pachinko. Ang akong kita katunga ra sa akong kinitaan sa sugal, ug ang trabaho lisod ug hago. Ang usa ka teksto nga nakatabang kanako sa pag-agwanta niadtong lisod nga panahon mao ang Filipos 4:6, 7, nga nag-ingon: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” Sa daghang higayon kanang saara natinuod kanako.
MGA KAAYOHAN NGA AKONG NABATONAN: Sa pagsugod nakog tuon sa Bibliya uban sa mga Saksi ni Jehova, ang akong asawa wala malipay. Apan sa pagkakita niya sa akong dakong kausaban, siya miduyog kanako sa pagtuon sa Bibliya ug misugod sa pagtambong sa mga tigom sa mga Saksi ni Jehova. Kaming duha karon mga Saksi na. Pagkadakong panalangin nga kami magkauban sa pag-alagad sa Diyos!
Sa wala pa ko magtuon sa Bibliya, nagtuo kong malipayon na ako. Apan karon nahibalo na ko kon unsa ang tinuod nga kalipay. Dili gayod sayon ang pagsunod sa mga sukdanan sa Diyos, apan segurado ko nga kini ang labing maayong paagi sa kinabuhi.
NGALAN: ELIZABETH JANE SCHOFIELD
EDAD: 35
NASOD: UNITED KINGDOM
KANIADTO: ANG PAGLINGAWLINGAW SA HINAPOS SA SEMANA MAOY SENTRO SA IYANG KINABUHI
KAAGI: Nagdako ko sa Hardgate, usa ka gamayng lungsod nga dili ra layo sa Glasgow, Scotland. Sa siyete anyos pa ko, ang akong inahan nga nahimong Saksi ni Jehova nagtudlo kanako bahin sa Bibliya. Apan sa dihang ako nag-17 anyos, mas interesado ko nga makig-uban sa akong mga higala sa eskuylahan—mangadtog nightclub, mamatig heavy metal nga musika, ug manginom ug makahubog nga ilimnon. Wala gyod ko maghunahuna bahin sa espirituwal nga mga butang. Kalingawan lamang sa hinapos sa semana ang akong gihunahuna. Apan nausab kanang tanan sa dihang ako nag-21 anyos.
Mibisita ko sa pipila sa akong mga paryente sa Northern Ireland. Nasaksihan ko didto ang Orange Walk, usa ka parada sa mga Protestante. Nakurat kaayo ko sa dihang akong nakita ang grabeng dinumtanay ug kamapihigon nga gipahayag sa mga Protestante ug mga Katoliko niadtong okasyona. Ngani, tungod niadto nahigmata ko. Nahinumdoman ko ang mga gitudlo sa akong inahan kanako gikan sa Bibliya. Nahibalo ko nga ang Diyos dili gayod mouyon niadtong mosalikway sa iyang mahigugmaong mga sukdanan. Dayon kalit kong naamgohan nga nangagpas lang diay ko sa akong kaugalingong tinguha ug wala magkinabuhi sumala sa kabubut-on sa Diyos. Midesisyon ko nga sa akong pagbalik sa Scotland seryoso na gyod kong magtuon sa Bibliya.
KON SA UNSANG PAAGI GIBAG-O SA BIBLIYA ANG AKONG KINABUHI: Sa dihang mibalik ko sa pagtambong sa tigom sa mga Saksi ni Jehova sa among lungsod, ako naulaw ug gikulbaan. Apan ang tanan nag-abiabi kanako. Sa gisugdan ko sa pagpadapat ang akong nakat-onan sa Bibliya, usa ka maluloton kaayong membro sa kongregasyon ang naghatag kanakog linaing pagtagad. Iya kong gitabangan aron ako mobating bahin na usab sa kongregasyon. Ang akong kanhing mga barkada padayong nagdapit kanako nga mouban sa mga nightclub, apan gisultihan ko sila nga magseryoso na ko sa pagsunod sa mga sukdanan sa Bibliya. Sa kadugayan wala na sila mokontak kanako.
Sa una akong giisip ang Bibliya ingong basahon lang sa kalagdaan. Ang akong tinamdan karon nausab na. Giisip ko na ang mga karakter sa Bibliya ingong tinuod nga mga tawo nga may mga pagbati ug mga kahuyangan nga sama kanako. Nakahimo usab silag mga sayop, apan sila gipasaylo ni Jehova nga Diyos sa dihang tinuod silang naghinulsol. Masaligon ko nga bisan pag mitalikod ko sa Diyos sa bata pa ako, siya magpasaylo kanako ug iyang kalimtan ang akong nangaging kasaypanan kon maningkamot ko sa pagpahimuot kaniya.
Ako nakadayeg usab sa panggawi sa akong inahan. Siya wala gayod motalikod sa Diyos bisag ako mitalikod. Ang iyang panig-ingnan sa pagkamaunongon nakapaamgo kanako nga ang pag-alagad kang Jehova takos gayod sa paningkamot. Sa bata pa ko, kontragusto ang akong pag-uban sa akong inahan sa pagsangyaw sa balay-balay, ug dili nako masabtan kaniadto kon nganong kinahanglang mogugol ug daghang oras sa pagsangyaw sa mga tawo. Apan karon akong napamatud-an nga tinuod ang saad ni Jesus sa Mateo 6:31-33. Siya miingon: “Ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ . . . Ang inyong langitnong Amahan nahibalo nga gikinahanglan ninyo kining tanang butanga. Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.” Wala madugay human sa akong bawtismo ingong usa sa mga Saksi ni Jehova, ako miundang sa akong bug-os-panahong trabaho, misulod ug part-time nga trabaho, ug nahimong bug-os-panahong ministro.
MGA KAAYOHAN NGA AKONG NABATONAN: Sa batabata pa ko, sa dihang kalingawan lang sa hinapos sa semana ang akong gihunahuna, ako dili gayod matagbawon. Haw-ang ang akong kinabuhi kaniadto. Apan karon, matagbawon na ko sa akong kinabuhi isip bug-os-panahong alagad ni Jehova. Aduna nay katuyoan ang akong kinabuhi. Minyo na ko, ug kami sa akong bana nagaduaw ug lainlaing mga kongregasyon sa mga Saksi ni Jehova kada semana sa pagpalig-on kanila. Giisip ko kining buluhatona ingong talagsaon kaayong pribilehiyo. Mapasalamaton kaayo ko kang Jehova tungod sa paghatag kanakog laing kahigayonan!
[Blurb sa panid 27]
“Sukad sa among unang panaghisgot, mibati ko nga nakaplagan na gyod nako ang kamatuoran. Apan niadtong panahona wala pa ko magbag-o sa akong kinabuhi”
[Blurb sa panid 29]
“Wala ako makabiya sa sigarilyo sa akong kaugalingong kusog. Apan pinaagig tim-os nga pag-ampo ug pagsalig kang Jehova nga Diyos, nakabiya ko niana”
[Blurb sa panid 30]
“Sa una akong giisip ang Bibliya ingong basahon lang sa kalagdaan. Ang akong tinamdan karon nausab na. Giisip ko na ang mga karakter sa Bibliya ingong tinuod nga mga tawo nga may mga pagbati ug mga kahuyangan nga sama kanako”