Ang mga Saksi ni Jehova Modawat bag Medikal nga Pagtambal?

Si Jesus miingon nga “ang mga tawong himsog wala magkinahanglan ug mananambal, kondili ang mga masakiton.” (Mateo 9:12) Iyang gipasabot nga dili supak sa Kasulatan nga mokonsultag doktor aron magpatambal. Busa ang mga Saksi ni Jehova magpatambal ug moinom ug medisina. Buot nila ang maayong panglawas ug taas nga kinabuhi. Ngani, sama kang Lucas sa unang siglo, ang ubang mga Saksi ni Jehova maoy mga doktor.—Colosas 4:14, Maayong Balita Bibliya.

Apan, dili dawaton sa mga Saksi ni Jehova ang matang sa pagtambal nga supak sa mga prinsipyo sa Bibliya. Pananglitan, dili sila magpaabonog dugo aron sa pagsustenir sa lawas tungod kay gidili kini sa Bibliya. (Genesis 9:4; Levitico 17:1-14; Buhat 15:28, 29) Gidili usab sa Bibliya ang mga paagi sa pagtambal nga nalangkit ang “mahikanhong gahom,” o espiritismo.—Isaias 1:13; Galacia 5:19-21.

May mga paagi sa pagtambal nga gigamit sa daghang doktor nga makaluwas ug kinabuhi nga dili supak sa mga sukdanan sa Bibliya. Ang maong mga paagi nga gidawat sa daghang Saksi sagad mas maayo pa kay sa mga paagi nga supak sa sugo sa Diyos.

Siyempre, daghan ang opinyon mahitungod sa pagtambal. Ang makaayo sa usa mahimong dili epektibo sa lain. Busa, kon ang usa buot masayod kon unsa gayod ang iyang sakit ug ang tambal niini, siya mangayog laing opinyon sa ubang doktor.—Proverbio 14:15.

Dili tanang Saksi ang parehog desisyon. Ang mga Kristohanon gihatagag kagawasan sa Bibliya sa pagpili sumala sa ilang tanlag kon walay nasupak nga balaod niini. (Roma 14:2-4) Busa kinahanglang susihon sa matag usa ang bisan unsang gisugyot nga pagtambal ug tinoon nga kini dili supak sa iyang tanlag nga nabansay sa Bibliya.—Galacia 6:5; Hebreohanon 5:14.

Mahimong ikatandi sa usa ka Saksi ang iyang paghimog mga desisyon ngadto sa usa ka drayber nga nagsingabot sa usa ka trapik nga interseksiyon. Kon magsunodsunod lang siya sa mga sakyanan nga nag-una ug mopaturatoyg padagan sa interseksiyon, siya lagmit maaksidente. Ang maayong drayber momenor ug tan-awon pag-ayo ang trapiko sa dili pa mopadayon. Sa susama, ang mga Saksi dili magdalidali sa paghimog mga desisyon bahin sa pagtambal, ni motuo dayon kon unsay giingon sa kadaghanan. Hinunoa, ilang timbangtimbangon ug susihon ang mga prinsipyo sa Bibliya sa dili pa mohimog desisyon.

Tinong gipabilhan sa mga Saksi ni Jehova ang kakugi ug dedikasyon sa mga doktor sa pagtambal kanila. Sila usab mapasalamaton kanila tungod sa kahupayan nga ilang gihatag.