Ang Bibliya Makabag-o sa Kinabuhi

UNSAY nagtukmod sa usa ka tigtanom ug tabako nga talikdan ang iyang trabaho ug ang iyang namat-ang relihiyon? Sa unsang paagi ang usa ka palainom nakabatog kalig-on sa pagbag-o sa iyang kinabuhi? Basaha kon unsay ilang giingon.

‘Nalipay Ko nga Bahin Ko Niining Dakong Pamilya.’—DINO ALI

NATAWO: 1949

NASOD: AUSTRALIA

KANIADTO: TIGTANOM UG TABAKO

KAAGI: Ang akong ginikanan mibiya sa Albania niadtong 1939 ug mipuyo sa Mareeba, usa ka gamayng lungsod sa Queensland, Australia. Daghang Bosniano, Grego, Italyano, Serbiano, ug uban pa, ang namuyo dinhi nga lainlaig prinsipyo, kostumbre, ug kultura. Ang mga tawo sa Mareeba tigtanom ug tabako, mao man usab ang akong ginikanan.

Sa wa madugay, natawo ang akong magulang nga babaye, nga gisundag duha ka lalaki ug dayon ako. Ikasubo, sa dihang usa pa lang ko ka tuig, si Papa giatake sa kasingkasing ug namatay. Si Mama naminyo pag-usab ug nanganak pag upat ka lalaki. Kaming tanan nagdako sa umahan sa akong amaama nga nananom sab ug tabako.

Mibiya ko sa balay sa tin-edyer pa ko. Pag-edad nakog mga 20 anyos, gikasal mi ni Saime sa moske, kay pareho ming Muslim. Ang tanan nakong paryente mga Muslim. Akong gibasa ang Koran ug ang usa ka libro bahin sa propeta nga si Muhammad. Gibasa usab nako ang usa ka gamayng Bibliya. Ang Koran naghisgot sa mga propeta nga anaa sa Bibliya, ug ang pagbasa sa Bibliya nakatabang nako nga mahibaloan kon kanus-a sila nabuhi.

Ang mga Saksi ni Jehova miduaw sa among balay. Human niadto, pirme na mi nilang binlag mga magasin ug libro, ug ganahan mi ni Saime nga magbasa niini. Nahinumdom ko sa makapainteres nga mga panaghisgot uban sa mga Saksi sa lainlaing tema bahin sa relihiyon. Sa matag higayon, tubagon nila ang akong mga pangutana base sa Bibliya, imbes sa kaugalingon nilang opinyon. Nakadayeg kaayo ko niana.

Giawhag ko sa mga Saksi nga magtuog Bibliya uban nila ug ila kong gidapit sa ilang mga tigom, apan pirme kong mobalibad. Ang akong prayoridad mao ang pagbaton ug kaugalingong umahan ug usa ka dakong pamilya. Wa gyod ko makapanag-iyag umahan, apan sa ngadtongadto nalipay kong nakabatog lima ka anak.

GIBAG-O SA BIBLIYA ANG AKONG KINABUHI: Siyam ka tuig human nako unang mahimamat ang mga Saksi, wala gihapon nako usba ang akong tinuohan. Apan, ganahan kong mobasa sa tanan nilang publikasyon. Kada Dominggo gyod ming magbasa ni Saime niana. Among gitipigan ang tanang magasin nga among nadawat latas sa katuigan. Tungod niini, nagpabilin kong lig-on sa dihang gisulayan ang pagtuo nga inanayng miturok sa akong kasingkasing.

Pananglitan, nahibalag nako ang usa ka ebanghelikal nga magsasangyaw nga mipugos nako sa pagdawat kang Jesus ingong akong Manluluwas. Iyang nakombinsir ang igsoong lalaki ni Saime ug ang usa sa akong igsoon sa inahan nga mosunod niya. Sa wa madugay, ang akong mga kaila sa lainlaing relihiyon mikombinsir sab nako nga moanib sa ilang grupo. Ang uban naghatag nakog mga basahon nga nag-atake sa mga Saksi. Ako silang giingnan nga pamatud-an nila sa Bibliya ang ilang doktrina, apan wala nila kana mahimo.

Kining tanang pagsupak nagtukmod hinuon nako sa pagsusi pag dugang sa Bibliya, gamit ang mga basahon gikan sa mga Saksi. Sa kataposan, akong naamgohang panahon na nga molihok ko sumala sa akong nakat-onan.

Wala koy pormal nga pagtuon sa Bibliya uban sa mga Saksi; basta mitambong na lang ko sa ilang mga tigom. Sa sinugdan, maulaw kaayo ko, apan daghang mahigalaong tawo ang akong nailaila sa mga tigom, ug giganahan ko sa akong nakat-onan. Nakadesidir kong mag-Saksi, ug niadtong 1981, akong gisimbolohan ang akong pagpahinungod sa Diyos pinaagig bawtismo.

Ang akong asawa wala mosupak sa akong desisyon, bisan tuod usahay magduda siyang nalimbongan ko. Sa gihapon, mitambong siya sa akong bawtismo. Padayon kong nagpaambit niya sa mga kamatuoran nga akong nakat-onan. Mga usa ka tuig human sa akong bawtismo, samtang nagbiyahe mi gikan sa bakasyon, si Saime miingon nga gusto na niyang mag-Saksi. Nakalitan kaayo ko sa iyang gisulti nga hapit ko kalimot nga nagdrayb diay ko! Siya nabawtismohan sa 1982.

Dili sayon ang pagbag-o sa among kinabuhi. Mihunong ko sa pagpananom ug tabako kay supak kana sa prinsipyo sa Bibliya. (2 Corinto 7:1; Santiago 2:⁠8) Taudtaod pa ayha mi nakakitag dalawatong trabaho nga makasustenir namo. Dugang pa, sulod sa daghang tuig ang pipila namo ka paryente dili mobisita namo. Naningkamot mi sa pagpakita kanilag gugma sumala sa prinsipyo sa Bibliya. Sa ngadtongadto nawala ang maong babag, ug karon ang among suod nga mga paryente wala na magsalikway namo.

MGA KAAYOHAN NGA AKONG NABATONAN: Ang paglahutay sa lainlaing pagsulay, pagbuntog man sa pagkamaulawon, pagsagubang sa pinansiyal nga problema, o pag-atubang sa pagsupak sa pamilya, nagtudlo nako kon unsa kamapailobon si Jehova nga Diyos sa pagtabang nako sa akong mga problema. Pananglitan, ansiyano ko karon sa kongregasyon ug sagad kinahanglan kong mobarog sa plataporma. Nalisdan gihapon ko niini kay mongângâ ko kon nerbiyoson. Apan sa padayong pag-ampo ug sa tabang ni Jehova, nakaatiman ko niining pribilehiyoa.

Kami sa akong asawa mas nasuod, ug ang among bugkos bililhon kaayo. May mga sayop mi sa pagmatuto sa among mga anak apan naningkamot mi sa pagsilsil kanila sa kamatuoran sa Bibliya. (Deuteronomio 6:​6-9) Gani, ang kamagulangan namong anak ug ang iyang asawa nag-alagad karon ingong mga misyonaryo.

Nahinumdom ko sa usa ka higayon sa nagsugod na mig tambong sa tigom sa mga Saksi ingong pamilya. Akong giparking ang sakyanan ug gitan-aw ang mga tawo sulod sa tigomanan. Akong gipangutana ang akong pamilya, “Unsay inyong nakita?” Sa sulod, dihay mga tawong lainlaig kultura, kagikan, ug pinulongan​—⁠mga Aboriginal, Albaniano, Australiano, Croatiano​—⁠apan sila malipayong nag-ubanay. Nalipay kong nahimong bahin niining dakong pamilya sa espirituwal nga mga igsoon, nga naglungtad dili lang sa Australia kondili sa tibuok kalibotan.​—⁠1 Pedro 5:⁠9.

“Wala Gyod Mosurender ang Akong Igsoon.”—YELENA VLADIMIROVNA SYOMINA

NATAWO: 1952

NASOD: RUSSIA

KANIADTO: PALAINOM, MAGHIKOG UNTA

KAAGI: Natawo ko sa Krasnogorsk, usa ka gamay, malinawong siyudad duol sa Moscow. Nagdako ko sa pamilya nga mga magtutudlo. Maayo ko sa klase ug mikuha kog kurso sa musika. Daw maayo ang akong kaugmaon.

Pagkaminyo nako, kami sa akong bana mibalhin sa dapit diin naandan na ang pagpamalikas, paghuboghubog, ug pagpanigarilyo. Wala nako mamatikdi niadtong panahona nga ang maong palibot dili maayog epekto nako. Sa sinugdan, moadto kog mga parti aron lang mokanta ug motugtog ug sista. Apan sa dihang didto na ko, hagaron ko sa mga tawo nga manigarilyo ug moinom. Sa wala madugay napalainom ko.

Hinayhinayng nadaot ang akong kinabuhi tungod sa akong bisyo. Dugaydugay pa hinuon una kini migrabe, apan sa dihang nahitabo kini, halos dili na ko makakaon. Gusto na kong mamatay, ug misulay ko paghikog. Maayo na lang gani kay wa ko madayoni.

Bisan pa niana, regular kong duawon sa akong igsoong babaye. Siya nahimong Saksi ni Jehova, ug iyang gipatin-aw kon sa unsang paagi matabangan ko sa Bibliya. Dili ko interesado sa Bibliya, busa ako siyang giingnan nga mohunong nag sangyaw nako. Apan wala gyod mosurender ang akong igsoon. Tungod sa iyang taas nga pailob ug gugma, misugot ra kong magtuon sa Bibliya.

GIBAG-O SA BIBLIYA ANG AKONG KINABUHI: Sa dihang nagtuon na ko sa Bibliya, determinado kong mohunong sa pag-inom-inom. Nianang panahona, gikulata ko sa among silingan nga hubog. Naospital ko kay nagrabehan ko. Nabali ang upat sa akong mga gusok, ug nadaot ang usa sa akong mga mata. Bisan pa niana, ang pagkaospital nakatabang nako nga mabuntog ang epekto sa akong pag-undag inom.

Niadtong panahona, pirme kong mag-ampo. Ang usa ka teksto nga nakahupay kaayo nako mao ang Lamentaciones 3:​55, 56, nga nag-ingon: “Gitawag ko ang imong ngalan, Oh Jehova, gikan sa kinahiladman nga gahong. Paminawa ang akong tingog. Ayaw itago ang imong igdulungog gikan sa paghupay kanako, sa akong pagtuaw alang sa tabang.”

Nagtuo gyod kong gitubag ni Jehova ang akong mga pag-ampo. Gihatagan ko niyag kalig-on nga dili mobalik sa akong bisyo. Dihay mga higayon nga morag matental na pod ko sa pag-inom. Nalipay kong wala gyod ko magpadaog sa maong tentasyon.

Sa akong padayong pagtuon sa Bibliya, akong nakat-onan nga kinahanglan nakong paluyohan ang akong bana sa iyang papel ingong ulo sa pamilya. (1 Pedro 3:​1, 2) Dili kadto sayon, kay naanad kong magsigeg mandar niya. Nangayo kog tabang kang Jehova. Taudtaod sab usa nako kana mabuntog, apan sa hinayhinay nahimo kong mas maayong asawa.

Sa pagkakita sa akong minahal nga bana niini nga kabag-ohan, siya nahingangha. Sa una, dili siya interesado sa Bibliya. Apan sa dihang midesidir kong hunongon na ang pagpanigarilyo, siya miingon: “Kon mohunong kag panigarilyo, magtuon na kog Bibliya!” Dungan ming mihunong sa pagpanigarilyo.

MGA KAAYOHAN NGA AKONG NABATONAN: Gituman sa akong bana ang iyang saad ug misugod siyag tuon sa Bibliya. Karon, kami dungan nang magbasag Bibliya kada adlaw, mamalandong sa among gibasa, ug naningkamot sa pagpadapat sa tambag niana sa among kinabuhi.

Dili mahubit ang mga kaayohan nga natagamtam sa among pamilya​—⁠wa pay labot niana ang kaayohan nga akong nabatonan. Mapasalamaton ko kang Jehova sa iyang pagkabig nako. (Juan 6:44) Mapasalamaton sab ko sa akong igsoon nga wala gyod mosurender. Tungod niana, akong nakita mismo nga ang Bibliya makabag-o gayod ug kinabuhi.

[Blurb sa panid 11]

Akong naamgohang panahon na nga molihok ko

[Blurb sa panid 13]

Tungod sa taas nga pailob ug gugma sa akong igsoon, misugot ra kong magtuon sa Bibliya