Pakigsuod sa Diyos
“Ako Mismo Dili Makalimot Kanimo”
NAHINGAWA ba gyod si Jehova sa iyang katawhan? Kon oo, unsa kadako ang iyang kahingawa kanila? May usa lamang ka paagi nga atong mahibaloan ang tubag niana—pinaagi sa gipadayag mismo sa Diyos. Sa Bibliya, tin-awng gipadayag ni Jehova ang iyang pagbati. Tagda ang giingon sa Isaias 49:15.
Sa pag-ilustrar sa iyang lalom nga pagbati sa iyang katawhan, si Jehova, pinaagi kang Isaias, migamit sa usa sa labing makapatandog nga mga panig-ingnan nga atong mahanduraw. Iyang gisugdan kana pinaagi niining makapahinuklog nga pangutana: “Malimot ba ang usa ka asawa sa iyang masuso nga sa ingon dili niya kaluy-an ang anak sa iyang tiyan?” Sa unang tan-aw, daw tin-aw ang tubag. Makalimot ba god ang nagpasusong inahan sa iyang anak? Kini bug-os nga nagdepende kaniya adlaw ug gabii—ug ipahibalo niini kaniya ang mga panginahanglan niini! Apan labaw pa niana ang nalangkit sa pangutana ni Jehova.
Nganong ang inahan magpasuso man sa iyang anak ug mag-atiman sa tanang panginahanglan niini? Aron ba lang pahilomon ang naghilak nga anak? Dili. Natural sa inahan nga “kaluy-an ang anak sa iyang tiyan.” Ang Hebreohanong pulong niini mahimong magpasabot sa malumong pagbati alang niadtong walay-mahimo o huyang. Ang pagbati sa inahan alang sa iyang masuso mao ang usa sa labing puwersadong emosyon.
Apan, ikasubo nga dili tanang inahan ang maluoy sa iyang masuso. “Bisan kining mga babayhana makalimot,” miingon si Jehova. Kita nagkinabuhi sa kalibotan diin daghan ang “dili-maunongon, walay kinaiyanhong pagbati.” (2 Timoteo 3:1-5) Usahay atong madunggan nga gipasagdan, giabuso, o giabandonar sa ubang inahan ang ilang bag-ong natawong anak. Ang usa ka reperensiya sa Bibliya nagkomento bahin sa Isaias 49:15: “Ang mga inahan makasasala ug usahay ang ilang gugma madaog sa ilang pagkadaotan. Bisan ang kinadak-an nga tawhanong gugma mahimong mapakyas.”
“Apan,” si Jehova nagpasalig, “ako mismo dili makalimot kanimo.” Karon ato nang masabtan ang pangutana ni Jehova sa Isaias 49:15. Dinhi iyang gipakita nga mas maluluy-on gayod siya kay sa usa ka inahan nga dili hingpit. Dili sama niini nga mga inahan, kinsa mapakyas tingali sa pagpakitag kaluoy sa ilang walay-mahimo nga masuso, si Jehova dili gyod mapakyas o makalimot sa pagpakitag malumong pagbati sa iyang mga magsisimba nga nanginahanglan. Haom ang giingon sa nahisgotan nang reperensiya bahin sa Isaias 49:15: “Kini maoy usa sa labing puwersado, kon dili man ang labing puwersadong pahayag sa gugma sa Diyos diha sa Daang Testamento.”
Dili ba makapahupay ang pagkahibalo bahin sa “malumong kaluoy sa atong Diyos”? (Lucas 1:78) Nganong dili nimo susihon kon sa unsang paagi mas masuod kang Jehova? Kining mahigugmaong Diyos nagpasalig sa iyang mga magsisimba: ‘Dili ko gayod kamo pagabiyaan ni sa bisan unsang paagi pagatalikdan.’—Hebreohanon 13:5.
Sugyot nga pagbasa sa Bibliya sa Pebrero: