Kaugalingon ray akong gihunahuna

Ang among pamilya nagpuyo kaniadto duol sa Leipzig, East Germany, dili layo sa utlanan sa Czechoslovakia ug Poland. Sa sayis anyos pa ko, nagbalhinbalhin mig puyo tungod sa trabaho ni Papa—una sa Brazil dayon sa Ecuador.

Pag-edad nakog 14, gipasulod ko nilag boarding school sa Germany. Kay tua man sa South America ang akong ginikanan, ako ray nag-atiman sa akong kaugalingon. Naanad ko nga way modiktar nako. Di ra kaayo ko magtagad kon unsay bation sa uban sa akong mga lihok.

Pagka-17 anyos nako, mibalik sa Germany ang akong ginikanan. Sa primero, ipon pa ko nila. Pero tungod sa akong kinaiya, nalisdan kong magpasakop nila. Pag-edad nakog 18, naglain na kog puyo.

Naglibog kog unsay himoon nako sa akong kinabuhi. Human nako maobserbahi ang lainlaing estilo sa kinabuhi ug mga asosasyon, nakadesisyon ko nga mas maayong magsuroysuroy sa nindot nga mga lugar sa di pa kini madaot sa mga tawo.

Mibiya ko sa Germany, mipalit ug motorsiklo, ug mibiyahe paingon sa Africa. Pero wa madugay, mibalik ko sa Europe aron ipaayo ang akong motor. Human niana, nakaabot ko sa usa ka baybayon sa Portugal. Nakahunahuna ko nga dili na magmotorsiklo ug magbiyahe na pod sakayg yate.

Mikuyog ko sa grupo sa mga batan-on nga molawig sa Atlantic Ocean. Didto nako nailaila si Laurie, ang akong naasawa. Una, nangadto mi sa mga isla sa Caribbean. Ug human makaestar kadiyot sa Puerto Rico, namalik mi sa Europe. Nangita mig sailboat aron himoong yate nga mapuy-an. Pero human sa tulo ka bulan, nabalda ang among plano. Gipatawag ko sa Germany aron magsundalo.

Kinse ka bulan ko sa German navy. Nianang panahona, nagminyo mi ni Laurie ug nagplano nga ipadayon ang among pagsuroysuroy. Sa wa pa ko magsundalo, nakapalit na mig kasko. Ug samtang naa pa ko sa navy, anam-anam namo kining gihimong de-layag nga sakayan. Nagplano ming mopuyo niini ug padayong magsuroysuroy sa nindot nga mga lugar. Niining higayona, human magsundalo ug sa wa pa mahuman ang sakayan, nasangyawan mig mga Saksi ni Jehova ug nagpa-Bible study.

Sa primero, wala koy nakitang angay usbon sa akong kinabuhi. Kasado mi ni Laurie ug wala na ko manigarilyo. (Efeso 5:5) Para nako, maayo kaayo ang among plano nga moadtog lainlaing lugar aron makita ang nindot nga kalalangan sa Diyos.

Pero ang tinuod, kinahanglan kong magbag-o ilabina sa akong personalidad. Garboso kaayo ko ug bilib sa akong mga abilidad ug nalampos. Kaugalingon ray akong gihunahuna.

Usa ka adlaw, gibasa nako ang giingon ni Jesus sa iyang iladong Wali sa Bukid. (Mateo, kapitulo 5-7) Naglibog ko sa mga kalipay nga iyang gihisgotan. Pananglitan, si Jesus miingon nga malipayon ang mga gigutom ug giuhaw. (Mateo 5:6) Naghunahuna ko kon sa unsang paagi magmalipayon kadtong naa sa maong kahimtang. Sa nagpadayon kog tuon, naamgohan nako nga kitang tanan may espirituwal nga panginahanglan, pero matagbaw lang kana kon mapainubsanon nato kanang ilhon. Sama sa giingon ni Jesus: “Malipayon kadtong mahunahunaon sa ilang espirituwal nga panginahanglan.”—Mateo 5:3.

Human masugdi ang among pag-Bible study sa Germany, namalhin mi ni Laurie sa France, ug dayon sa Italy. Bisag asa mi moadto, dunay mga Saksi ni Jehova. Nakadayeg kaayo ko sa ilang tinuorayng gugma sa usag usa, panaghiusa, ug internasyonal nga panag-igsoonay. (Juan 13:34, 35) Ngadtongadto, kami ni Laurie nagpabawtismo ingong mga Saksi ni Jehova.

Human niana, padayon pa kong nagbag-o sa akong personalidad. Milawig mi ni Laurie paingon sa Africa ug mitabok sa Atlantic Ocean ngadto sa United States. Diha sa lawod, nga kami rang duha sa gamayng sakayan, nakaamgo ko kon unsa ko ka gamay ikomparar sa atong gamhanang Maglalalang. Kay wa kaayo miy mabuhat sa lawod, dako kog panahon sa pagbasag Bibliya. Natandog ko ilabina sa asoy sa kinabuhi ni Jesus sa yuta. Kay hingpit, may mga abilidad siya nga di matupngan ni bisan kinsa, pero wala gyod siya magpasigarbo. Ang kanunay niyang gipasidunggan mao ang iyang langitnong Amahan, dili ang kaugalingon.

Samtang namalandong ko sa ehemplo ni Jesus, akong naamgohan nga angay nakong unahon ang Gingharian sa Diyos imbes ang akong mga gusto. (Mateo 6:33) Pag-abot namo ni Laurie sa United States, nakadesisyon mi nga mopuyo na didto ug magpokus sa pag-alagad sa Diyos.

Kaniadto dili ko segurado sa akong mga desisyon. Apan karon, nakaplagan ko ang kasaligang kaalam nga mogiya nako. (Isaias 48:17, 18) May katuyoan na ang akong kinabuhi—ang pagsimba sa Diyos ug pagtabang sa uban nga makakat-on bahin niya.

Tungod sa pagpadapat sa mga prinsipyo sa Bibliya, mas milig-on ang among panagtiayon ni Laurie. Gipanalanginan sab mig guwapang anak nga nahigugma kang Jehova.

Usahay makasinati pod mig mga unos sa among kinabuhi. Pero sa tabang ni Jehova, determinado ming padayong mag-alagad ug mosalig niya.—Proverbio 3:5, 6.