Payunir nga Pag-alagad—Kini ba Alang Kanimo?
1 “Wala na akoy mahunahunaang buhaton nga bisan unsa pa. Wala na gayod akoy mahunahunaang bisan unsang butang nga makahatag sa samang kalipay.” Kinsay miingon niini? Usa sa ginatos ka libo nga mga Saksi ni Jehova nga naghimo sa bug-os-panahong ministeryo nga maoy ilang malipayong karera sa kinabuhi. Gitagad na ba nimo sa mainampoong paagi kon ang payunir nga pag-alagad alang ba kanimo? Tungod kay nakahimo na ug walay lipudlipod nga pahinungod sa atong kaugalingon ngadto kang Jehova, angay gayod natong tagdon kon kita ba makahimog mas bug-os nga pakig-ambit sa pagpakaylap sa maayong balita sa Gingharian. Nianang maong tumong, palihog tagda ang pipila ka pangutana nga gisukna sa daghan bahin sa payunir nga pag-alagad.
PANGUTANA 1: “Ang uban mosulti nga ang pagpayunir dili alang sa tanan. Unsaon nako pagkahibalo kon kini alang kanako?”
2 Ang tubag nagaagad sa imong mga kahimtang ug Kasulatanhong mga obligasyon. Anaay daghan kansang panglawas o presenteng kahimtang sa kinabuhi dili motugot kanila sa paggugol ug 90 ka oras sa usa ka bulan nganha sa ministeryo. Kuhaa ingong usa ka pananglitan ang daghang matinumanon nga mga igsoong babaye nga maoy Kristohanong mga asawa ug mga inahan. Sila sagad nagapakig-ambit sa ministeryo kutob sa ilang maarangan sa gilapdon nga itugot sa ilang mga kahimtang. Sa itugot sa kahigayonan, sila nagaoksilyare payunir sa usa ka bulan o kapin pa sa matag tuig, nga nagaani sa mga kalipay nga nagasumikad sa pagpadako sa ilang pakig-ambit diha sa pag-alagad. (Gal. 6:9) Bisan tuod ang ilang mga kahimtang tingali dili motugot kanila sa pag-alagad ingong bug-os-panahong mga payunir sa pagkakaron, ilang ginapalambo ang espiritu sa pagpayunir ug usa ka panalangin sa kongregasyon ingong masibotong mga magmamantala sa maayong balita.
3 Sa laing bahin, daghang igsoong lalaki ug babaye nga may pagkaluag sa mga obligasyon nakasulod sa payunir nga pag-alagad pinaagig pagpasibo sa ilang mga unahonon. Unsa na man ang bahin kanimo? Ikaw ba usa ka batan-on nga nakatapos na sa imong sekular nga pagtungha? Ikaw ba usa ka asawa kansang bana makaarang sa pagtagana sa igong paagi alang sa pamilya? Ikaw ba minyo nga walay giatimang mga anak? Miretiro ka na ba gikan sa imong sekular nga trabaho? Magpayunir man o dili magpayunir maoy desisyon nga angayng himoon sa matag tawo alang sa iyang kaugalingon. Ang pangutana mao, Makahatag ka ba ug luna sa imong kinabuhi sa pagpayunir?
4 Gigamit ni Satanas ang iyang kalibotanong sistema sa mga butang sa pagpuno sa atong mga kinabuhi sa mga kabaldahan ug pagputos kanato sa hinakog nga paagi sa kinabuhi. Kon kita determinado sa pagpabiling dili bahin sa kalibotan, si Jehova motabang kanato sa pag-una sa intereses sa Gingharian ug sa pagkab-ot ug pagbaton sa tanang pribilehiyo sa teokratikanhong pag-alagad nga atong mabatonan. Kon ikapasibo mo ang imong mga kahimtang aron makaalagad ingong payunir, nganong dili buhaton kana?
PANGUTANA 2: “Sa unsang paagi ako makaseguro nga masuportahan ko ang akong kaugalingon sa pinansiyal diha sa bug-os panahong pag-alagad?”
5 Tinuod nga sa daghang nasod ang mga oras nga gikinahanglan sa sekular nga trabaho sa matag semana sa pagbaton sa giisip nga mga kinahanglanon sa kinabuhi nag-uswag sa nanglabayng katuigan. Bisan pa niana, daghan ang nakapayunir sulod sa mga dekada, ug si Jehova nagpadayon sa pagsustento kanila. Aron molampos ingong payunir, ang pagtuo ug ang espiritu sa pagsakripisyo-sa-kaugalingon gikinahanglan. (Mat. 17:20) May pasalig kita sa Salmo 34:10 nga ‘kadtong nagapangita kang Jehova dili makulangan ug bisan unsang butang maayo.’ Si bisan kinsang mosulod sa payunir nga pag-alagad kinahanglang magbuhat sa ingon uban ang bug-os nga pagsalig nga si Jehova magtagana kaniya. Siya nagabuhat gayod niana alang sa matinumanong mga payunir bisan diin! (Sal. 37:25) Siyempre, uyon sa mga prinsipyo sa 2 Tesalonica 3:8, 10, ug 1 Timoteo 5:8, ang mga payunir dili magdahom sa uban sa pagsuportar kanila sa pinansiyal.
6 Si bisan kinsang naghunahuna sa payunir nga pag-alagad kinahanglang mobuhat sumala sa giingon ni Jesus: “Una molingkod ug kuwentahon ang gasto.” (Luc. 14:28) Ang pagbuhat niini nagapakitag praktikal nga kaalam. Pakigsulti niadtong nakapayunir nga malamposon sulod sa ubay-ubayng katuigan. Suknaa kon sa unsang paagi si Jehova nagsustento kanila. Ang imong magtatan-aw sa sirkito maoy may kasinatiang payunir nga malipay sa pagtanyag ug mga sugyot kon unsaon paglampos diha sa bug-os-panahong ministeryo.
7 Ang usa ka tawo hayan dili gayod makasinati sa katinuoran sa saad ni Jesus sa Mateo 6:33 hangtod nga iyang itugyan ang iyang kaugalingon diha sa mga kamot ni Jehova. Usa ka matinumanong payunir nga babaye miasoy: “Sa dihang ang akong kauban ug ako midangat sa bag-ong asaynment ingong mga payunir, aduna lamang kamiy pipila ka utanon, diyutayng mantekilya, ug walay salapi. Nahurot namo ang pagkaon sa panihapon ug miingon, ‘Human niini wala na tay para ugma.’ Nag-ampo kami bahin niana, ug natulog. Sayo sa buntag pagkaugma ang usa ka lokal nga Saksing babaye miduaw ug nagpailaila, nga miingon, ‘Ako nag-ampo nga si Jehova magpadalag mga payunir. Karon ako makakuyog kaninyo sa halos tibuok adlaw, apan kay ako didto magpuyo sa kabanikahan, ako gayod maniudto uban kaninyo, busa akong gidala kining pagkaon alang kanatong tanan.’ Daghan kadtong karneng baka ug mga utanon.” Dili ikatingala nga si Jesus nagpasalig kanato nga kita ‘mohunong na sa pagkabalaka bahin sa atong mga kalag’! Dayon siya midugang: “Kinsa ba kaninyo nga pinaagi sa pagkabalaka makadugang ug usa ka siko sa gitas-on sa iyang kinabuhi?”—Mat. 6:25, 27.
8 Ang kalibotan sa atong palibot nahimong labaw ug labaw nga materyalistikanhon. Ang nag-uswag nga pagpig-ot gimakmak kanato aron magpahiuyon. Bisan pa niana, tungod kay nakahupot ug mapainubsanong pagpabili sa bug-os-panahong ministeryo magpahimo natong kontento uban ang dili daghang materyal. (1 Tim. 6:8) Ang mga payunir nga nagahupot nga yano ug hapsay sa ilang mga kinabuhi adunay dugang panahon sa pag-alagad ug makabaton ug mas dakong kalipay ug espirituwal nga kalig-on gumikan sa pagtudlo sa uban sa kamatuoran. Bisan tuod dili mosulay sa pagkinabuhing ermitanyo, ang ilang timbang nga panglantaw sa ilang kahimtang sa panginabuhi nakapahimo kanila sa pagtagamtam sa mga panalangin sa pagpayunir.
9 Kon maidlot mong nasabtan nga kita nagkinabuhi sa kataposang mga adlaw ug nga talitapos na ang panahon alang niining daotang kalibotan, ikaw mapasibot sa espirituwal nga paagi sa paghimog gikinahanglang mga sakripisyo nga mosangyaw sa maayong balita sa matag kahigayonan. Pinaagig paghimog laing pagtino sa imong kahimtang sa panginabuhi ug pinaagig pagtugyan sa maong butang diha sa mga kamot ni Jehova, mahimong imong maamgohan nga ikaw makaalagad kaniya nga bug-os panahon. Bisan kon imong isalindot ang pipila ka materyal nga mga gusto aron makapayunir, imong matagamtam ang dagayang mga panalangin ni Jehova.—Sal. 145:16.
PANGUTANA 3: “Ingong tin-edyer, nganong kinahanglan nga akong isipon ang payunir nga pag-alagad ingong karera nga pinili?”
10 Samtang humanonon na ang imong kataposang pipila ka tuig sa pagtungha, natural nga maghunahuna ka sa umaabot. Buot ka nga mahimong seguro, malipayon, ug matagbawon. Ang tiggiyang mga magtatambag sa tunghaan tingali mosulay sa pagtimon kanimo ngadto sa maganansiyahong karera nga nagkinahanglag katuigan sa edukasyon sa kolehiyo. Ang imong nabansay pag-ayo nga Kristohanong tanlag nag-ingon kanimo nga kinahanglang mangandam ka sa pag-alagad kang Jehova nga bug-os kutob sa maarangan. (Eccl. 12:1) Mahimong nagahunahuna ka usab bahin sa pagminyo sa kapulihay ug magbaton ug pamilya. Unsay imong buhaton?
11 Ang mga desisyon nga imong himoon karon sa imong kinabuhi hayan maghulma sa imong bug-os nga kaugmaon. Kon ikaw usa na ka dedikado, bawtismadong Saksi ni Jehova, imo nang gihatag ang imong kaugalingon nga bug-os-kalag ngadto kang Jehova. (Heb. 10:7) Ang unang higayon nga imong mabatonan, sulayi ang pag-oksilyare payunir sulod sa usa o dugang mga bulan. Maghatag kini kanimog pagtilaw sa mga kangaya ug mga kaakohan nga moduyog sa regular nga pagpayunir, ug ang imong panglantaw kon unsay angay nimong buhaton sa imong kinabuhi sa walay duhaduha mahimong mas tin-aw. Dayon, inay kay pulihan ang kanhing mga kalihokan uban sa bug-os-panahong sekular nga trabaho human matapos ang pagtungha, nganong dili sugdan ang regular nga pagpayunir? Ang uban nga naghulat hangtod sa ulahing bahin sa kinabuhi sa pagtagamtam sa payunir nga pag-alagad nagmahay nga wala sila mosugod nga mas sayo.
12 Ingong batan-on, pahimusli ang imong mga kahigayonan sa pagpangab-ot sa pagkatagsaanon, ug tagamtama ang mga kaayohan nga ihatag niini diha sa bug-os-panahong pagsangyaw nga buluhaton. Kon maoy imong tinguha nga magminyo sa umaabot, wala na ing mas maayong pundasyon alang sa kaminyoon ang ikapahiluna kay sa pag-alagad una diha sa regular payunir nga buluhaton. Samtang ikaw motubo sa pagkahamtong ug sa espirituwalidad, mahimong pilion mo ang pagpayunir nga imong karera kauban sa samag-panghunahunang kapikas sa kaminyoon. Ang ubang mga magtiayon nga duyog nga nagpayunir nakasulod sa buluhaton sa sirkito o misyonaryong kanataran. Usa ka tinuod matagbawong paagi sa kinabuhi!
13 Walay sapayan kon unsa ka dugay ka nga magpadayon sa pagpayunir, imo unyang mabug-os ang imong edukasyon ug madawat ang hinungdanon kaayong pagbansay nga dili ikatagana sa bisan unsang trabaho sa yuta. Ang pagpayunir nagatudlog disiplina, personal nga organisasyon, kon unsaon sa pagpakiglabot sa mga tawo, pagsalig kang Jehova, ug kon unsaon pag-ugmad ang pailob ug kalulot—mga hiyas nga magsangkap kanimo sa pagpas-an ug mas dakong mga kaakohan.
14 Ang kinabuhi wala sukad mahimong mas walay kasegurohan alang sa katawhan. Pipila ka butang ang tinuod nga permanente, gawas sa gisaad ni Jehova. Sanglit ang imong kaugmaon bukas kaayo alang kanimo, aduna pa ba ing mas maayong panahon kay sa karon sa paghimog ugdang nga panghunahuna kon unsay imong buhaton sa imong kinabuhi sa umaabot nga katuigan? Timbangtimbanga pag-ayo ang pribilehiyo sa pagpayunir. Dili ka gayod magbasol sa pagpili sa payunir nga pag-alagad ingon nga imong karera.
PANGUTANA 4: “Dili ba kanunayng kapiot ang pagkab-ot sa gikinahanglang oras? Unsa na man kon dili nako makuha ang akong oras?”
15 Sa dihang imong pil-apan ang aplikasyon sa regular payunir, kinahanglang imong tubagon ang pangutana: “Imo na bang naorganisar ang imong personal nga mga buluhaton aron ikaw sa rasonableng paagi makadahom sa pagkab-ot sa tinuig nga kinahanglanon nga 1,000 ka oras?” Sa pagkab-ot niana, kinahanglang mag-aberids ka ug mga tulo ka oras sa matag adlaw diha sa pagsangyaw. Tin-aw, kini nagakinahanglag maayong pag-eskedyul ug disiplina-sa-kaugalingon. Kadaghanang payunir makahimog praktikal, mabuhat nga rutina sulod sa pipila ka bulan.
16 Bisan pa niana, ang Ecclesiastes 9:11 matinud-anong nag-ingon, ‘Panahon ug wala damhang panghitabo modangat kanatong tanan.’ Ang seryosong balatian o ubang wala damhang mga kahimtang magpahinabo sa payunir nga dili makakuha sa oras. Kon ang suliran dili magdugay ug mahitabo sayo sa tuig sa pag-alagad, ang gipakusgang eskedyul mahimong mao lamang ang gikinahanglan sa pagbawi sa nawalang oras. Apan komosta kon ang seryosong suliran motungha nga may pipila na lamang ka bulan ang nahibilin sa tuig sa pag-alagad ug ang payunir dili na makabawi?
17 Kon ikaw temporaryong masakit sulod sa pipila ka bulan o tungod sa pipila ka dinaliang rason nga dili na nimo makontrol dili na nimo makab-ot ang gikinahanglang mga oras, makaduol ka sa usa ka membro sa Komite sa Pag-alagad sa Kongregasyon ug isaysay ang suliran. Kon kining mga ansiyanoha maghunahuna nga mas maayong tugotan ka sa pagpadayon sa payunir nga pag-alagad nga dili na mabalaka bahin sa pagtapal sa nawalang oras, makahimo sila sa maong desisyon. Markahan sa sekretaryo ang Congregation’s Publisher Record card aron ipakita nga dili na nimo taplan ang nawalang oras. Dili kini leave of absence apan, hinunoa, espesyal nga konsiderasyon sa imong mga kahimtang.—Tan-awa ang Septiyembre 1986 nga pasukip sa Atong Ministeryo sa Gingharian, parapo 18.
18 Ang may kasinatiang mga payunir magpondog mga oras sayo sa tuig sa pag-alagad. Ang ilang payunir nga pag-alagad mao ang unahonon, busa sila usahay makakaplag nga kinahanglang kutohan ang wala kinahanglanang mga kalihokan. Kon ang payunir dili makakuha tungod sa dili maayong eskedyul o kakulang sa disiplina-sa-kaugalingon sa pagtapot niana, kinahanglang mobati siya nga maoy iyang responsabilidad ang pagtapal sa nawalang oras ug dili magdahom ug espesyal nga konsiderasyon.
19 May mga panahon sa dihang ang payunir makasinatig di-kalikayang kausaban sa iyang mga kahimtang. Hayan makaplagan niyang dili siya makakuha sa kinahanglanong oras sulod sa taas nga yugto sa panahon tungod sa nagpadayong suliran sa panglawas, nagdakong kaakohan sa pamilya, ug uban pa. Niining kasoha, ang dalan sa kaalam mao ang pagbalik ngadto sa ranggo sa magmamantala ug makig-ambit sa panahong posible diha sa oksilyare payunir nga pag-alagad. Walay naandan nga tagana sa pagtugot sa usa nga magpabilin sa listahan sa payunir kon ang iyang mga kahimtang dili na motugot kaniya sa pagkab-ot sa kinahanglanong oras.
20 Kami nagalaom nga ang tagana sa paghatag ug espesyal nga konsiderasyon alang niadtong takos magpadasig sa mas pa sa pagpatala diha sa payunir nga pag-alagad nga dili mabalaka nga wala kinahanglana. Magdasig usab kini niadtong anaa na sa bug-os-panahong pag-alagad sa pagpadayon sa pagpayunir. Buot natong ang mga payunir molampos sa ilang bug-os-panahong pag-alagad.
PANGUTANA 5: “Buot ko nga may malampos ug magmalipayon sa pagbuhat sa ingon. Makatagbaw ba kanako ang payunir nga pag-alagad?”
21 Ang tinuod nga kalipay nag-agad ug dako sa pagbaton ug suod, personal nga relasyon uban kang Jehova ug sa hugot nga pagtuo nga kita nagaalagad kaniyang matinumanon. Si Jesus nag-antos sa sakitanang estaka “tungod sa kangaya nga gibutang atubangan kaniya.” (Heb. 12:2) Ang iyang kalipay nagsumikad sa pagbuhat sa kabubut-on sa Diyos. (Sal. 40:8) Sa presenteng sistema sa mga butang, kita makapahimulos sa tinuod nga kalipay kon ang kadaghanan sa atong kalihokan sa kinabuhi nalangkit sa atong pagsimba kang Jehova. Ang espirituwal nga mga pangagpas maghatag kanatog pagbating may katuyoan tungod kay sa atong kahiladman kita nasayod nga kita nagabuhat kon unsay matarong. Ang kalipay nagasumikad sa paghatag, ug kita nasayod nga wala na ing mas maayong paagi sa paghatag sa atong kaugalingon kay sa pagtudlo sa uban kon unsaon pagbaton ug kinabuhing walay kataposan sa bag-ong kalibotan sa Diyos.—Buh. 20:35.
22 Ang payunir nga lalaki nga gikutlo sa unang parapo nagsaysay niining paagiha: “Aduna pa bay labaw nga kalipay kay sa makitang ang tawo nga imong gitun-an mahimong usa ka aktibong magdadayeg kang Jehova? Makapalipay ug makapalig-on sa pagtuo nga makita kon unsa ka gamhanan ang Pulong sa Diyos sa pagpalihok sa mga tawo sa paghimog mga kausaban sa ilang mga kinabuhi aron makapahimuot kang Jehova.” (Tan-awa ang Oktubre 15, 1997, Bantayanang Torre, mga panid 18-23.) Busa, unsay makapalipay kanimo? Kon, inay kay sa temporaryong kalipay nga gitanyag sa kalibotan, pabilhan mo ang permanente, mapuslanong mga paningkamot, ang pagpayunir mohatag kanimog kahibulongang pagbati sa kalamposan nga tiunayng magpalipay kanimo.
PANGUTANA 6: “Kon dili kini kinahanglanon para sa kinabuhing dayon, dili ba akong katungod kon magpayunir ako o dili?”
23 Tinuod, ang desisyon nga magpayunir imo lamang gayod. Si Jehova lamang ang makahukom sa imong personal nga mga kahimtang sa kinabuhi. (Roma 14:4) Siya sa husto nagadahom nga ikaw moalagad kaniya uban sa bug-os mong kasingkasing, kalag, hunahuna, ug kusog. (Mar. 12:30; Gal. 6:4, 5) Iyang gihigugma ang malipayong tighatag, usa nga nagaalagad kaniyang malipayon, dili kontragusto o pinugos. (2 Cor. 9:7; Col. 3:23) Ang imong rason sa pag-alagad nga bug-os panahon kinahanglang nahigugma ka kang Jehova ug sa mga tawo diha sa teritoryo. (Mat. 9:36-38; Mar. 12:30, 31) Kon mao kini ang imong gibati, nan ang payunir nga pag-alagad takos sa imong maugdang nga pagtagad.
24 Kami nagalaom nga ang gitagik dinhi makabulig kanimo sa pagtimbangtimbang sa imong mga palaaboton sa pagpayunir. Imo bang ikapasibo ang imong mga kahimtang aron makaregular payunir? Gipatik sa ubos maoy usa ka kalendaryo nga nag-ulohag “Akong Senemanang Eskedyul sa Payunir nga Pag-alagad.” Tan-awa kon makahimo ka ug praktikal nga eskedyul alang sa kaugalingon nga magtugot kanimong moaberids ug mga 23 ka oras sa matag semana diha sa ministeryo. Dayon, itugyan ang imong bug-os nga pagtuo ug pagsalig kang Jehova. Pinaagig iyang tabang ikaw molampos! Siya misaad: “Ako . . . magabubo gayod kaninyo sa panalangin hangtod nga wala na unyay panginahanglan.”—Mal. 3:10.
25 Busa kami mangutana, “Payunir nga pag-alagad—kini ba alang kanimo?” Kon ikaw moingong “Oo,” itakda ang petsa aron makasugod sa regular nga pagpayunir sa dili madugay ug paneguroa nga si Jehova magpanalangin kanimo uban ang malipayong kinabuhi!
[Chart sa panid 6]
(Alang sa aktuwal nga pagkahan-ay, tan-awa ang publikasyon)
Akong Senemanang Eskedyul sa Payunir nga Pag-alagad
LUNES Buntag pag-alagad sa kanataran
MARTES Buntag pag-alagad sa kanataran
MIYERKOLES Buntag pag-alagad sa kanataran
HUWEBES Buntag pag-alagad sa kanataran
BIYERNES Buntag pag-alagad sa kanataran
SABADO Buntag pag-alagad sa kanataran
DOMINGGO Buntag pag-alagad sa kanataran
LUNES Hapon pag-alagad sa kanataran
MARTES Hapon pag-alagad sa kanataran
MIYERKOLES Hapon pag-alagad sa kanataran
HUWEBES Hapon pag-alagad sa kanataran
BIYERNES Hapon pag-alagad sa kanataran
SABADO Hapon pag-alagad sa kanataran
DOMINGGO Hapon pag-alagad sa kanataran
LUNES Gabii pag-alagad sa kanataran
MARTES Gabii pag-alagad sa kanataran
MIYERKOLES Gabii pag-alagad sa kanataran
HUWEBES Gabii pag-alagad sa kanataran
BIYERNES Gabii pag-alagad sa kanataran
SABADO Gabii pag-alagad sa kanataran
DOMINGGO Gabii pag-alagad sa kanataran
Gamita ang lapis sa pagtala sa imong eskedyul alang sa matag adlaw sa semana.
Pag-eskedyul ug total nga mga 23 ka oras sa matag semana diha sa pag-alagad sa kanataran.
Total sa senemanang mga oras nga gieskedyul ․․․․․․․․․․․․․․․․․․․․