Unsay Imong Isulti Ngadto sa Usa ka Muslim?

¹ Nakasinati ka na ba sa pagsangyaw sa usa ka Muslim? Kon mao, lagmit imong nahibaloan nga ang mga Muslim adunay tim-os nga pagtuo sa Diyos. Bisan pa niana, gamay ang ilang nahibaloan bahin sa umaabot nga Paraiso sa yuta sumala sa gitagna sa mga manalagna ni Jehova, ug buot natong ipaambit kanang paglaoma kanila. (1 Tim. 2:​3, 4) Ang mosunod nga impormasyon angayng motabang kanimo sa paghatag ug maayong pamatuod.

² Ang mga Muslim nagtuo kang Allah, o sa Diyos, ug sila nagtuo nga si Muḥammad mao ang manalagna sa Diyos. Ang ilang balaang basahon mao ang Koran, ug ang ilang relihiyon gitawag ug Islam, nga nagkahulogang “pagpasakop.” Ang Koran nag-ingon nga ang pagpamakak ug pagsimbag mga idolo maoy sayop, nga ang Diyos usa ra, ug nga siya dili bahin sa Trinidad. Dugang pa, kini nagtudlo sa pagkadi-mamatay sa kalag, impiyernong kalayo, ug langitnong paraiso. Ang mga Muslim modawat sa Bibliya ingong Pulong sa Diyos apan nagtuo nga nausab kana, samtang ang Koran, sa gihapon anaa sa orihinal nga pinulongan niini, nagpabiling wala masambogi.

³ Magmahigalaon, Magmataktikanhon, ug Magmasinaboton: Sa dihang makighisgot sa Muslim, magmahigalaon ug magmataktikanhon. (Prov. 25:15) Ibutang sa hunahuna nga ang mga tinuohan sa Muslim lig-ong natukod ug nga kadaghanan niini nakat-onan pinaagig pagsag-ulo. Busa, ang pagpangatarongan diha sa relihiyosong mga pagtulon-an ug pagpamatuod kanila kon unsa ang kabubut-on sa Diyos wala mahimong bahin sa ilang espirituwal nga paglambo. (Roma 12:2) Aron matabangan ang mga Muslim, ang pailob ug pagsabot hinungdanon.​—1 Cor. 9:​19-23.

⁴ Likayi ang paggamit ug mga pulong nga sa hunahuna sa Muslim maglangkit kanimo sa Kakristiyanohan. Himoang tin-aw nga ikaw dili bahin sa Katoliko o Protestanteng relihiyon, nga ikaw maoy lahi. Puntinga ang Bibliya ingong ang Basahon sa Diyos. Sanglit ang mga Muslim supak sa terminong “Anak sa Diyos,” sagad labing maayo nga dili gamiton kini o hisgotan kining ulohana hangtod nga ang espirituwal nga pag-uswag nahimo. Hinunoa, ikaw makasulti bahin kang Jesus, nga magtumong kaniya ingong ang manalagna o mensahero. Likayi ang pagpakiglantugi. Kon imong mamatikdan nga sugod nang mopatigbabaw ang kasuko, mobiya ka dihadiha nga minaayo.

⁵ Labing maayo nga makigsulti sa usa lamang ka tawo ug dili sa usa ka grupo. Kasagaran, maalamon alang sa mga babaye nga mosangyaw sa mga babaye, ug mga lalaki, sa mga lalaki. Dayag, adunay mga eksepsiyon niini, apan ang maayong paghukom kinahanglan gamiton. Dugang pa, daghang Muslim ang sensitibo bahin sa kon unsay ilang giisip nga dili ligdong nga panapot ug pamostura sa mga babaye. Ang mga igsoong babaye kinahanglang magbantay niini.​—1 Cor. 10:​31-33.

⁶ Mga Butang nga Hisgotan: Sa prangka hisgoti ang bahin sa pagkadako sa Diyos ug sa iyang gugma. Ayaw pagpanuko sa pagsulti nga ikaw tinuod nga magtutuo, nga ang Diyos maoy usa (dili usa ka Trinidad), ug nga ang pagsimba sa idolo maoy sayop. Hisgoti ang bahin sa pagkadaotan sa kalibotan karon​—mga gubat, sibil nga kagubot, rasanhong pagdumot, ug ang pagkasalingkapaw nga dayag taliwala sa daghan kaayong relihiyosong tawo.

⁷ Ang brosyur nga The Guid­ance of God​—Our Way to Paradise mohatag kanimog dugang pagsabot sa mga topiko nga magamit sa pagsugod ug mga panaghisgot sa mga Muslim. Gidisenyo kini sa pagdani sa mga Muslim nga nagpuyo diha sa palibot diin sila tingali mobating gawasnon sa pagtuon sa Bibliya. Kita adunay limitadong suplay sa sangang buhatan ug nagapaabot ug mas dakong ipadalahay sa di madugay.

⁸ Ingong presentasyon, ikaw tingali moingon:

◼ “Ako naghimog linaing paningkamot sa pagpakigsulti sa mga Muslim. Ako nakabasa bahin sa inyong relihiyon ug nagtuo nga husto ako sa pag-ingon nga ang mga Muslim nagtuo sa usa ka matuod nga Diyos ug diha sa tanang propeta. [Tugoting motubag.] Buot kong hisgotan kanimo ang bahin sa karaang tagna nga nagtagna sa paghimo sa yuta nga usa ka paraiso. Mahimo bang akong basahon kanimo kon unsay gisulat sa manalagna? [Basaha ang Isaias 11:​6-9.] Kining tagnaa nagpahinumdom kanako sa usa ka kinutlo gikan sa Koran nga makaplagan niining brosyura.” Paklia sa panid 9 diha sa brosyur nga Guid­ance of God, ug basaha ang kinutlo diha sa tataw kaayong letra, nga nagtumong sa mga matarong nga magapanunod sa yuta. Kon ang interes gipakita, ipadayon ang sultihanay pinaagig paghisgot sa mga parapo 7 hangtod sa 9 diha sa kaatbang nga panid. Ibilin ang brosyur, ug hikaya ang pagbalikduaw.

⁹ Sa dihang nagadapit sa usa sa pagtagad sa brosyur nga Guid­ance of God, labing maayo nga tawgon kana nga usa ka panaghisgot, dili usa ka pagtuon sa Bibliya. Sa dihang mahuman nimo ang brosyur, ang estudyante kinahanglang magmaandam sa pagtuon sa brosyur nga Gikinahanglan o sa librong Kahibalo. Ang ubang mga publikasyon nga ilabinang gidisenyo alang sa mga Muslim mao ang tract nga How to Find the Road to Paradise ug ang pulyeto nga The Time for True Submission to God.

¹⁰ Uban niining kahibaloa sa mga tinuohan sa Islam ug mga pagkasensitibo, kita mahimong magmasinaboton diha sa atong pagpili sa literatura nga atong itanyag sa mga Muslim ug sa paagi sa atong pagsangyaw kanila. Hinaot nga si Jehova padayong magpanalangin sa atong mga paningkamot sa pagtabang sa tanang matang sa mga tawo sa pagtawag sa iyang ngalan ug maluwas.​—Buh. 2:21.