Pagsangyaw sa Maayong Balita Duyog ang Hugot nga Pagtuo

¹ Sayo sa unang siglo, gisugo ni Jesu-Kristo ang iyang mga sumusunod sa pagsangyaw sa maayong balita sa Gingharian ug “paghimog mga tinun-an sa katawhan sa tanang kanasoran.” (Mat. 24:​14; 28:​19, 20) Seryosong gidawat sa mga Saksi ni Jehova ang iyang instruksiyon, mao nga sa kataposan sa ika-20ng siglo, ang atong Kristohanong panag-igsoonay miuswag ngadto sa kapin ug 5,900,000 ka tinun-an sa 234 ka nasod. Pagkadakong singgit sa pagdayeg ngadto sa atong langitnong Amahan!

² Kita karon misulod na sa ika-21ng siglo. Ang atong Kaaway sa pagkamalinglahon nanlimbasog sa pagbalda sa atong pangunang buluhaton sa pagsangyaw sa Gingharian ug paghimog tinun-an. Iyang gigamit ang mga pagpit-os gikan niining sistema sa mga butang sa tinguhang itipas ang atong pagtagad, ut-uton ang atong panahon, ug kawangon ang atong mga paghago pinaagig daghang di-kinahanglanong mga alatimanon ug intereses. Inay kay tugotan kining sistemaha nga maoy magbuot kon unsay hinungdanon sa kinabuhi, atong gipamatud-an sa atong kaugalingon gikan sa Pulong sa Diyos kon unsay labing hinungdanon​—ang pagbuhat sa kabubut-on ni Jehova. (Roma 12:2) Nagpasabot kana sa pagtuman sa Kasulatanhong awhag nga ‘iwali ang pulong sa paborable ug masamokong panahon ug buhaton sa bug-os ang atong ministeryo.’​—2 Tim. 4:​2, 5.

³ Ugmara ang Hugot nga Pagtuo: Ang mga Kristohanon nagkinahanglan nga “makabarog nga kompleto ug may hugot nga pagtuo sa bug-os nga kabubut-on sa Diyos.” (Col. 4:12) Ang pulong “hugot nga pagtuo” gihubit ingong “usa ka kusganong pagpangdani o pagtuo; ang kahimtang sa pagkanakombinsir.” Ingong mga Kristohanon kita kinahanglang makombinsir nga ang matagnaong pulong sa Diyos maoy tino ug nga kita karon anaa na sa hinapos sa panahon sa kataposan. Kita kinahanglang magbaton ug pagtuo nga lig-on sama nianang kang apostol Pablo, kinsa miingon nga ang maayong balita ‘sa tinuod, maoy gahom sa Diyos alang sa kaluwasan sa matag usa nga may pagtuo.’​—Roma 1:16.

⁴ Gigamit sa Yawa ang daotang mga tawo ug mga impostor, nga sila mismo nahisalaag, sa pag-impluwensiya ug pagpahisalaag sa uban. (2 Tim. 3:13) Kay gipasidan-an bahin niini, kita mohimog mga lakang aron palig-onon ang atong pagtuo nga nabatonan ta ang kamatuoran. Inay kay tugotan ang mga kabalaka sa kinabuhi nga magpaluya sa atong kasibot, padayon natong unahon ang intereses sa Gingharian. (Mat. 6:​33, 34) Ni buot natong magpasagad sa kadinalian sa mga panahon, hayan mobating ang kataposan niining sistemaha halayo pa. Kini nagakaduol na gayod. (1 Ped. 4:7) Bisan tuod mahimong bation ta nga ang pagpakaylap sa maayong balita adunay diyutayng epekto sa pipila ka nasod tungod sa gikahatag nang pamatuod, ang buluhatong pagpasidaan kinahanglang magpadayon.​—Ezeq. 33:​7-9.

⁵ Ang yawing mga pangutana niining nahibiling panahon mao: ‘Ako bang gidawat nga seryoso ang sugo ni Jesus sa paghimog mga tinun-an? Sa dihang ako magsangyaw sa maayong balita, ako ba nagpasundayag ug hugot nga pagtuo nga ang Gingharian maoy tinuod? Ako ba determinado sa pagbaton ug dakong pakig-ambit kutob sa mahimo niining nagaluwas-ug-kinabuhing ministeryo?’ Nga nakaamgo kon unsa nang gidugayon kita sa panahon sa kataposan, kinahanglang atong hatagag pagtagad ang atong kaugalingon ug ang atong buluhatong pagsangyaw ug pagtudlo. Sa pagbuhat niini atong maluwas ang atong kaugalingon ug kadtong mamati kanato. (1 Tim. 4:16) Sa unsang paagi kitang tanan makalig-on sa atong pagtuo ingong mga ministro?

⁶ Sundoga ang mga Taga-Tesalonica: Si apostol Pablo, sa paghinumdom sa kakugi sa mga igsoon sa Tesalonica, miingon kanila: “Ang maayong balita nga among giwali wala makaplagi taliwala kaninyo uban ang mga sulti lamang apan usab uban ang gahom ug uban ang balaang espiritu ug hugot nga pagtuo, ingon gayod sa inyong nahibaloan kon unsang matanga sa mga tawo nangahimo kami nganha kaninyo tungod ug alang kaninyo; ug kamo nahimong mga tigsundog kanamo ug sa Ginoo, sanglit kamo midawat man sa pulong ilalom sa daghang kasakitan nga may kangaya sa balaang espiritu.” (1 Tes. 1:​5, 6) Oo, gidayeg ni Pablo ang kongregasyon sa mga taga-Tesalonica tungod kay bisan pa sa daghang kasakitan sila misangyaw duyog ang kasibot ug hugot nga pagtuo. Unsay nagpaarang kanila nga mahimo kini? Sa usa ka dakong sukod, ang kasibot ug pagtuo nga ilang nakita kang apostol Pablo ug sa iyang mga isigkamagbubuhat adunay positibong epekto diha kanila. Sa unsang paagi?

⁷ Ang mismong kinabuhi ni Pablo ug sa iyang mga kauban sa panaw nagpamatuod nga sila nakabaton ug espiritu sa Diyos diha kanila ug nga sila kinasingkasing nga nagtuo sa ilang ginasangyaw. Sa wala pa moadto sa Tesalonica, si Pablo ug Silas mapanamastamasong gitratar sa Filipos. Nga walay paghusay, sila gibunalan, gibilanggo, ug gibalhog sa mga kahoyng-giakob. Apan, kining masulayong kasinatian wala magpaluya sa ilang kasibot alang sa maayong balita. Ang pagpangilabot sa Diyos misangpot sa ilang kagawasan, mitultol sa pagkakabig sa tigbilanggo ug sa iyang panimalay, ug mihatag paagi alang niining mga igsoona sa pagpadayon sa ilang ministeryo.​—Buh. 16:​19-34.

⁸ Tungod sa gahom sa espiritu sa Diyos, si Pablo midangat sa Tesalonica. Didto siya naghago sa pagbaton sa iyang kaugalingong mga panginahanglan ug dayon bug-os siyang naningkamot sa pagtudlo sa kamatuoran ngadto sa mga taga-Tesalonica. Wala siya magdumili sa pagmantala sa maayong balita sa tanang kahigayonan. (1 Tes. 2:9) Ang pagsangyaw ni Pablo uban ang hugot nga pagtuo nakahimog gamhanan kaayong epekto sa lokal nga mga tawo mao nga pipila kanila misalikway sa ilang kanhing idolatrosong pagsimba ug nahimong mga alagad sa matuod nga Diyos, si Jehova.​—1 Tes. 1:​8-​10.

⁹ Ang paglutos wala makapugong sa bag-ong mga magtutuo sa pagsangyaw sa maayong balita. Kay napalihok sa ilang bag-ong-nakaplagang pagtuo ug bug-os nga nakombinsir nga maangkon nila ang walay kataposang mga panalangin, ang mga taga-Tesalonica napasibot sa pagmantala sa kamatuoran nga maikagon nilang gidawat. Nahimong aktibo kaayo ang maong kongregasyon nga ang balita sa ilang pagtuo ug kasibot mikaylap sa ubang mga bahin sa Macedonia ug bisan ngadto sa Acaya. Busa, sa dihang gisulat ni Pablo ang iyang unang sulat ngadto sa mga taga-Tesalonica, ang ilang maayong mga buhat nailado na. (1 Tes. 1:7) Pagkatalagsaong panig-ingnan!

¹⁰ Gipalihok sa Gugma sa Diyos ug sa mga Tawo: Sama sa mga taga-Tesalonica, sa unsang paagi padayon natong mahuptan ang lig-ong personal nga pagtuo sa dihang magsangyaw sa maayong balita karong adlawa? Bahin kanila, si Pablo misulat: “Walay-hunong namong ginabutang sa hunahuna ang inyong matinuohong buhat ug ang inyong mahigugmaong kahago gumikan sa gugma.” (1 Tes. 1:​3, potnot) Tataw nga sila dihay dulot, kinasingkasing nga gugma kang Jehova nga Diyos ug sa mga tawo nga ilang gisangyawan. Mao kining samang gugma ang nagpalihok kang Pablo ug sa iyang mga kauban nga ipaambit ngadto sa mga taga-Tesalonica “dili lamang ang maayong balita sa Diyos, apan usab ang [ilang] kaugalingong mga kalag.”​—1 Tes. 2:8.

¹¹ Sa susama, ang atong dulot nga gugma kang Jehova ug sa atong isigkatawo magtukmod kanato sa pagtinguha nga moambit sa bug-os diha sa buluhatong pagsangyaw nga gipabuhat sa Diyos kanato. Pinaagi sa maong gugma, atong giila nga maoy atong personal, hinatag-sa-Diyos nga kaakohan ang pagpakaylap sa maayong balita. Pinaagi sa pagpamalandong nga positibo ug mapabilhon sa tanang gibuhat ni Jehova alang kanato sa pagtultol kanato ngadto sa “tinuod nga kinabuhi,” kita matukmod sa pagsulti sa uban sa samang kahibulongang mga kamatuoran nga atong gituohan sa tibuok natong kasingkasing.​—1 Tim. 6:19.

¹² Samtang kita padayong puliki diha sa buluhatong pagsangyaw, ang atong gugma kang Jehova ug sa katawhan padayong magatubo gayod. Kon mao gayod kana, kita mapalihok nga padakoon pa ang atong pakig-ambit diha sa pamalaybalay nga ministeryo ug tinguhaon ang tanang ubang mga matang sa pagsangyaw nga bukas kanato. Atong pahimuslan ang mga kahigayonan sa pagsangyaw sa impormal nga paagi sa atong mga paryente, mga silingan, ug mga kaila. Bisan pag ang kadaghanang tawo tingali mosalikway sa maayong balita nga atong itanyag ug ang pipila manlimbasog sa pagbalda sa pagmantala sa Gingharian, atong masinati ang kalipay sa kahiladman. Ngano? Tungod kay kita nahibalo nga atong gibuhat ang atong kinamaayohan sa pagsangyaw bahin sa Gingharian ug pagtabang sa mga tawo nga maangkon ang kaluwasan. Ug si Jehova mopanalangin sa atong mga paningkamot sa pagpangita sa matarong-ug-kasingkasing nga mga tawo. Bisan kon gipalibotan kita sa mga pagpit-os sa kinabuhi ug si Satanas nagtinguha sa pagpaluya sa atong kalipay, kita makaarang sa paghupot kanunay sa atong hugot nga pagtuo ug sa atong kasibot sa pagsangyaw ngadto sa uban. Sa dihang kitang tanan mobuhat sa atong bahin, kini moresulta sa lig-on, masibotong mga kongregasyon sama nianang sa Tesalonica.

¹³ Ayaw Gayod Paglunga Ilalom sa Pagsulay: Ang hugot nga pagtuo gikinahanglan usab sa dihang kita makahibalag ug lainlaing mga pagsulay. (1 Ped. 1:​6, 7) Gitin-aw ni Jesus sa iyang mga tinun-an nga kon sila mosunod kaniya, sila mahimong “mga dulumtanan sa tanang kanasoran.” (Mat. 24:9) Si Pablo ug si Silas nakasinati niini sa panahong didto sa Filipos. Ang asoy sa Buhat kapitulo 16 nag-ingon nga si Pablo ug Silas gibutang ngadto sa sulod nga bahin sa prisohan ug gibalhog sa kahoyng-giakob. Sa katibuk-an, ang pangunang prisohan maoy usa ka matang sa hawanan o balkon nga sa palibot nga kilid maoy mga selda nga adunay bentaha sa kahayag ug hangin. Apan, ang sulod nga bahin sa prisohan walay tagana nga kahayag ug limitado ang bentilasyon. Si Pablo ug Silas kinahanglang makigbisog sa kangitngit, kainit, ug kabaho niining miserableng prisohan. Mahanduraw ba nimo ang kasakit nga ila gayong gibati samtang gibalhog sa kahoyng-giakob sulod sa daghang oras uban sa ilang mga likod nga napanggus ug nagdugo gumikan sa paglapdos?

¹⁴ Bisan pa niini nga mga pagsulay, si Pablo ug Silas nagpabiling matinumanon. Ilang gipasundayag ang kinasingkasing nga pagtuo, nagalig-on kanila sa pag-alagad kang Jehova bisan unsa pay pagsulay. Ang ilang pagtuo gipasiugda sa bersikulo 25 sa kapitulo 16, diin kini nag-ingon nga si Pablo ug si Silas “nanag-ampo ug nanagdayeg sa Diyos pinaagig awit.” Sa pagkamatuod, bisan kon sila anaa sa sulod nga bahin sa prisohan, sila nakaseguro gayod nga ilang nabatonan ang pag-uyon sa Diyos nga niana sila miawit sa igong gikusgon nga madungog sa ubang mga priso! Kita kinahanglang magbaton ug samang pagtuo karong adlawa sa dihang moatubang sa mga pagsulay sa atong pagtuo.

¹⁵ Ang mga pagsulay nga ginapahamtang sa Yawa kanato maoy daghan. Alang sa uban tingali kini maoy paglutos gikan sa pamilya. Daghan sa atong mga igsoon nag-atubang ug legal nga mga hagit. Mahimong masinati ang pagsupak gikan sa mga apostata. Adunay pinansiyal nga mga palas-anon ug kabalaka kon sa unsang paagi matagan-an ang panginabuhi. Ang mga batan-on nag-atubang ug pagpit-os sa isigkaingon sa eskuylahan. Unsaon nato sa pag-atubang nga malamposon kining mga pagsulaya? Unsay gikinahanglan sa pagpasundayag ug pagtuo?

¹⁶ Una ug kinalabwan, gikinahanglan natong mentinahon ang suod personal nga relasyon uban ni Jehova. Sa dihang si Pablo ug si Silas didto sa sulod nga bahin sa prisohan, wala nila gamita ang maong panahon sa pagreklamo bahin sa ilang kahimtang o mobati ug kaluoy sa ilang kaugalingon. Dihadiha sila midangop sa Diyos sa pag-ampo ug midayeg kaniya sa pag-awit. Ngano? Tungod kay sila adunay suod personal nga relasyon uban sa ilang langitnong Amahan. Sila nakaamgo nga sila nag-antos tungod ug alang sa pagkamatarong ug nga ang ilang kaluwasan nahasandig sa mga kamot ni Jehova.​—Sal. 3:8.

¹⁷ Sa dihang kita moatubang ug mga pagsulay karon, kita kinahanglan usab nga modangop kang Jehova. Si Pablo nagdasig kanato ingong mga Kristohanon nga ‘ipahibalo ang atong mga pangaliya ngadto sa Diyos; ug ang kalinaw sa Diyos nga nagalabaw sa tanang panghunahuna magabantay sa atong mga kasingkasing ug sa atong mga gahom sa pangisip.’ (Filip. 4:​6, 7) Pagkamakapahupay ang pagkahibalo nga si Jehova dili motugot nga kita mag-inusara sa pagsagubang sa mga pagsulay! (Isa. 41:10) Siya kanunayng magauban kanato basta kita mag-alagad kaniya uban sa tinuod nga pagtuo.​—Sal. 46:7.

¹⁸ Ang laing hinungdanong tabang sa pagpasundayag ug pagtuo maoy sa pagpabiling puliki sa pag-alagad kang Jehova. (1 Cor. 15:58) Si Pablo ug Silas gibalhog ngadto sa prisohan tungod kay sila puliki sa pagsangyaw sa maayong balita. Sila ba mihunong sa pagsangyaw tungod sa ilang mga pagsulay? Wala, sila padayong nagsangyaw bisan sa prisohan, ug human sila gibuhian, sila mibiyahe ngadto sa Tesalonica ug miadto sa sinagoga sa mga Hudiyo sa ‘pagpangatarongan kanila gikan sa mga Kasulatan.’ (Buh. 17:​1-3) Sa dihang kita adunay lig-ong pangdani o pagtuo kang Jehova ug nakombinsir nga anaa kanato ang kamatuoran, walay bisan unsa nga “makahimo sa pagbulag kanato gikan sa gugma sa Diyos nga anaa kang Kristo Jesus nga atong Ginoo.”​—Roma 8:​35-39.

¹⁹ Modernong mga Panig-ingnan sa Hugot nga Pagtuo: Adunay daghang talagsaong panig-ingnan sa atong adlaw kinsa, sama ni Pablo ug Silas, nagpasundayag ug hugot nga pagtuo. Usa ka igsoong babaye nga nakalabang-buhi sa kampong konsentrasyon sa Auschwitz nag-asoy sa di-matarog nga pagtuo ug kombiksiyon nga gipasundayag sa mga igsoong lalaki ug babaye didto. Siya miasoy: “Kas-a panahon sa pagsukitsukit, usa ka opisyal miduol kanako uban sa mga kinumo. ‘Unsay among buhaton kaninyo?’ siya mipatugbaw. ‘Kon amo kamong dakpon, bale wala lang kaninyo. Kon amo kamong prisohon, kamo sa bug-os dili manumbaling. Kon amo kamong ipadala sa kampong konsentrasyon, dili kini makapabalaka kaninyo. Kon amo kamong silotan sa kamatayon, kamo mobarog lamang didto nga walay kabalaka. Unsa man gayoy among buhaton kaninyo?’” Pagkamakapalig-on sa pagtuo nga makita ang pagtuo sa atong mga igsoon nga nailalom sa maong mabangis nga mga kahimtang! Sila kanunayng misalig kang Jehova alang sa tabang sa paglahutay.

²⁰ Walay duhaduha atong mahinumdoman ang pagtuo sa daghan sa atong mga igsoon atubangan sa etnikong pagdumot nga gipadayag mismo sa di pa dugayng katuigan. Bisan pag nahamutang ang ilang kaugalingon sa makuyaw nga mga kahimtang, ang responsableng mga igsoon determinado nga maseguro nga mapakaon sa espirituwal ang ilang mga igsoong lalaki ug babaye. Ang tanan padayong nagmatinumanon duyog ang hugot nga pagtuo nga ang ‘bisan unsa nga hinagiban nga buhaton batok kanila dili magmalamposon.’​—Isa. 54:17.

²¹ Daghan sa atong mga igsoong lalaki ug babaye nga may di-magtutuong mga kapikas nagpasundayag usab ug lig-ong pagtuo ug pagkamalahutayon. Usa ka igsoong lalaki sa Guadeloupe nakasugamak ug kusganong pagsupak sa iyang di-magtutuong asawa. Aron sa pagpaluya kaniya ug pagbalda sa iyang pagtambong sa Kristohanong mga tigom, ang iyang asawa dili mag-andam sa iyang pagkaon o maglaba, magplantsa, ug magsursi sa iyang mga sapot. Sulod sa dugayng panahon, ang iyang asawa dili makigsulti kaniya. Apan pinaagi sa pagpasundayag ug kinasingkasing nga pagtuo sa pag-alagad kang Jehova ug pagdangop kaniya diha sa pag-ampo alang sa tabang, kini nga igsoong lalaki nakaarang sa paglahutay nianang tanan. Sa unsang gidugayon? Sulod sa mga 20 ka tuig​—human niana ang iyang asawa inanay nga may kausaban sa kasingkasing. Sa kapulihay, siya mahimong magmaya gayod tungod kay ang iyang asawa midawat sa paglaom sa Gingharian sa Diyos.

²² Sa kataposan, kinahanglang dili nato kalimtan ang hugot nga pagtuo sa atong batan-ong mga igsoong lalaki ug babaye nga moeskuyla matag adlaw ug mosagubang sa pagpit-os sa isigkaingon ug ubang mga hagit. Mahitungod sa pagpit-os nga mopahiuyon sa eskuylahan, usa ka batan-ong Saksing babaye miingon: “Sa dihang ikaw anaa sa eskuylahan, ang tanan kanunayng magdasig kanimo nga mahimong rebelyoso diyutay. Ang mga bata mas motahod kanimo kon ikaw mobuhat ug usa ka butang nga anaa sa utlanan sa rebelyosong panggawi.” Pagkalisod nga pagpit-os ang ginaatubang sa atong mga batan-on! Sila kinahanglang lig-ong magmadeterminado sa hunahuna ug kasingkasing nga suklan ang tentasyon.

²³ Daghan sa atong mga batan-on ang nagabuhat ug maayo sa pagmentinar sa ilang integridad bisan pa sa mga pagsulay. Usa ka pananglitan mao kanang sa usa ka batan-ong sister nga nagpuyo sa Pransiya. Usa ka adlaw human sa paniudto, ang pipila ka lalaki misulay sa pagpugos kaniya nga halokan sila, apan siya miampo ug kusganong midumili, busa ang mga lalaki mibiya kaniya. Sa ulahi, usa kanila mibalik ug miingon kaniya nga siya nakadayeg kaniya tungod sa iyang kaisog. Ang sister nakahatag kaniyag maayong pamatuod bahin sa Gingharian, nga nagsaysay sa hataas nga mga sukdanan nga gitagana ni Jehova sa tanang buot moambit sa mga panalangin niini. Sulod sa maong tuig sa eskuyla, ang sister misaysay usab sa iyang tinuohan ngadto sa tibuok klase.

²⁴ Pagkabililhong pribilehiyo ang atong nabatonan nga mahilakip taliwala kanilang gikahimut-an ni Jehova nga gamiton sa pagsulti duyog ang hugot nga pagtuo bahin sa iyang kabubut-on! (Col. 4:12) Dugang pa, aduna kita ing kahibulongang kahigayonan sa pagpamatuod sa atong integridad sa dihang mailalom sa pag-atake pinaagig atong samag-leyon nga Kaaway, si Satanas nga Yawa. (1 Ped. 5:​8, 9) Ayaw gayod kalimti nga si Jehova naggamit sa mensahe sa Gingharian aron ipaabot ang kaluwasan nganhi kanato nga nagsangyaw niana ug ngadto kanilang nagpatalinghog. Hinaot ang mga desisyon nga atong himoon ug ang atong adlaw-adlawng paagi sa kinabuhi magpamatuod nga atong giuna ang Gingharian. Padayon natong isangyaw ang maayong balita duyog ang hugot nga pagtuo!