Unsa ang Imong Unahonon?

¹ Gipasiugda sa daghang relihiyosong mga organisasyon ang paghimog mga buhat sa kaluoy, sama sa pagtaganag mga pasilidad alang sa sekular nga edukasyon o medikal nga mga panginahanglan. Ang mga Saksi ni Jehova, hinunoa, samtang wala kalimti “ang pagbuhat ug maayo ug ang pagpakig-ambit sa mga butang sa uban,” nag-una sa pagtabang sa mga tawo sa espirituwal nga paagi.​—Heb. 13:16.

² Ang Unang-Siglong Sumbanan: Si Jesus naghimog daghang maayong mga buhat sa panahon sa iyang yutan-ong ministeryo, apan ang iyang pangunang buluhaton mao ang pagpamatuod sa kamatuoran. (Luc. 4:43; Juan 18:37; Buh. 10:38) Iyang gisugo ang iyang mga sumusunod nga “panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila.” (Mat. 28:​19, 20) Ug gipaila niya nga kadtong nagatuo kaniya angayng mobuhat ug labaw pa sa buluhaton nga iyang gisugdan. (Juan 14:12) Giuna ni Jesus ang buluhatong pagsangyaw tungod kay makatabang kana sa mga tawo nga makakat-on sa dalan sa kaluwasan.​—Juan 17:3.

³ Gilantaw ni apostol Pablo ang iyang kalihokan sa pagsangyaw ingong “panginahanglan,” usa ka kinahanglanon nga dili niya angayng pasagdan. (1 Cor. 9:​16, 17) Andam siyang mohimog bisan unsang sakripisyo, molahutay sa bisan unsang pagsulay, o moantos sa bisan unsang kalisdanan kon gikinahanglan aron matuman ang iyang ministeryo. (Buh. 20:22-24) Gipakita ni apostol Pedro ug sa iyang mga kauban ang mao gihapong espiritu. Bisan pag miantos sa pagbilanggo ug mga pagbunal, “sila wala mohunong sa pagpanudlo ug sa pagpahayag sa maayong balita bahin kang Kristo, si Jesus.”​—Buh. 5:40-42.

⁴ Komosta kita? Giuna ba nato ang buluhaton sa pagmantala sa maayong balita sa Gingharian ug sa paghimog mga tinun-an? Sama kang Jesus, aduna ba kitay tinuod nga kabalaka niadtong “pinanitan ug nagkatibuagsa sama sa mga karnero nga walay magbalantay”? (Mat. 9:36) Ang mga panghitabo sa kalibotan karon ug ang tagna sa Bibliya tin-awng nagpamatuod nga hamubo na lang ang panahon alang niining daotang sistema! Ang paghupot nga tin-aw sa hunahuna sa kahinungdanon sa buluhatong pagsangyaw magtukmod kanato nga mopadayon sa pagsangyaw nga masiboton.

⁵ Timbangtimbanga ang Imong mga Kahimtang: Tungod kay mag-usab-usab man kanunay ang personal nga mga kahimtang, sa popanahon angayng tagdon kon makahimo ba kitag mga pagpasibo aron mas pang makapakig-ambit sa buluhatong pagsangyaw. May usa ka igsoong babaye nga regular payunir sulod sa katuigan sa 1950, 1960, ug 1970 apan kinahanglang moundang tungod sa dili maayong panglawas. Sa ngadtongadto, hinunoa, miarang-arang na ang iyang panglawas. Di pa dugay, gitimbangtimbang niya pag-usab ang iyang mga kahimtang ug nakahukom nga siya makapayunir pag-usab. Pagkamalipayon niya nga nakatambong sa Pioneer Service School sa edad nga 90! Komosta ang kahimtang mo? Hapit ka na bang moretiro o mograduwar? Ang imo kahang nausab nga mga kahimtang magtugot kanimo sa pagpayunir?

⁶ Sa dihang naobserbahan ni Jesus nga si Marta “nalinga sa pag-atiman sa daghang buluhaton,” maluloton siyang misugyot nga iyang maangkon ang mas dagkong mga panalangin kon huptan niyang yano ang mga butang. (Luc. 10:40-42) Mapayano ba nimo ang imong estilo sa kinabuhi? Kinahanglan ba gayong may sekular nga trabaho ang bana ug asawa? Kon mahimo ang mga pagpasibo, mabuhi ba ang pamilya kon usa lang ang may sekular nga trabaho? Daghan ang nakabenepisyo sa espirituwal pinaagi sa paghimog mga pagpasibo aron mas pang makapakig-ambit diha sa ministeryo.

⁷ Hinaot sundon natong tanan ang sumbanan nga gihatag ni Jesus ug sa mga apostoles! Makaseguro kita nga panalanginan ni Jehova ang atong tiunay nga mga panikaysikay nga makig-ambit sa bug-os niining hinungdanong buluhaton sa pagsangyaw sa maayong balita sa Gingharian.​—Luc. 9:57-62.