Pagtabang sa mga Tawong Langyaw ug Pinulongan
1. Unsang kahigayonan ang mabuksan sa dihang kita makigbahin sa pagsangyaw diha sa atong teritoryo?
1 Si Jesu-Kristo nagtagna nga ang maayong balita igawali sa tibuok yuta “ingon nga pagpamatuod ngadto sa tanang kanasoran.” Naamgohan sa tanan nga nakigbahin sa buluhatong pagsangyaw ug pagpanudlo kon unsa ka hinungdanon kadtong mga pulonga. (Mat. 24:14; 28:19, 20) Sa dihang kita magsangyaw ug maghimog mga tinun-an, basin makahimamat kitag mga tawo nga gikan sa laing nasod kinsa nagsultig laing pinulongan. Sila usab takos alang sa kahigayonan nga makadungog sa mensahe sa Gingharian ug makabarog nga malig-on sa kamatuoran sa dili pa moabot ang makalilisang nga adlaw ni Jehova. (Mal. 3:18) Sa unsang paagi nato matabangan ang mga tawong langyaw ug pinulongan diha sa atong teritoryo?
2. Sa unsang paagi atong masundog si Jehova sa dihang mosangyaw kita sa mga tawong langyawg pinulongan?
2 Batoni ang Panglantaw ni Jehova sa mga Tawong Langyaw ug Pinulongan: Aron mabanaag ang dili-mapihigong gugma ni Jehova ngadto sa tanan diha sa atong teritoryo, kinahanglan nga atong batonan ang hugot nga tinguha nga tabangan ang mga tawo aron makakat-on sa tukmang kahibalo bahin sa matuod nga Diyos, si Jehova, bisag unsa pay ilang pinulongan. (Sal. 83:18; Buh. 10:34, 35) Bisan pag ang panguna natong tumong mao ang pagsangyaw sa mga tawong nagsulti sa pinulongan nga gigamit sa atong kongregasyon, kinahanglan nga magmahunahunaon kita sa panginahanglan sa mga tawong langyawg pinulongan ug mangitag mga paagi nga masangyawan sila. Buot ni Jehova nga masangyawan ang mga tawo sa tanang kanasoran. Busa, dili uyon sa iyang kabubut-on kon atong sayloan ang mga tawong langyaw ug pinulongan. Nan, sa unsang paagi nato sila matabangan?
3. Unsang mapuslanong pulyeto ang gitagana kanato, ug sa unsang paagi kita mangandam sa paggamit niini?
3 Gamita ang Good News for People of All Nations: Kini nga pulyeto gidisenyo aron gamiton sa dihang makahibalag kitag mga tawo nga laig pinulongan. Dad-a kanunay kining pulyetoha, sinatia ang lainlaing mga bahin niini, ug magmaandam sa paggamit niana. Aron daling makit-an, markahi ang lainlaing pinulongan nga imong mahibalag diha sa inyong teritoryo. Kon may mabatonang literatura diha sa langyawng mga pinulongan, mas maayong magdala ug pipila niana aron ikatanyag human nimo magamit ang maong pulyeto.
4. Unsaon paggamit ang pulyetong Nations diha sa atong ministeryo?
4 Kon may mahibalag ka diha sa teritoryo nga nagsultig laing pinulongan ug dili ka segurado kon unsa ang iyang pinulongan, ipakita una ang hapin sa maong pulyeto. Paklia ang panid nga adunay mapa sa kalibotan, itudlo ang imong kaugalingon ug ang imong nasod, ug ipakita nga gusto nimong mahibaloan kon taga asa ang tagbalay ug unsa ang iyang pinulongan. Human nimo mahibaloi ang iyang pinulongan, tan-awa ang kaundan, paklia ang haom nga panid, ipunting ang pagtagad sa tagbalay ngadto sa tudling pulong nga tataw ang pagkasulat diha sa ibabaw sa maong panid, ug dayon ipabasa kini kaniya. Inigkahuman niyag basa, itanyag ang tract nga gipatik diha sa iya mismong pinulongan o itudlo ang tudling pulong nga gikoloran ug gray, nga naghisgot nga buot nimong mobalik dala ang usa ka publikasyong gipatik sa iya mismong pinulongan. Dayon itudlo ang mga pulong nga “akong ngalan” nga tataw ang pagkasulat, ug tin-aw nga litoka ang imong ngalan. Human niana, itudlo usab ang mga pulong nga “imong ngalan” nga tataw ang pagkasulat, ug hulata ang iyang tubag. Paghimog tinong kahikayan alang sa pagbalikduaw kaniya.
5. Unsaon nato pagpaloap ang usa ka interesado nga langyaw ug pinulongan?
5 Mga Kahikayan sa Pagpaloap: Kinahanglan nga maningkamot gayod kita nga maduaw pag-usab kadtong nagpakitag interes sa mensahe sa Gingharian, bisag unsa pay iyang pinulongan. Sa dihang maseguro nato nga interesado siya bahin sa Diyos ug sa iyang Pulong, ang Bibliya, angay kitang magpil-ap sa Please Follow Up (S-43) nga porma ug ihatag dayon kini ngadto sa sekretaryo sa kongregasyon. Unya iya kining ipadala ngadto sa sangang buhatan aron nga ang maong interesado maduaw sa igsoon nga makamaong mosulti sa pinulongan. Dayon, ang sangang buhatan magpadala sa porma ngadto sa grupo nga naggamit sa maong pinulongan. Sa dihang madawat na kini, angayng adtoon dayon ang maong interesado. Mahimong hatagan sa sekretaryo ug usa ka kopya sa porma ang magtatan-aw sa pag-alagad aron iyang mahibaloan nga giatiman na kini sa usa ka grupo nga langyaw ug pinulongan. Kini nga porma pil-apan lamang kon ang usa ka tawo nagpakitag tinuod nga interes.
6. Unsay atong responsabilidad kon makahibalag kitag interesadong tawo nga langyaw ug pinulongan?
6 Sukad sa pagpadala sa S-43 nga porma, lagmit taastaas nga panahon ang molabay ayha pa maduaw ang interesadong tawo sa usa ka magmamantala nga makamaong mosulti sa iyang pinulongan. Busa, aron maatiman ang maong interesado, mahimong ipadayon sa magmamantala nga nagpil-ap sa S-43 nga porma ang pag-ugmad sa iyang interes hangtod nga maduaw siya sa usa nga makamaong mosulti sa iyang pinulongan. Sa ubang mga kahimtang, mahimong dumalahon ang usa ka pagtuon sa Bibliya uban sa interesadong tawo. Apan, sulod sa maong panahon, sa unsang paagi ang magmamantala makabatog literatura sa pinulongan sa maong interesado?
7. Unsa nga probisyon ang mabatonan aron makakuhag literatura diha sa pinulongan sa atong mahibalag?
7 Literatura Alang sa mga Langyaw ug Pinulongan: Ang kongregasyon dili angayng mag-estak ug daghang literatura diha sa laing pinulongan. Apan kon matino sa magtatan-aw sa pag-alagad nga nagkadaghan ang interesado sa usa ka partikular nga grupo nga langyaw ug pinulongan, lagmit iyang makaplagan nga haom ang pag-estak ug kasarangang gidaghanon sa literatura diha sa maong pinulongan aron magamit sa mga magmamantala. Kon walay mabatonan nga literatura diha sa kongregasyon, mahimo kining orderon. Apan, mahimong mataudtaoran pa una moabot ang giorder nga literatura sa usa ka partikular nga pinulongan. Busa, usa ka probisyon ang mabatonan aron makaimprenta ug mga literatura gikan sa www.watchtower.org. Daghang publikasyon diha sa maong Web site nga gihubad sa gatosan ka pinulongan ang daling mabatonan sa magmamantala o sa interesadong tawo. Dayag nga kini nga probisyon makatabang gayod sa pag-ugmad sa interes nga gipakita niadtong langyaw ug pinulongan.
8. Unsa ang papel sa kongregasyon sa pag-ugmad sa interes niadtong langyaw ug pinulongan?
8 Ang Papel sa Kongregasyon: Sa ubang mga kahimtang diin nagkadaghan ang tawo nga nagsultig langyawng pinulongan, basin walay duol nga kongregasyon nga nagpahigayon ug mga tigom gamit ang maong pinulongan. Busa, angayng dapiton ang mga interesado nga langyaw ug pinulongan sa pagtambong sa inyong panagkatigom. Ang mainitong pag-abiabi ug pagpakitag personal nga interes mahimong magdasig kanila sa pagtambong kanunay. Sa sinugdan, lagmit may mga babag tungod sa panaglahi sa pinulongan ug kultura, bisan pa niana, walay makababag sa tinuod nga Kristohanong gugma sa tibuok-kalibotang kapunongan sa mga Saksi ni Jehova. (Sof. 3:9; Juan 13:35) Larino ka ba sa laing pinulongan? Kon oo ug andam ka sa pagduaw niadtong nagsulti niana nga pinulongan, palihog pahibaloa ang inyong sekretaryo sa kongregasyon aron iya usab kining ipahibalo ngadto sa sangang buhatan. Kini mapuslanon sa dihang ang sangang buhatan mangita ug mga magmamantala nga makatabang sa pag-ugmad sa interes sa mga interesado.
9. Kanus-a lagmit maghikay ug klase sa pagtuon ug pinulongan, ug sa unsang paagi kini himoon?
9 Pagtuon ug Pinulongan: Kon aduna kay gitabangan nga langyaw ug pinulongan, labing maayo nga imo silang dasigon sa pagtambong sa mga tigom sa kongregasyon sa ilang kaugalingong pinulongan kon dili ra kaayo kini layo kanila. Apan kon layo ang kongregasyon ug dili sila makaarang sa pagtambong, ang pipila ka magmamantala mahimong magtuon ug laing pinulongan aron mas matabangan nila ang mga interesado. Kon walay duol nga kongregasyon, ang sangang buhatan mahimong maghikay ug klase sa pagtuon ug pinulongan tungod sa ubay-ubayng mga langyaw o mga nitibo. Sa maong kahimtang, ang sangang buhatan magpahibalo sa maong panginahanglan sa duol nga mga kongregasyon ug maghikay ug usa ka pahibalo bahin sa maong klase. Kadtong buot moapil sa maong klase kinahanglang adunay tumong nga mobalhin ug grupo o kongregasyon aron sa pagtabang sa mga tawong langyaw ug pinulongan.
10. Kanus-a mahimong maporma ang usa ka grupo sa langyawg-pinulongan, ug sa unsang paagi kini himoon?
10 Pagporma ug Grupo: Aron maporma ang usa ka grupo sa partikular nga pinulongan, upat ka paninugdang butang ang gikinahanglang makab-ot. (1) Adunay igo-igong gidaghanon sa mga interesado nga langyaw ug pinulongan. (2) Adunay pipila ka magmamantala nga makamao o nagtuon sa maong pinulongan. (3) Adunay kuwalipikadong mga ansiyano o ministeryal nga alagad nga manguna ug magdumala sa labing menos usa ka senemanang tigom sa maong pinulongan. (4) Adunay lawas sa mga ansiyano nga andam mosuportar sa grupo. Kon kini nga mga kinahanglanona nakab-ot, nan ang lawas sa mga ansiyano magsulat sa sangang buhatan bahin sa mga detalye sa grupo ug maghangyo nga pormal silang ilhon ingong kongregasyon nga maoy nagsuportar sa grupo nga langyaw ug pinulongan. (Tan-awa ang librong Organisado, p. 106-107.) Ang ansiyano o ministeryal nga alagad nga manguna tawgong “magtatan-aw sa grupo” o “alagad sa grupo” nga may kaakohan sa pag-atiman sa grupo.
11. Nganong usa gayod ka pribilehiyo ang pagtabang sa mga tawong langyaw ug pinulongan?
11 Ang pagtabang sa mga tawong langyaw ug pinulongan diha sa atong teritoryo maoy usa ka hinungdanong bahin sa atong tibuok-kalibotang pagsangyaw nga gisugdan sa atong Ehemplo, si Jesu-Kristo. Hinaot nga magmasiboton kita sa pagbuhat sa atong bahin ug tan-awon kon sa unsang paagi si Jehova mag-uyog sa kanasoran ug magkabig sa mga tawong tilinguhaon kaniya. (Hag. 2:7) Makapalipay gayod ang bug-os nga pagpakigbahin sa maong buluhaton! Hinaot nga panalanginan ni Jehova ang atong hiniusang paningkamot sa pagtabang sa mga tawong langyaw ug pinulongan diha sa atong teritoryo samtang kanunay natong hinumdoman nga bisag unsa pay pinulongan sa tawo, ang Diyos makapatubo sa binhi sa kamatuoran nga natanom diha sa ilang kasingkasing!—1 Cor. 3:6-9.