Mga Pangutana Gikan sa mga Magbabasa

Walay giingon ang Bibliya. Pero naghatag nig makapainteres nga mga detalye nga tingali maoy hinungdan sa ilang desisyon.

Si Maria giingnan sa usa ka anghel nga siya mamabdos ug manganak. Dihang gisulti sa anghel kini nga mensahe, si Maria ug Jose nagpuyo sa Nasaret, usa ka siyudad sa Galilea. (Luc. 1:26-31; 2:4) Sa ulahi, dihang mibiya sila sa Ehipto, mibalik sila sa Nasaret. Si Jesus didto na nagdako ug gitawag nga Nasaretnon. (Mat. 2:19-23) Busa kon maghisgot bahin kang Jesus, Jose, ug Maria, makahunahuna ta sa Nasaret.

Si Maria naay paryente nga ginganlag Elisabet, nga nagpuyo sa Juda. Si Elisabet asawa sa saserdoteng si Zacarias ug nahimong inahan ni Juan nga Tigbawtismo. (Luc. 1:5, 9, 13, 36) Si Maria mibisita kang Elisabet ug mipuyo uban kaniya sa Juda sulod sa tulo ka bulan. Dayon mibalik si Maria sa Nasaret. (Luc. 1:39, 40, 56) Maong medyo pamilyar siya sa teritoryo sa Juda.

Dayon, miabot ang sugo nga “magparehistro” ug misunod si Jose. Busa mibiyahe si Jose gikan sa Nasaret paingon sa Betlehem, ang “siyudad ni David” ug ang gitagna nga lugar diin matawo ang Mesiyas. (Luc. 2:3, 4; 1 Sam. 17:15; 20:6; Miq. 5:2) Human ipanganak ni Maria si Jesus didto, siyempre wala pabiyahea ni Jose ang iyang asawa uban sa bag-ong natawo nga bata pabalik sa Nasaret kay layo ni nga biyahe. Nagpabilin sila sa Betlehem, nga mga siyam ka kilometro (mga 6 ka milya) gikan sa Jerusalem. Busa mas sayon para nila nga dad-on sa templo ang bag-ong natawo nga si Jesus ug magtanyag ug halad.—Lev. 12:2, 6-8; Luc. 2:22-24.

Sumala sa giingon sa anghel kang Maria, ang iyang anak makadawat sa “trono ni David” ug “magahari.” Naghunahuna kaha si Jose ug Maria nga naay importanteng kahulogan ang pagkatawo ni Jesus sa siyudad ni David? (Luc. 1:32, 33; 2:11, 17) Tingali gibati nila nga maayong magpabilin didto ug maghulat kon unsay kabubut-on sa Diyos para nila.

Wala ta mahibalo kon unsa na sila ka dugay sa Betlehem dihang miabot ang mga astrologo. Pero nianang panahona, ang pamilya ni Jose nagpuyo na sa usa ka balay, ug ang batang si Jesus dili na masuso. (Mat. 2:11) Nagpakita ni nga imbes mobalik sa Nasaret, posibleng taudtaod pa silang nagpuyo sa Betlehem.

Si Herodes nagsugo nga patyon “ang tanang batang lalaki sa Betlehem . . . nga nag-edad ug duha ka tuig paubos.” (Mat. 2:16) Kay gipasidan-an sa anghel, si Jose ug Maria miikyas paingon sa Ehipto uban si Jesus ug nagpabilin didto hangtod namatay si Herodes. Sa ulahi, gidala ni Jose ang iyang pamilya sa Nasaret. Nganong wala man sila mobalik sa Betlehem? Aron likayan ang pintas nga anak ni Herodes nga si Arquelao nga naa sa Judea, ug aron sundon ang pasidaan sa Diyos. Sa Nasaret, luwas nga mapadako ni Jose si Jesus ingong tinuod nga magsisimba sa Diyos.—Mat. 2:19-22; 13:55; Luc. 2:39, 52.

Dayag nga si Jose namatay una pa kang Jesus, dihang wala pa mabuksi ang kahigayonan para sa uban nga moadto sa langit. Busa si Jose mabanhaw dinhi sa yuta. Daghan ang makakita niya ug makapangutanag dugang detalye kon nganong siya ug si Maria nagpabilin sa Betlehem human matawo si Jesus.